1 Walongo wa twenga, mwengabaha mngumanya yiwa kuhika kwa twenga kuwelili ng'ogha kwa yaghi yaghi. 2 Mngumanya vila tuhakilwa na kulighwa haku kummbwani wa Filipi yambila gha kuhika ku Tesalonike. Pamonga na yiwa kuwelili na mngingamo utangala, Sapanga wa twenga atupeghili makakala gha kuwatangasila Habali ghaki Maha. 3 Kwaikiva mghalu tunguukasila kwa mwenga ng'ogha mghalu uhumila na uhwangi, na lukani lihakata hata kuwatindila kwa milando, 4 ila twenga tungutangasa handa vila aipalili mweni Sapanga kwaikiva mweni katukwinila, akatupegha hai Habali Maha. Na hai ng'ogha lukani lwa twenga kuwahekelesa wandu, ila tungupala kumuhekelesa Sapanga mweni kumanya mioyu gha twenga mbaka mghati. 5 Kwaikiva mwenga maweni mngumanya yiwa twenga tutumila ng'ogha milando gha kugubika gubika uchakaka kwa mwenga hata milando gha ukalamuki gha kuhigha, Sapanga mweni angulola. 6 Twenga tuhakula ng'ogha kutundamilwa kuhuma kwa wandu hata kuhuma kwa mwenga baha, hata kuhuma kwa mundu yoyosi, 7 pamonga na twenga tuwelili wandumindumi wa Kilisito, tungaliwesa kupala chochosi kuhuma kwa mwenga, ila twenga tukawela wanyalinyali paghati gha mwenga handa nyongu kanguwavika maha wanachali ghaki. 8 Tuwapalili nesu mbaka tuhekelela kwa pamonga na mwenga, ng'ogha kwa kuwatangasila Habali Maha gha Sapanga weka ghaki, ila hata kuwatanga mwenga kwaikiva muwelili wapalwa wa twenga. 9 Walongo, mwenga mngukumbwike vila tugholili lihengu kwa kuyangala. Patuwayeghela Habali Maha gha Sapanga tugholili lihengu pamuhi na uhiku ili tukotoho kuwela mhigu kwa mundu yoyosi paghati mwa mwenga. 10 Mwenga maweni ni wandu wailolile kwa mihu, pamonga na Sapanga, ndyangilu gha twenga paghati gha mwenga mngukwinila iwelili gha maha, na ulungwana na iwela ng'ogha na kulalamikilwa. 11 Kwaikiva mngumanya yiwa twenga tuwagholelili kila mmonga wa mwenga handa vila tati anguwagholela wana ghaki mweni. 12 Tuwatayili moyu na kuwalongela myangalayi, ili muwese kulama vila angupala Sapanga yula kanguwakema mkongine kuunkosi na ukwilikihi ghaki. 13 Kwaikiva gha nagha twenga hilahila tungumshukwile Sapanga machuwa hyogha, kwaikiva, pampokela lila lilando lya ujumbi wa Sapanga lila mliyoghanila kuhuma kwa twenga, mpokela ng'ogha handa lilando lya wandu, ila handa lilando lya Sapanga, na chakaka ni lilando lya Sapanga, kwaikiva ujumbi wa Sapanga angughola lihengu mghati gha mwenga mkwinila. 14 Walongo, mwenga mhikwa na mighalu hilahila iwapatili mapinga gha wandu wamkwinila Kilisito kula Uyahudi wavile ni wa Kilisito Yesu. Mwenga muhakililwi na wandu wa mlima wa mwenga handa weni wahakililwi na Wayahudi wayao, 15 wala wamkomili Bambu Yesu na walota wa Sapanga, wakatuhakili na twenga kangi. Wandu hagha wangumhyomelesa Sapanga, kangi ni wahakata wa kila mundu, 16 kwaikiva wangutukingama tukotoho kulongela na wandu wavile ng'ogha Wayahudi ujumbi hula utewayeghela kulokoka. Havi ndiwa wamemesa sambi zyao wazigholili machuwa hyogha ila hinaa lilaka lya Sapanga linguwahikila.

17 Walongu, kulekana kwa twenga na mwenga kuwelili kwa lipindi hela, kangi kulekana haku kuwelili kwa higha hela na ng'ogha kwa mpumulo. Machuwa mayaghani kuulongolo, tupatilwi na luhujulu ngulu lya kuwalola kangi. 18 Kwa nagha tulamula kuwatyangila kangi. Nesu nesu nenga Paulo, niyesili kuhika kwa mwenga miyanja itangala, ila Lihyukana litungingamili. 19 Ghuli, patutegholoka kuulongolo gha Bambu Yesu Kilisito pahika, lukani lwa kuidumbila kwa twenga lutevile liki? Itewela ni mwenga mwaweni, kwa chakaka mwenga ndiwa litumaini lya twenga na luheku lwa twenga. 20 Chakaka, mwenga maweni ndiwa ukwilikihi wa twenga na luheku lwa twenga.