1 Mwihu wa hyogha walongu wa nenga, mjivula kuhuma kwa twenga vila mngupalwa kulikala ili kumghola Sapanga ahekeleli. Na chakaka muwela mngulikala nagha. Hinaa tunguwaluwa nesu kwa lihina lya Bambu Yesu muyendeleli kulikala nagha. 2 Kwaikiva mngumanya yala malaghililo tuwapeghili kwa ulongosi wa Bambu Yesu. 3 Sapanga angupala mwenga muweli wandu wa Sapanga na mlikali chonju na ungongola. 4 Kila mlumi angupalwa ajivuli kulongosa higha ghaki kwa kuwela mundu wa Sapanga na utundamilu, 5 na ng'ogha kwa lumatamata mhakata handa wandu wammanya ng'ogha Sapanga. 6 Hinu, mundu yoyosi akotoho kumgholela myaki uhakata hata kumlulunganya kwaikiva gha mghalu hau. Kwaikiva tuwalongelili kala hagha na kuwakanisa nesu yiwa Bambu atewahakila wala wogha wangughola mighalu hai. 7 Sapanga katukema ng'ogha tulikali kwa kughola ngongola, ila tulikali kwa umbuleti nesu. 8 Hinu, yula kangupughanya mavulo hagha kampughanya ng'ogha mundu, ila kangumpughanya Sapanga mweni yula kangutupegha Mpumulo ghaki Mmbuleti nesu.

9 Kwa kulongelelela upalo wa walongu ng'ogha lasima yeyosi kuwayandikila, kwaikiva mwenga weni mvulwa na Sapanga kila mmonga kumpala myaki. 10 Mwenga kwa uchakaka mnguwapala walongu wogha kummbwani wa Makedonia hyogha, ila walongu tunguwaluwa nesu myangilai kuwapala. 11 Muweli na luhujulu lwa kulikala kwa kuponga, kila mmonga agholi mighalu ghaki mweni na agholi lihengu kwa mawoku ghaki mweni handa tuwalaghilili kula kuhyetu. 12 Ili kulikala kwa mwenga kwa kila lelu kuipatili utundamilu kuhuma kwa wandu wakilisito ng'ogha, na mtewela ng'ogha na lasima gha kuwalindila waghangi kwa vila mnguvihakula.

13 Walongu tungupala mmanyi uchakaka wa wala wawelili wahova kala, ili mkotoho kulumbilila handa wala waghangi wavile ng'ogha na litumaini. 14 Twenga tungukwinila yiwa Yesu ahovili, akahinduka, na hinu twenga tungukwinila yiwa Sapanga atewayegha pamonga na Yesu wala wogha wahovili wakiva wakimkwinila Yesu.

15 Hali tunguwalongela ni mavulo gha Bambu, yiwa twenga twambila wakomu, wala tutevile tuhighala, Bambu paahika chakaka tutetumbula ng'ogha kuwalongola wala wahovili kala. 16 Kwaikiva Bambu mweni atehuluka kuhuma kundumba pamonga na lilowi lya lilaghilo, na lilowi lya mtumikila wa kundumba wa Sapanga mkulu na lilowi lya lipembi lya Sapanga. Na ndiwa wala wahovili wakiva wangumkwinila Kilisito watehindulilwa mtumbulo. 17 Badili gha hali kuphita twenga tuvile wakomu lipindi hali tutekungulwa pamonga na weni kumahindu kukongine na Bambu kunani. Hinu tutewela pamonga na Bambu machuwa yayendelela. 18 Hinu, mpeghani moyu kwa milando hai.