1 Nenga Paulo mndumindumi wa Yesu kilisito. Nihaghulilwi kuwela mndumindumi handa Sapanga aipalile, ninguwayandikila lihamba hali nikiwela pamonga na mlongu ghangu Timoseo,

2 tunguwayandikila mwenga wandu weni kumkwilila Sapanga muwela haku Kolosai.

Tunguwapalila umaha na kwa kulikala kwa kuponga kweni kuhuma kwa Sapanga Tati wa twenga.

3 Machuwa hyogha patuyupa kwaikiva gha mwenga tungumshukwile Sapanga,Tati wa Bambu wa twenga Yesu Kilisito, 4 twenga tuyughanila vila mwenga mumkwinilile Yesu kilisito, na upalu muulangiha kwa wakwinila wogha wa Sapanga. 5 Kukwinila kwa mwenga na kulikala kwa upalo kwa mwenga, kunguhuma kulitumaini lya mwenga yiwa mtepokela highili zila Sapanga kawavikila kundumba, mhyoghanila kala habali hai kupitila ujumbi wa chakaka tuwatangasilili ingumaanisa hila Habali Maha. 6 Habali hazi zyeni kuhika kwa mwenga, zingulandala kumlimawogha. Zinguwaghalambula wandu ili wamkwinili Sapanga handa zigholile kwa mwenga kuhuma pala mhyoghanilile habali zya umaha wa Sapanga na kuumanya uchakaka ghaki vila uwela. 7 Mjivulili umaha wa Sapanga kuhuma kwa yala agholili Epafula, mndumindumi myetu yula tungumpala kangi kamchakaka ku Kilisito kwaikiva gha mwenga, 8 mweni katulongela habali zya upalo wa mwenga awapeghili Mpumulo wa Sapanga.

9 Kuhuma lipindi lila patuhyoghanila kukwinila kwa mwenga, twenga tuleka ng'ogha kuwayupila mwenga ili Sapanga awapeghi mwenga kumanya kila angukipala kuluhala lwogha na umanyi wa weni kuhuma kwa Mpumulo wa Sapanga. 10 Ndiwa mtewesa kulikala vila Bambu angupala, na kughola kwa njila yeyosi yeni kumhekelesa. Kulama kwa mwenga kutemhekelesa kwa mahengu maheli gha mwenga, kangi mteyendelela kummanya Sapanga. 11 Tungumyupa Sapanga kwa uwesa ghaki mkulu, awatangi muwesi kufumilila hyogha. 12 Kangi mumshukwile Tati kwa luheku, mweni kawawesesa na mwenga muweli kuunkosi wa mhana. 13 Mweni atukombolili kuulongosi wa Lihyukana, akatuyegha kuulongosi wa Mwana ghaki mpalwa Yesu kilisito. 14 Hinu kwa mweni tungukombolwa, ingumaanisa sambi syetu zinguhululwa.

15 Kilisito ni mlandano wa Sapanga mweni kuwoneka ng'ogha, mweni awelili pambila gha kulumbwa viumbi vyogha na ndiwa kilongosi wa viumbi vyogha. 16 Kupitila hayu, Sapanga alumbili vindu vyogha, vila vya kunani na vila vya kumlima pamonga na vila vinguwoneka na vila vinguwoneka ng'ogha na weni uwesa na vilongosi wakulu na weni makakala vyogha vilumbilwi kupitila mweni na kwaikiva gha mweni. 17 Kilisito awelili pambila gha hindu hyogha kulumbwa na kupitila mweni vindu vyogha vingikonganika. 18 Mweni ni kilongosi wa wandu weni kumkwinila, na mweni ni mtumbulo wa hagha wandu weni kumkwinila, hila hila mweni ni wa mtumbulo kuhindulwa ili aweli mkulu kunani gha vindu vyogha. 19 Hinu Sapanga apalili ulungu ghaki ulikali mghati gha Mwana. 20 Kupitila Yesu kilisito Sapanga avikonganisili vindu vyogha na mweni na kwa kihu kyaki pala mlipingika akatughola tulikali kwa kuponga, vindu vyogha viwela kundumba na vya pahi.

21 Haku mtumbulo mwenga muwelili kutali na Sapanga na muwelili wahakata ghaki kwaikiva gha mawachilo gha mwenga mahakata na kughola matendu mahakata. 22 Ila hinaa, Sapanga kawakonganisa mwenga na mweni kwa kupitila kihu kya mhigha ghaki wa kuweleka, agholile nagha ili awayeghi kwaki wakiwela wamaha na kuwela ng'ogha na mahakata. 23 Hinu mngupalwa kuyendelela, na kukwinila uchakaka kulitumaini, hilahila mkotoho kuyumbila kulitumaini lila mlipokelili lipindi pamyughanila Habali Maha. Nenga Paulo niwela mndumindumi wa Habali Maha hai itangasilwi kwa kila mundu kumlima wogha hau.

24 Hinaa ninguhekelela kuhakilwa kwaikiva gha mwenga, na kupitila higha ghangu ningutimilisa ghala yalepelili kumahakilo gha Yesu kilisito kwaikiva gha mwenga weni kumkwinila Kilisito. 25 Nenga nigholilwi kuwela mtumikila wa lipinga lya wandu weni kumkwinila Kilisito kukovekelana na lihengu lila Sapanga anipeghili ili kuwayeghela mwenga Habali Maha vila ingupalwa. 26 Haki ndiwa kifisu kiwelili kifiswa kuhuma haku dahile na kwa viweleka vitangala, ila hinaa ihighiliswa kwa wandu wahaghulilwi kughola lihengu lya Sapanga, 27 mweni kapala kuwamanyisa unaisa na ukulu wa kifisu haki kyeni kulandala kwa wandu wawela ng'ogha Wayahudi, na kifisu kyeni ni haki, Kilisito kuwela mghati gha mwenga na mwenga mtekonganika kuukulu wa Sapanga. 28 Twenga tungumtangasa hayu Kilisito kwa wandu wogha, tunguwakalipila na kuwavula wogha kwa malangu hyogha, ili tuwesi kumlongela kila mundu milando gha Sapanga akiwela kanguimanya maha na kakongana na Kilisito. 29 Kukovekelana na hagha, nenga ningukimbanika nesu kughola mahengu, kunu ningulidumbila makakala gha Kilisito yeni kughola mahengu mghati ghangu.