1 Kwa nagha patusindwa kuyendelela kufumilila, tulamulili kuhighala kummbwani Asene weka yetu, 2 tukalamula kumlaghila kwa mwenga mlongu wa twenga Timoseo, mweni ni mghola lihengu muyetu kukutangasa Habali Maha gha Sapanga. Tumyeghili ili awesi kuwagangamalisa na kuwataya moyu kuukwinila gha mwenga, 3 lukani ukwinila wa mundu yoyosi paghati mwa mwenga ukotoho kusisila kwaikiva gha maghaso hagha. Mwenga mngumanya yiwa tungupalwa kupokela mahakilo. 4 Kwaikiva, patuwela pamonga na mwenga, tuwalongelili yiwa tutehakilwa, na handa vila mngumanya ndiwa ihumila vilavila. 5 Ndiwa kwaikiva nikamyegha Timoseo kwa mwenga. Nenga nilepelela kufumilila nesu, hinu nikamyegha Timoseo kwa mwenga ili mbati kupokela mighalu gha ukwinila wa mwenga. Nitilili ikotoho kuwela myesa kawayesa na lihengu lyogha tugholili paghati mwa mwenga liyaghamiki yaghiyaghi.

6 Ila Timoseo kahuya kala, na mweni katupegha ujumbi wa kutuhekelesa kwa ukwinila na upalo wa mwenga. Katulongela yiwa mngutukumbwiki machuwa yayendelela, na mvile na luhujulu lwa kutulola twenga handa twenga tuvile na luhujilu lwa kuwalola mwenga. 7 Hinu walongu wa twenga kumahakilo na maghaso hyogha tutaywa moyu kwaikiva gha ukwinila wa mwenga, 8 Kwaikiva hinaa kwa uchakaka tunguhekelela kulama ikiva mwenga mtegholoka maha kwa Bambu. 9 Hinaa tunguwesa kumshukwile Sapanga kwaikiva gha mwenga. Tungumshukwile kwaikiva gha luheku litumema kuulongolu ghaki kwaikiva gha mwenga. 10 Tunguyendelela kumyupa Sapanga uhiku na pamuhi kwa moyu wa twenga wogha ili atupatili njila gha kuwalola wuso kwa wuso na tuwesi kuwatanga chochosi kila kipungula kuukwinila wa mwenga.

11 Tungumyupa Sapanga, Tati wa twenga, na Bambu wa twenga Yesu atuyandalile njila gha twenga kuhika kwa mwenga. 12 Bambu awawesesi mwenga muyongesi kupalana na kuwapala wandu wogha nesu nesu, handa twenga vila tunguwapala mwenga. 13 Hinu ategangamalisa mioyu gha mwenga, na mwenga mtewela wandu mtimila na wambulete nesu kuulongolo gha Sapanga na Tati wa twenga lipindi Bambu wa twenga Yesu anguhika pamonga na wandu wogha wavile wa mweni.