1 Mwenga wakulu, muwagholeli wahusutu wa mwenga vila ingupalwa, na mwenga hilahila mkumbwike muwela na Bambu kundumba.

2 Katu mkotoho kuleka kuyupa machuwa hyogha, mkali mihu na kuwela wandu wa kushukwile. 3 Hilahila, mtuyupile na twenga ili Sapanga atuwoposeleli njila gha kutangasa lilando lyaki, na kutangasa habali zya Kilisito zyeni kuwela zihighwa haku dahile. Na nenga niwopwa kwaikiva gha kutangasa Habali Maha. 4 Hinu, mumyupi Sapanga ili niwese kulonga handa vila ingupalwa kulongelwa na wandu wawesi kumanya lipalalipala.

5 Lipindi mnguwela na wandu weni kumkwinila ng'ogha Kilisito, mlangihi ndyangilu maheli kangi mtumili lipindi hali kuwatanga. 6 Machuwa hyogha mlongele mighalu maheli yanguwesa kutanga waghangi, hilahila muwese kuwayanga maheli wandu wogha wangupala kumanya.

7 Mlongo wa twenga mpalwa Tukiko, mghola lihengu mchakaka yula tungughola lihengu lya Bambu Yesu pamonga, atewalongela habali zya nenga zyogha. 8 Ningumyegha kwa mwenga kwa lukani hali, ili mpati kumanya ndyangilu gha twenga na kangi awatayi moyu. 9 Anguhika pamonga na Onesimo, mlongo wa twenga mpalwa na mchakaka, hayu ni mweni kaya wa mmbwani wa mwenga, weni watewalongela mighalu hyogha ingugholeka haku kwa twenga.

10 Alisitaliko mweni kuwela muwopwa pamonga na nenga anguwajambusa, hilahila Maliko mlongo ghaki Balinaba na mweni anguwajambusa, ningumanya myoghanila kala habali ghaki, paakihika kwa mwenga mumpokeli maheli. 11 Na mweni Yoshuwa mweni kukemwa Yusito anguwajambusa. Wandu hagha waitatu ni Wayahudi wekayao wangughola lihengu pamonga na nenga kwaikiva gha unkosi wa Sapanga, wandu hagha wanipeghili mtanga mkulu.

12 Epafula, mweni kaya wa haku kwa mwenga, mghola lihengu wa Yesu Kilisito, anguwajambusa. Machuwa hyogha anguwayupila kwa makakala, ili mgangamale kuukwinila na mkamali kimpumulo na mkotoho kuwela na holu kukughola hyogha anguyapala Sapanga. 13 Ninguwesa kumlongelela maheli yiwa angughola kaghola lihengu kwa makakala kwaikiva gha mwenga na kwa wandu wa Lawodikia na Hiyelapoli. 14 Lukasi, yula mlamisa tungumpala anguwajambusa na Dema hilahila anguwajambusa.

15 Muwajambusi walongo wa haku ku Lawodikia. Kangi mumjambusi mhacha Nimfa pamonga na lipinga lyogha lya wakwinila lingukonganika ukaya kwa mweni. 16 Pamyomola kusoma lihamba hali, lasima muwapeghi wayenu kumapinga gha wandu wamkwinila Kilisito wa haku Laodikia na weni waisomi, na lihamba lila niwayandikili weni wawapeghi ili na mwenga muisomi. 17 Mumlongeli Alikipo havi, "Ugholi maheli lila lihengu lya kutumikila akupeghili Bambu, ili uitimilisi."

18 Nenga, Paulo ninguwayandikila majambuso hagha kwa liwoku lyangu mweni. Mngumbuki kuniyupila nikiwela hamu mkihungu.

Nawayupila umaha wa Sapanga uweli na mwenga.