1 Walongu, lasima ng'ogha niwayandikili mghalu wowosi kuilongelelela lipindi au lisaa mighalu hai itehumila. 2 Kwaikiva mwenga maweni mngumanya chakaka lichuwa lya Bambu litehika handa mwihi vila anguhika uhiku. 3 Pala wandu wailongile, "Kila kindu ni luheku na kwahela makakala", ndiwa mayalamiso yatepowaguwila bwitu, hagha yatehumila bwitu handa utungu wa mlela pala umuhikila lipindi lya kujiwopola, kwahela mundu atewesa kuhyeta hali. 4 Ila mwenga, walongu, mulwisa ng'ogha, lichuwa lila litewahikila ng'ogha bwitu handa vila anguhika mwihi. 5 Mwenga wogha ni wandu mngulikala kumhana, wandu wa pamuhi. Twenga wandu ng'ogha wa uhiku au wa mulwisa. 6 Hinu tukotoho kuwonja lughono handa waghangi, tungupalwa kulikala mihu uhiku wogha na tuliyandali. 7 Kwaikiva wogha wala wanguwonja uhiku, na wala wangulowela lipindi lya uhiku. 8 Ila twenga kwaikiva ni wandu wa pamuhi na tungupalwa kuliyandala kwa kuvala ukwinila na upalo handa nguu gha lyuma kulikingila mkitivi, na litumaini lyetu lya ulokola handa likokoma lya lyuma kulikingila. 9 Kwaikiva Sapanga katuhaghula ng'ogha ili tuyaghamili kwa lilaka lyaki, ila tuupokeli ulokola kwa kupitila Bambu wa twenga Yesu Kilisito, 10 yula ahovili kwaikiva gha twenga, ili tupati kulikala pamonga na mweni, patuwela wakomu au patuhova kala. 11 Hinu mpeghani moyu na mtangani mwenga kwa mwenga, handa mghola hinaa.

12 Walongu, tunguwaluwa muwatundamili wala wangughola lihengu paghati mwa mwenga, wala wanguwalongosa na kuwavula mlikali handa wandu wamkwinila Kilisito. 13 Muwapeghi utundamilu mkulunga na kuwapala kwaikiva gha lihengu wangulighola. Mlikali kwa kutowela na ngondu na paghati gha mwenga.

14 Walongu tunguwaluwa nesu nesu muwakanisi wandu wala wapweli, muwatayi moyu wandu wala watenyuka moyu, muweli na kuwafumilila wandu wogha. 15 Mloli mundu yoyosi akotoho kumuhuyisila myaki mahakata kwa mahakata, ila machuwa hyogha mhakuli kugholelana hyogha yavili maha mwenga kwa mwenga na kwa wandu wogha.

16 Mhekeleli machuwa hyogha, 17 Myupi kila lipindi, 18 na kuwela na kushukwile kukila mghalu. Hagha ndiwa anguyapala Sapanga kwa kuhuma kwa mwenga mvile mkongana na Kilisito Yesu.

19 Mkotoho kumngingama Mpumulo wa Sapanga, 20 mkotoho kupughanya ulota wa Sapanga, 21 ila myesi kila kindu, myakoli yala yavili ghamaha. 22 Na kuhyeta kila lila lihakata. 23 Sapanga yula angutughola tulikali kwa kuwela ng'ogha na ngondu awaghulule mwenga nesu nesu kwa kila njila na kugholokela fwasi zya mwenga, mpumulo, mioyu, na mihigha gha mwenga kutali na lihakata lyoyosi lipindi lya kuhika kwaki Bambu wa twenga Yesu Kilisito. 24 Mweni yula kawakema mwenga ateghola nagha kwaikiva ni mweni angukwinilwa. 25 Walongu mtuyupili na twenga hilahila. 26 Muwajambusi walongu wogha kwa kilangihi kya upalo. 27 Ninguwalaghila kuulongolo gha Bambu mhighilisi yiwa walongu wogha wangusomelwa lihamba hai. 28 Tunguwatakila manemu gha Bambu Yesu Kilisito.