1 Nenga Paulo na Timoseo, watumikila wa Yesu Kilisito,

tunguwayandikila mwenga wandu wa Sapanga haku kumlima wa Filipi weni kukonganiswa na Kilisito Yesu, pamonga na vilongosi na weni kuwatanga vilongosi pamonga na wakwinila.

2 Ningumyupa Sapanga umaha na kulikala kwa kuponga kuhuma kwa Sapanga Tati wa twenga, na kwa Bambu wa twenga Yesu Kilisito.

3 Kila paninguwakumbwike, ningumshukwile Sapanga. 4 Kumayupu ghangu machuwa hyogha niwelili nikiwayupila mwenga wogha kwa luheku, 5 hai ni kwaikiva gha kunitanga kutangasa Habali Maha kuhuma lichuwa lila lya mtumbulo mbaka hinaa. 6 Nenga ningumanya yiwa Sapanga ndiwa mweni kutumbulisa lihengu hali maha, ningumanya yiwa kanguwesa ng'ogha kusindwa kuyomola lihengu hali mpaka lichuwa lya kuhika Kilisito Yesu. 7 Ningupalwa kuwawachilila mwenga kwaikiva ninguwapala nesu, Sapanga katuwesesa kughola lihengu lyaki pamonga, paikawela niwopwa mgelesa au ikiwela ningulongela wandu yiwa kwa kyani Habali maha ni ujumbi wa Sapanga. 8 Sapanga mweni angulola vila niwela na luhujulu lwa kuwalola mwenga. Ninguwapala mwenga wogha kwa upalo hula wa Kilisito Yesu.

9 Ninguyupa kwa Sapanga yiwa upalo wa mwenga uyendeleli kuyongeseka na muweli na luhala pamonga na malangu, 10 lukani mpati kumanya ghala gha maha mkaweli mngujumilwa kuulongolo gha Sapanga, wandu weni kuwela ng'ogha na mahakata mbaka lichuwa paatehika Yesu Kilisito. 11 Ngalilu gha mwenga imemi matendu matangala gha maha mpatili kwa Kilisito Yesu, ili mumpeghi Sapanga ukulu na kusifilwa.

12 Walongu wa nenga ningupala mmanyi yiwa mighalu hila inikolile ndiwa itangili kulandala kwa Habali Maha. 13 Watovangondo wogha wa kulighuta lya nkosi na wandu waghangi wogha wangumanya nivikwa mkihungu kwaikiva gha kughola lihengu lya Kilisito. 14 Hinu kukovekelana na hagha, kuwopwa kwa nenga kukawaghola wandu weni kummkwinila Bambu waweli na makakala nesu gha kutangasa Habali Maha bila holu.

15 Ingumanyika yiwa wandu waghangi wangutangasa ujumbi wa Kilisito kwaikiva wawela na wifu na kusindana, na waghangi wangutangasa Habali gha Kilisito kwa lukani maha, 16 amonga gha wandu hagha wangughola nagha kwa upalo wakimanya yiwa Sapanga kanipegha lihengu hali lya kuwalongela wandu yiwa Habali Maha ni ujumbi wa chakaka wa Sapanga. 17 amonga kwa mbandi ighangi wangutangasa Habali Maha kwa kusindana ili weni waweli wakolamlima wala ng'ogha kwa lukani maha, wanguwachila yiwa wangunivika mmaghaso kwa kunitaya nenga mkihungu.

18 Hata nagha, nenga ingunighasa ng'ogha, paikawela wangumtangasa Kilisito kwa njila gha uhakata au umaha. Ila nenga paikawela Kilisito angutangaswa ninguhekelela, 19 Kwaikiva ningumanya yiwa kwa mayupo gha mwenga na kwa mtanga hula weni kuyeghwa na Mpumulo wa Yesu Kilisito, ghala yanikolile nenga yateghalambuswa na hinu nitelekeselwa. 20 Nimemwa na litumaini yiwa kwahela mighalu yenikunighola niweli na holu kwa njila yeyosi hila. Niwela na uhighilisu niteyendelela kuwela na makakala gha kutangasa Habali Maha kwa upekesu handa vila niwela. Na Kilisito atesifilwa kwa havi ningughola kumhigha ghangu, iweli nitelama au kuhwegha. 21 Kwa nenga, ngalilu ghangu hyogha ni kumgholela lihengu Kilisito, na kuhwegha ni maha kupiti kuyendelela kulama. 22 Handa niteyendelela kulama haku kumlima wogha niteyendelela kumgholela mahengu Bambu. Ila paghati gha kuhova na kulama, manya ng'ogha niki nihaghuli. 23 Ningukweghwa na mighalu miivili, ningupala kuyenda nikalikali pamonga na Kilisito, kwaikiva havi ni maheli nesu. 24 Ila ni maha nesu kwaikiva gha mwenga nenga niyendelela kulama. 25 Ila ningumanya yiwa mwenga wogha mngupala niyendeleli kuwela na mwenga, nenga ningumanya yiwa niteyendelela kulama na niteyendelela kulikala na mwenga ili niwatangi mwenga muyendeleli kukula na kuhekelelela kukukwinila muwela naku, 26 ili panitewela pamonga na mwenga kangi, mtewela na mghalu wa kuitutumulila kwa ghala Yesu Kilisito kayaghola kupitila nenga.

27 Hinu ndyangilu gha mwenga, na iweli handa ingupala Habali Maha gha Kilisito, ili panitehika au nihiki ng'ogha. Nihyoghanili yiwa mgholoka maha kumpumulo mmonga na moyu mmonga. Ili kuwatanga waghangi wakwinili Habali Maha gha Kilisito, 28 mkotoho kuwatila wala weni kuwangingama. Kukotoho kutila kwa mwenga na kugholoka kukukwinila ndiwa kilangihi kya kuyalamika kwa weni, ila mwenga mtelokolwa, na hali ni lihengu lya Sapanga. 29 Sapanga kawapegha mwenga umaha wa kumtumikila Kilisito, ng'ogha kwa kumkwinila hela, ila hilahila kwa kuhakilwa kwaikiva gha mweni. 30 Mngukonganika pamonga na nenga kungondu, hilahila muilolile nikiwela nayu, hata hinaa ningukimbanika.