1 Kumwihu walongu ghangu, mhekeleli kwa kukongana na Bambu! Nenga nitoka ng'ogha kuhuyila kuyandika mighalu hilahila niwayandikilile haku kuhyetu, ila ni kwaikiva gha kuwatanga. 2 Mkali mihu na wavula weni kuwalasimisa wakwinila wogha wayingiswi jandu, weni ni handa waghalu wakalipa, hinu mlikali kutali na weni kwaikiva hali wanguwalasimisa ni uhakata. 3 Wandu weni kuyingiswa jandu kiuchakaka ni twenga, ng'ogha weni, kwaikiva tungumyupa Sapanga kwa ulongosi wa Mpumulo ghaki na tungulitutumula kwaikiva tukongine na Yesu. Kangi tunguvika ng'ogha litumaini kumighalu gha kihigha, 4 Ila paikawela kuwela na mundu kanguilola yiwa kana matendu gha kutumainila mhigha, nenga niwela na matangala nesu gha kutumainila kupiti mweni. 5 Nenga niyingisilwi jandu lichuwa lya inane, nenga ni mundu wa Izilaeli wa likabila lya Benjamini, nenga ni Mwibulania wa kuwelekwa. Kwa mighalu gha laghilo ni niwelile Mfalisayo, 6 niyangalalili nesu kughola mighalu hila ningulola Sapanga anguipala, hata nikalihakila lipinga lya wandu weni kumkwinila Kilisito. Nigholile kila kindu kiwelile kikipalwa na laghilo ili kujumilwa na Sapanga, nenga niwela ng'ogha na uhakata. 7 Lipindi liteni mighalu hai niilolile yiwa ni ghamaha nesu kwa nenga, ila hinaa kwaikiva gha Kilisito ninguilola yiwa ghamaha ng'ogha kwa nenga. 8 kangi ng'ogha hagha weka, ila ningulola yiwa kila kindu kya maha ng'ogha, kwaikiva gha umaheli wa kummanya Kilisito Yesu Bambu wa nenga, kwaikiva gha mweni kutaghilila kutali kila kindu, nikalola hagha hyogha ni ndaka, ili nimpati Kilisito. 9 Hilahila nikonganiswa nayu, nileka kujumilwa kuulongolo gha Sapanga kwa kupitila laghilo apeghilwi Musa. Sapanga kanijumila nenga kwaikiva gha kumkwinila Kilisito. 10 Ningupala kummanya Kilisito na uwesa wa kuhinduka kwaki na kukonganika kumahakilo ghaki na kuwela handa mweni kukihu kyaki, 11 nikiwela na litumaini yiwa na nenga nitehinduliwa hilahila.

12 Ningulonga ng'ogha yiwa nihika kala mahala haku kungalilu ghangu. Nitimila ng'ogha kuwela handa vila Sapanga anguipala niweli. Ila ninguyangala kuhikila mahala haku. Hali luwelili lukani lwa Kilisito kuhuma pala anihaghulile. 13 Walongu ghangu, ninguliwachila ng'ogha yiwa nipata kala hupo hai. Ila ningughola mghalu mmonga. Ninguisemwa mighalu hila gha dahile, nikiyangala kuyayendela lula lukani. 14 Hinu, ninguyangala kuhikila lukani lya nenga ili kumwihu mbati hila hupo, na hupo yeni ni kukemwa na Sapanga haku kundumba kwa njila gha Kilisito Yesu.

15 Twenga wogha weni kukamala kukukwinila tungupalwa kuwachila mghalu hauhau. Ila handa wamonga wa mwemga wanguwachila mghalu mghangi, hinu Sapanga ateuvika paluagha mghalu hau. 16 Ila tungupalwa kuyendelela kuikovekela chakaka tuwelanayu kala.

17 Walongu ghangu, mkovekeli mlandano wa nenga na kuwalola wala weni kukovekela ndyangilu tuwalangisili. 18 Nilongela kala mghalu hau mianja itangala, na hinaa ninguhuyila kulongela kunu nikilila. Wandu watangala wangungingama mavulo gha Yesu kuhova kulipingika. 19 Mwihu wa weni ni kuyalamila, kwaikiva wanguyupa kila wangukihakula, wangulitutumula kwa kughola mighalu yeni kuwapughanisa na mawachilo ghao wanguwachila mighalu gha mlima wogha hau. 20 Twenga twa wenikaya wa kundumba, kuhuma haku kundumba tungumtumainila mlokola wa twenga Bambu Yesu Kilisito ahiki kuhuma kundumba. 21 Mweni ateghalambusa mihigha gha twenga gha kuhakala na kuighola ilandine na higha ghaki yeni ukulu, kwa uwesa hula weni kuwesesa vindu vyogha vilongoswi na mweni.