1 Kilisito awatayi moyu, mapalo ghaki yawatayi makakala, Mpumulo wa Sapanga awagholi muweli kindu kimonga, na muweli na luhungu kwa waghangi, 2 mtimilisi luheku lwa nenga kwa kuwela na mawachilo mamonga, upalo mmonga na moyu mmonga na mawachilo gha mwenga yajumilani. 3 Ukotoho kuiwachila yiwa wenga wa maha kupiti wayako. Badili ghaki uweli mnyenyekela ukiwalola wayako wamaha kupiti wenga. 4 Kila mmonga akotoho kuwachila mighalu anguipala mweni weka, badili ghaki awachili mighalu yeni kupalwa na waghangi. 5 Mngupalwa muwachili mighalu handa vila Kilisito Yesu kawesa kuwachila,

6 Kiuchakaka Kilisito awelili Sapanga.

Ila kakanila kulangiha ulungu ghaki,

7 badili ghaki kwa kupala mweni akaleka kila kindu,

akaleka ukulu, na kuwela handa muhusutu,

akaweleka handa mundu .

8 Pakawela na mhigha hau wa kimundu anyenyekelili, akajumila kuhova,

kangi kihu kya kuvambwa kulipingika.

9 Kukovekelana na hali Sapanga akamyinula na kuwela mkulu,

kupiti waghangi wogha.

10 Kwa utundamilu wa Yesu vindu vyogha vya kunani na pahi pamhanga vimtundamili Yesu,

11 na kila mundu ajumili yiwa Yesu Kilisito ni Bambu.

kwa ukulu wa Sapanga Tati wa twenga.

12 Wapalwa wa nenga kukovekelana na hagha handa vila msowelela kuyitikila machuwa hyogha, handa vila myitikilile paniwelile na mwenga, muyendeleli kuyitikila paniwela ng'ogha, mulangihi kwa matendu ulokola wa mwenga kwa kutila na kuhihimila, 13 kwaikiva Sapanga ndiwa mweni kughola lihengu mghati mwa mwenga, na kuwapegha moyu wa kupala na kutimilisa lukani lwaki maha.

14 Mgholi mighalu hyogha bila mang'ung'uliku au masindano, 15 ili muweli wana wa Sapanga weni kuwela ng'ogha na kung'ung'ulikilwa, wala mahakata, wala weni kuwela ng'ogha na mahakata wenikulikala kukiweleka haki kyeni kubyodoka. Mng'anyimi paghati gha weni handa ndondwa vila zingulangasila kunani, 16 mkiwalongela wandu Lilando lya Sapanga lyeni kuwapegha wandu Ukomu wa machuwa hyogha bila mwihu. Ndiwa na nenga niteilola yiwa mnipegha utundamilo lichuwa lila atehika Kilisito, kwaikiva itelangiha lipala yiwa kuyangala kwa nenga na lihengu lya nenga viyaghamila ng'ogha yaghi.

17 Pamonga na yiwa nitehova na mwahi ghangu utetolwa handa litambiko lya kunywegha pamonga na litambiko lya ukwinila wa mwenga kwa Sapanga, hinu ninguhekelela nesu na kangi ninguhekelela pamonga na mwenga wogha. 18 Vilavila, na mwenga inguwapala mhekeleli na kululuta pamonga na nenga,

19 Niwela na lituini kwa Bambu Yesu kumyegha Timoteseo kwa twenga njenji, ili anitayi moyu panitepokela ujumbi wa mwenga. 20 Nahela mundu mghangi mweni kuwesa kuwagholokela maha kwa moyu ghaki wogha handa mweni. 21 Waghangi wangukimbanikila hela mighalu ghao wenibaha badili gha kukimbanikila mighalu gha Yesu Kilisito. 22 Mwenga maweni mngumanya vila Timoseo kalangiha kwa mwenga, kwaikiva kaghola lihengu lya Habali Maha pamonga na nenga handa mwana vila angughola lihengu kwa tati ghaki. 23 Hinu, nitemlaghila kwa mwenga njenji pala panitemanya mighalu ghangu vila itewela. 24 Nenga mwenibaha niwela na litumaini yiwa Bambu Yesu ateniwesesa nihiki kuwalola njenji.

25 Ila ninguliwachila ni mbaha kumyegha kangi kwa mwenga Epafulodito, mlongu ghangu na mghola lihengu pamonga na nenga, mtovangondo myangu, kangi ni mjumbi wa mwenga mumyeghili kwa nenga anitangi. 26 Mweni kana luhujulu nesu lwa kuwalola mwenga wogha, na awelili na holu nesu kwaikiva amanyili yiwa mwenga mhyoghanilile awelili anguvina, 27 kiuchakaka awelili mvina pabehi na kuhova, ila Sapanga akamuwonela luhungu, ili alami na nikotoho kuwela na mnyengemalu kangi mkihungu kyangu. 28 Hinu ningupala nesu kumyegha kwa mwenga, ili pamumlola mpati kuhekelela kangi, na mnyengemalu niwela nau uhuki. 29 Mumpokeli kwa kulangiha mapalo, mweni handa mlongu kulihengu lya Bambu, mngupalwa kulangiha utundamilu kwa wandu handa mweni, 30 amanyili yiwa angalihova kwaikiva gha kunitanga nenga mweni akapala kuhova kwaikiva gha lihengu lya Kilisito kwa kunitanga nenga pala mwenga msindwa kuulangiha mtanga kwa nenga.