1 Nenga Paulo, mndumindumi wa kilisito Yesu, handa vila apalili mweni Sapanga,

ninguwayandikila hali lihamba mwenga wenikujumilwa na Sapanga kwa kukongana na Kilisito Yesu haku Efesu.

2 Ninguwayupila kwa Sapanga Tati wa twenga na Yesu Kilisito Bambu wa twenga awapeghi umaha na mlikali kwa kuponga.

3 Asifilwi Sapanga na Tati wa Bambu wa twenga Yesu Kilisito! Mweni ndiwa katupegha highili zya kumpumulo zyeni kuhuma kundumba kwa kukonganika na hayu Kilisito. 4 Hinu pambila gha kulumbwa mlima wogha, Sapanga atuhaghulile tuweli wandu ghaki kukukongana na Kilisito ili tuweli wandu ghaki,

kwaikiva gha upalo ghaki. 5 Sapanga avikili lukani kuhuma dahile kutuhaghula tuweli wana ghaki kwa njila gha Yesu Kilisito. Agholile nagha kukovekelana na kutupala twenga. 6 Kwa nagha tungumshukwile Sapanga kwa umaha ghaki wa kukangasa, hula katupegha bila mahipo kwa njila gha umaha wa Mwana ghaki mpalwa. 7 Kwa kuhova kwaki hayu Mwana, twenga tukapokela ukombola ingumaanisa tulekeselwa sambi handa vila uwela utangala umaha ghaki. 8 Sapanga kaghola nagha ili kutulangiha yiwa

kana luhala vilavila angumanya yala tunguyapala, 9 Sapanga agholile mighalu ghaki aihighili, mghalu hula avikili lukani yiwa ateughola kupitila Kilisito. 10 Hagha yategholeka lipindi lila alivikili Sapanga palihika, ni kukungula hindu hyogha gha kundumba na kumlimawogha.

11 Vindu vyogha vingugholeka kukovekalana na vila Sapanga kaghola na kulamula, na Sapanga katuhaghula tuweli wandu ghaki kukukongana na Kilisito handa aipalile na alamulile nagha kuhuma dahile. 12 Hinu, twenga weni kulongola kumtumainila Kilisito, tungupalwa tumsifili Sapanga kwaikiva gha ukulu ghaki.

13 Mwenga hilahila kupitila hayu, mhyughanila kala lilando lya uchakaka, Habali Maha yeni kuwayeghela ulokola, na mkamkwinila Kilisito. Na mweni Sapanga ili kulangiha yiwa mwenga ni wandu ghaki akavika kilangihi, kwa kuwapegha Mpumulo ghaki handa awalongilile yiwa atewapegha. 14 Hayu Mpumulo kawela handa poni kulangiha yiwa Sapanga atewapegha wandu ghaki kila alongilile na mghalu hau ungutuhighilisila yiwa Sapanga atewakombola wandu ghaki. Tumsifili Sapanga kwa ukulu ghaki.

15 Hinu kuhuma nihyoghanila vila mungumkwinila Bambu Yesu, na mapalo gha mwenga kwa wandu wogha wa Sapanga, 16 ningumshukwile Sapanga kwaikiva gha mwenga. Kila paninguyupa ninguwaisemwa ng'ogha, 17 ili Sapanga wa Bambu wa twenga Yesu Kilisito, Tati awelili mkulu, awapeghi mwenga Mpumulo wa luhala na gha ugubutulo kukummanya mweni. 18 Kangi ningumluwa Sapanga agubutuli mioyu gha mwenga, ili mpati kumanya lila litumaini mkemilwa na unaisa mkulu wa hupo awavikilile wandu ghaki, 19 mpati kumanya vila uwesu ghaki uwela mkulu nesu kwa twenga weni kumkwinila. Uweso hau weni kughola mahengu mghati gha twenga nimakulu nesu, 20 makakala ghala yawoneka pala Sapanga paamuhindulile Kilisito, akamtamisa mbandi ghaki gha kuliyila kundumba. 21 Haku, Kilisito angulongosa kila nkosi na vilongosi waghangi. Angulongosa kila kindu kyeni kulongosa, ni mkulu kupiti makakala yeyosi wanguyatundamila wandu. Angulongosa vilongosi wa mlima wogha hau wa hinaa na wandu wala wa mlima wogha hula utehika. 22 Sapanga kaghola vindu vyogha vilongoswi na mweni, na kamghola mweni aweli mutu wa lipinga lyeni kumkwinila Kilisito, 23 lipinga lya weni kumkwinila Kilisito ni mhigha wa Kilisito na kangi lipinga lya weni kumkwinila ni utimila ghaki Kilisito, mweni ni handa mutu wa hali lipinga kangi ndiwa mweni kughola mighalu hyogha.