1 Hinu mwenga wana, muwayitikili walela wa mwenga kwaikiva mngumkwinila Bambu, na hau ni mghalu wa maha. 2 Laghilo lya Sapanga lingulonga, "Watundamili tati ghako na nyongo ghako." Hali ndiwa laghilo lya mtumbula lyeni lilaghanu, 3 "Ili uighilwi na kulama machuwa matangala kumlimawogha."

4 Mwenga akina tati, mkotoho kuwahyomelesa wana wa mwenga, ila muwaleli kumavulo na makaniso ghaki Bambu Yesu.

5 Mwenga wahusutu, muwayitikili wabambu wa mwenga haku kumlimawogha kwa holu na utundamilu, na mgholi nagha kwa moyu wogha handa mngumtumikila Kilisito, 6 mgholi nagha, ng'ogha kwa lipindi lila wanguwalola ili wapati kuwasifila, bali mtumikili kwa moyu mkighola ghala anguyapala Sapanga. 7 Mgholi mahengu kwa moyu wogha, handa mngumgholela Bambu na ng'ogha wandu, 8 mkikubwiki yiwa Bambu atemhipa kila mundu kukovekelana na matendu ghaki maheli, aweli mpekesu au muhusutu.

9 Mwenga mabambu, muwagholeli mighalu maheli wahusutu wa mwenga, na mleki kutumila vitisu, kunu mkimanya yiwa mwenga na wahusutu wa mwenga muwela na Bambu mmonga mwenikulikala kundumba, na mweni kahela ubaghula.

10 Kumwihu, ningupala kulonga nagha, mlikongani na Bambu, na makakala ghaki yatewatanga. 11 Mvwali hindu hyogha gha kutovanila mpeghwa na Sapanga, ili muwesi kusinda ukalamuki wa Lihyukana, 12 mgholi nagha kwaikiva tungutovana ng'ogha na wandu, bali tungulitova na vilongosi wa mahoka na mahoka yeni makakala yeni kulongosa kunani gha umlimawogha hau wenikuwela mlwisa. Na tungutovana na mahoka yenikuwela mahala wekaweka kunani. 13 Hinu walongu ghangu mvwali hindu hyogha gha kutovanila mpeghwa na Sapanga, ili lichuwa lihakata palihika, muwesi kusinda na pamyomola ngondu muyendeleli kugholoka kwa ugangamalu.

14 Hinu mliyandali, uchakaka ukaweli handa mhungi mkibulibulilo, na kughola yeni kujumilwa na Sapanga kukaweli handa nguu gha lyuma kulikinga mkitivi, 15 na luhujulu lwa kutangasa Habali Maha gha kulama kwa kuponga kuweli handa hilatu mmaghulu gha mwenga. 16 Na kukwinila kwa mwenga machuwa hyogha kuweli handa vila mngukola mapangalala, ili mpati kungingama migoha gha lyoto gha yula mhakata. 17 Mupokeli ulokola handa likokoma lya lyuma lyeni kuwagholokela, na Lilando lya Sapanga handa lipanga mpeghwa na Mpumulo wa Sapanga, 18 Muweli mkiyupa lipindi lyogha kwa mayupo yoyosi handa Mpumulo wa Sapanga vila anguwalongosa, mlikali mihu kwa mghalu hau lipindi lyogha na motoho kutoka kuwayupila waandu wa Sapanga, 19 mniyupili na nenga hilahila, lukani Sapanga anipeghi milando gha kulongela, niwesi kutangasa kifisu kya Habali Maha bila holu, 20 nenga ni mjumbi wa Habali Maha gha Yesu Kilisito, na hali lihengu ndiwa lyeni kunighola niwopwi. Hinu mniyupili ili nipati kuwela na makakala kutangasa vila ingupalwa.

21 Mlongo na mpalwa wa twenga Tikiko, mweni kughola mahengu gha Sapanga kwa umaheli, atewapegha habali zyangu zyogha mpati kumanya ghala ninguyaghola, 22 ningumyegha kwa mwenga, ili awalongeli habali zya twenga na mwenga mpati kutaywa moyu.

23 Ninguwayupila kwa Sapanga Tati wa twenga, na Yesu Kilisito awapeghi wakwinila wogha kulikala kwa kuponga na kupalana pamonga na kukwinila. 24 Ningumyupa Sapanga aweli mmaha nesu kwa mwenga kwa kila mmonga mweni kuyendelela kumpala yesu Kilisito.