1 Mwenga muwelili handa muhova kwaikiva gha mahakata na sambi msighola. 2 Lipindi lila muwelili mngukovekela mighalu mihakata gha mlima wogha hau, muwelili mungumuyitikila Lihyukana, yula mwenikuwela mkulu wa kunani yula mwenikughola lihengu na wala weni kumyitikila ng'ogha Sapanga. 3 Haku dahile twenga wogha tumyitikila ng'ogha Sapanga handa weni vila wangughola. Tulamili kwa lumatamata vila mihigha na malangu ingupala kughola, hinu twenga handa weni tupalilwi kunyokolwa na Sapanga.

4 Ila Sapanga kana luhungu nesu, na angutupala nesu, 5 hata pala patuwela handa tuhova kwaikiva gha sambi tusighola, akatughola tuweli wakomu pamonga na Kilisito, kwa umaha wa Sapanga twenga tulokolwa. 6 Hinu kwa kukonganiswa na Kilisito Yesu, Sapanga atuhindulili pamonga na mweni, tukalongosi pamonga na mweni kundumba. 7 Ndiwa aipalili kulangiha kwa wandu wa lipindi lya kuulongolo ukulu wa umaha ghaki, atupeghili kwa upalo kumkonganiko wa twenga na Kilisito Yesu. 8 Hinu kwaikiva mlokolwa kwa umaha wa Sapanga, kwa njila gha kukwinila, ng'ogha kwa matendu maheli mghola. Ulokola hau ni hupo kuhuma kwa Sapanga. 9 Kawalokola ng'ogha kukovekelana na matendu maheli mghola, hinu mundu yoyosi akotoho kulitutumula. 10 Twenga twa viumbi ghaki Sapanga, na kwa kukongine na Kilisito Yesu, katulumba ili tulami kundyangilu gha matendu maheli atuyandalilile tulami.

11 Mwenga muwelekwa ng'ogha mkiwela Wayahudi. Mwenga mngukemwa, "Wandu muyingiswa ng'ogha jandu," na Wayahudi weni wangulikema, "Wenikuyingiswa jandu," kuyingiswa jandu kwa weni ni kula kweni kungugholwa kwa mawoko gha wandu. 12 Hinu lipindi lya dahile mwenga muwelili mummanya ng'ogha Kilisito, muwelili mbaghulwa na wandu wa Izilaeli, muwelili wahenja na muwela ng'ogha malaghano alongilile Sapanga kwa wandu ghaki. Muwelili ng'ogha na litumaini na mummanyile ng'ogha Sapanga. 13 Ila hinaa, kwa kukonganiswa na Kilisito Yesu, mwenga weni kuwela kutali haku mtumbulo muwela pabehi kwa kupitila kihu kyaki Yesu Kilisito kulipingika, 14 kwaikiva mweni ndiwa kulikala kwa kuponga kwa twenga kwa kuwaghola Wayahudi na wandu wawela ng'ogha Wayahudi kuwela wamonga. Kwamhigha ghaki mweni abongonyokili lila likuta liwalekesenili na kuwaghola wahyomilani. 15 Kilisito paahovili kulipingika kahumisa makakala gha malaghilo apeghilwi Musa, ili kupitila hagha mapinga maivili waweli kindu kimonga kihyonu kwa kukonganika na mweni Yesu, hinu katuyeghela kulikala kwa kuponga na mweni . 16 Kwa njila gha kuhova ahumisili ngondo gha Wayahudi na wala wawela Wayahudi ng'ogha na kuwavika kulipingika limonga. Kangi kawakonganisa kwa Sapanga. 17 Hinu Kilisito, ahikile na kutangasa Habali Maha gha kuponga kwa mwenga wandu muwela ng'ogha Wayahudi, wenikuwela kutali na Sapanga na hilahila kwa Wayahudi wenikuwela pabehi na Sapanga. 18 Hinu kwa kupitila Kilisito, twenga wogha Wayahudi na wandu Wayahudi ng'ogha, tunguwesa kumyendelela Tati kwa kupitila Mpumulo mmonga hayuhayu.

19 Hinu, mwenga mwa ng'ogha wahenja kangi, wala wandu wa panji ila muwela wenikaya pamonga na wandu wa Sapanga. Mwenga ni weni kaya ukaya kwa Sapanga. 20 Mwenga mchengwa kumavulo gha wandumindumi na walota, handa lighuta lyeni kuchengwa kunani gha kitamilo, na Yesu Kilisito akiwela handa mghomba wa hali lighuta. 21 Hayu Kilisito ndiwa mweni kulikonganisa lighuta lyogha na kulighola likuli hata likawela lighuta lya Sapanga. 22 Kukukongana na Kilisito mwenga mnguchengwa pamonga na waghangi muweli ili Sapanga alami mghati gha mwenga, kupitila Mpumulo ghaki.