1 Nenga Paulo, na Silivano na Timoseo, tunguwayandikila lihamba hai mwenga lipinga lya wandu wamkwilikiha Kilisito haku Tesalonike, wavile wandu ghaki Tati Sapanga na wa Bambu Yesu Kilisito.

Tunguwatakila manemu na luheku.

2 Tungumshukwile Sapanga machuwa yayendelela kwaikiva gha mwenga wogha na kuwakumbwiki machuwa yayendelela kumayupo tunguyupa. 3 Twenga tungukumbwiki machuwa yayendelela lihengu lya mwenga lya ukwinila kuulongolo gha Sapanga yula avile Tati wa twenga, vila upalo wa mwenga unguwawesesa kughola lihengu kwa kuyangala na vila mnguhihilisa ukwinila wa mwenga kwa Bambu Yesu Kilisito. 4 Walongo, tungumanya yiwa Sapanga anguwapala na yiwa kawahaghula muweli wandu ghaki, 5 kwaikiva patuwelili tunguwatangasila Habali Maha iwelili ng'ogha kwa milando weka ghaki, ila kwa makakala na kwa Mpumulo wa Sapanga, tukiwela na uhighiliso yiwa ujumbi hau ni wa chakaka. Mngumanya vila tulikalili pamonga na mwenga kwaikiva gha mwenga. 6 Mwenga mkovekelili mlandano wa twenga na Bambu, pamonga na maghaso hyogha ila mpokelili ujumbi hula kwa luheku luhuma ku Mpumulo wa Sapanga. 7 Hinu mwenga muwela mlandano maha kwa wakwinila wogha wa ku Makedonia na Akaya. 8 Kwaikiva gha kutangasa kwa mwenga lilando lya Bambu Sapanga liyoghanika ng'ogha haku ku Makedunia na Akaya weka ghaki, ila ukwinila wa mwenga umanyika kumahala kogha hata tupalwa ng'ogha kulongela kangi kuilongela nesu. 9 Wandu hagha wa kila mahala wangulongela vila mtupokela na vila mleka kutundamila ling'omung'omu na kumuhuyila Sapanga avile mkomu na chakaka, 10 hinaa mungumlindila Mwana ghaki ahuluki kuhuma kundumba, na mweni ni Yesu, yula avile Sapanga amuhindulili kuhuma kukihu na ndiwa yula angutulokola na lilaka lya Sapanga lula lunguhika.