1 Hinu, ikiwela Sapanga kawahindula kungalilu hyonu pamonga na Kilisito, muwachile mighalu iwela kundumba, kula Kilisito angulongosa pamonga na Sapanga. 2 Muwachili kupokela mighalu gha kundumba na ng'ogha mighalu gha baha mumlima wogha, 3 kwaikva mwenga mhova na ngalilu gha mwenga ihighwa pamonga na Kilisito ku Sapanga. 4 Ukomu wa mwenga uwela kwa Kilisito, paatehika kangi, mtepokela pamonga na mweni kuukulu ghaki.

5 Mleki kughola vila mihigha gha mwenga ingupala, handa vila, ngongola na uhakata na luhujulu lihakata na lumatamata lihakata na lumatamata mighalu hai hyogha ni handa kuyupa mang'omung'omu. 6 Lilaka lya Sapanga linguwahikila wandu handa hagha. 7 Mwenga hilahila pala dahile mlamili kwa kughola mighalu hai.

8 Ila hinaa, mngupalwa kuleka kughola mighalu hai hyogha, lilaka na utatala na wifu na malongelo yeni malighu. 9 Mkotoho kulongelana uhwangi, kwaikiva mwenga mleka hila mighalu mihakata gha dahile na matendu ghaki hyogha. 10 Hinaa mtumbula ngalilu hyonu. Sapanga ndiwa anguwawesesa kungalilu hai hyonu ili muwese kuwela handa mweni kwa kummanya mweni kwa maheli. 11 Kumghalu hau, kwahela mlekanu paghati gha Mgiliki na myahudi, yula kayingiswa jandu na yula kayingiswa jandu ng'ogha, yula msomi na msomi ng'ogha, muhusutu na mundu pekesu. Kilisito ni kila kindu na kawela kukila kindu.

12 Mwenga ni wandu ghaki Sapanga, mweni awapalili na kuwahaghula. Kwa nagha, muweli na moyu wa luhungu na umaha na kunyenyekela na unyalinyali pamonga na ufumilifu. 13 Mpapilane mihighu na kulekeselana mahakata ikiva mmonga wamwenga kamgholela myaki mahakata, lekeselana handa vila Bambu awalekeselanilili mwenga. 14 Pamonga na hagha hyogha, muweli na upalo, kwaikiva upalo ungukonganisa kila kindu kuumonga hula wa chakaka. 15 Kuponga kunguhuma kwa Kilisito, kulongosi mioyu gha mwenga, mwenga muwela mhigha mmonga hinu mkemwa kulikala kwa kuponga, kangi muweli wandu weni kumshukwile Sapanga. 16 Ujumbi wa Kilisito na utami mghati mwa mwenga pamonga na luhala lyaki lyogha. Mlongelane mavulo hagha na myalole kwa uchakaka mwenga kwa mwenga kwa luhala lyogha, mkiyimba sabuli, nyimbu sya sifwa na nyimbu zila zinguweseswa na Mpumulo na kumyimbila Sapanga kwa kumshukwile kumioyu gha mwenga. 17 Mghalu wowose mngughola au mngulonga, mgholi mkimanya mngumgholela Bambu Yesu, kunu mkimshukwile Sapanga Tati kupitila mweni.

18 Wahumbu muwatundamili wangwana wa mwenga, ndiwa ingupalwa kwa wandu weni kumkwinila Bambu Yesu.

19 Mwenga wangwana, muwapali wahumbu wa mwenga, na mkotoho kuwela na lilaka kwa weni.

20 Mwenga wana, muwatundamili walela wa mwenga kumighalu hyogha, kwaikiva kughola nagha kungumhekelesa Bambu.

21 Mwenga akina tati mkotoho kuwaghola wana wa mwenga kuwela na lilaka, kwaikiva wanguwesa kuwachila yiwa wawesa ng'ogha kughola maheli kindu chochose.

22 Mwenga wahusutu, muwatundamili wakulu wa mwenga kumighalu hyogha. Mgholi nagha ng'ogha kwaikiva wanguwalola, ng'ogha kwa kuhakula kupalwa na weni, ila kwa uchakaka na kumyupa Bambu. 23 Lolosi ungulighola, ughole kwa uchakaka handa wandu weni kumtumikila Bambu na ng'ogha mundu. 24 Mmanyi yiwa Bambu atewapegha hupo hila awalongelili kuwapegha watumikila ghaki. Kwaikiva mwenga mungumtumikila Kilisito Bambu wa mwenga. 25 Mghola mahakata atepokela mahakata kukovekela na vila agholili. Kwaikiva Sapanga kahela ubaghula.