1 Nenga Paulo na Silivano na Timoseo,

tunguwayandikila mwenga lipinga lya wandu wamkwinila Kilisito mvile haku ku Tesalonike, mvile ni wandu ghaki Sapanga Tati wa twenga na Bambu Yesu Kilisito.

2 Tunguwatakila manemu na kulikala kwa kukotoho kutovana kuhuma kwa Sapanga Tati wa twenga na kwa Bambu Yesu Kilisito.

3 Walongu, tungupalwa kumshukwile Sapanga machuwa hyogha kwaikiva gha mwenga. Ingutupala twenga kughola nagha kwaikiva ukwinila wa mwenga ungukula na upalo wa kila mmonga paghati mwa mwenga unguyongeseka nesu. 4 Ndiwa kwaikiva twenga tunguidumbila mwenga kumapinga gha wandu wa Sapanga wamkwinila Kilisito kwaikiva tunguidumbila kwa vila mnguyendelela kukwinila na kufumilila paghati gha uhakata wogha pamonga na mahakilo yala munguyapokela. 5 Hagha hyogha ni uhighilisu yiwa ulamulo wa Sapanga ni chakaka na kwaikiva gha nagha mwenga mtevalangilwa yiwa mngupalwa kupokela unkosi wa Sapanga, hula mwenga mnguhakilwa kwaikiva gha weni. 6 Sapanga ateghola mghalu upalwa kugholwa, atewahuyisila mahakilo wala wandu wanguwahakila mwenga, 7 na atewapegha luheku mwenga muhakilwa pamonga na twenga. Ateghola mghalu hau lipindi Bambu paahuya kuhuma kundumba pamonga na watumikila ghaki wa kundumba wa Sapanga weni makakala, 8 na mihali gha lyoto, kuwahakila wala wandu wogha wammanya ng'ogha Sapanga na wala wamkwinila ng'ogha Bambu Yesu. 9 Kunyokolwa kwa weni kutevile ni kuyalamiswa machuwa yayendelela na kubaghulwa weka kutali na Bambu na ukwilikihi ghaki mkulu, 10 lichuwa lila paatehika kupokela ukwilikihi kula kwa wambulete nesu ghaki na utundamilu kuhuma kwa wogha wala wakwinila. Na mwenga hilahila mtewela paghati mwa weni, kwaikiva muukwinila hula ujumbi tuwalongelili.

11 Ndiwa kwaikiva tunguwayupila mwenga machuwa hyogha kwa Sapanga, ili Sapanga wa twenga awavalangile yiwa mpalwa kukemwa waghola lihengu lyaki, na kwa uweso ghaki apati kuwawesesa kutimilila kwa makakala ghaki yala hyogha maheli mngupala na mtimilisi mahengu gha mwenga hyogha gha ukwinila. 12 Tunguyupa nagha lukani lihina lya Bambu wa twenga Yesu lipati kutundamilwa mghati mwa mwenga, na mwenga mtepokela ukwilikihi kuhuma kwa mweni kwa manemu gha Sapanga wa twenga na gha Bambu Yesu Kilisito.