1 Hinu, nenga niwela muuwopwa kwaikiva ningumtumikila Bambu, ninguwalongela mlami vila ingupalwa mlami kukovekelana na Sapanga kawakema. 2 Walongu ghangu, mnyenyekelane na kuwela wanyalinyali na wafumilifu lipindi lyogha, kunu mkilekeselana kwa upalu, 3 myangali kugholokela umonga weni kuyeghwa na Mpumulo wa Sapanga kwa kulama pamonga kwa kuponga. 4 Twenga wogha tuwela handa mhigha mmonga, kangi tuwela na Mpumulo wa Sapanga mmonga. Hinu, Sapanga atukemili na kutuvikila litumaini limonga lya kukemwa kwa twenga. 5 Kangi kuwela na Bambu mmonga, na kukwinila kumonga, na ubatisu mmonga, 6 Sapanga mmonga na mwenikuwela Tati wa wogha na mweni kulongosa hindu hyogha na angughola lihengu kupitila wandu wogha na kamghati mwa wandu wogha.

7 Kila mundu paghati gha twenga apeghilwi hupo gha kimpumulo kwa vila apalili mweni Kilisito. 8 Handa vila Mayandiko gha Sapanga yayandikilwi,

"Paayendili kunani nesu,

akatola watumikila wa kundumba wa Sapanga, akatola wawopwa wa mngondu,

na akawapegha wandu hupo." 9 Hinu, pailongwa, "Ayendili kunani nesu," ingumanisa niki? Ingumaanisa nagha, ahulukili pahi nesu kumlimawogha. 10 Hinu, ikiwela hayu hayu ahulukili pahi nesu, ndiwa hayu hayu ayendili kundumba ili aweli kila mahala kumlimawogha. 11 Mweni ndiwa awapeghili wandu hupo wekaweka, waghangi, awagholile waweli wankosi, na ghangi waweli walota, na waghangi wawelili watangasa lilando lya Sapanga, na waghangi waweli wahungaji na wavula. 12 Hinu, agholili nagha lukani wawatangi wandu wa Sapanga kughola lihengu lyaki, ili wandu weni kumkwinila Kilisito waweli wagangamala handa mhigha wa Kilisito, ingumanisa lipinga lya wandu weni kumkwinila Kilisito. 13 Mghalu hau uteyendelela mbaka twenga wogha tutewela kuukwinila mmonga na kukummanya mwana wa Sapanga. Tutewela wandu tukamala na tutetimila handa Kilisito vila mweni kawela. 14 Ndiwa tutewela ng'ogha handa wana wanung'una, wenikuwesa kutolwa haku na haku na kukweghwa na kila liyegha lya mavulo gha wandu weni kukalamuka weni kuwabyodosa waghangi. 15 Hinu patulongelana uchakaka kwa upalu, tutewela ng'ogha wanung'una kangi ila tutekamala kwa kila mghalu tukilandana na Kilisito mweni kuwela kilongosi. 16 Kuulongosi ghaki, vikongonu vyogha vya higha vingukolana pamonga, na higha hyogha ingukamala kwa kutangana vikongonu vyogha. Hinu, kila kikongonu pakiteghola lihengu vila ingupalwa, mhigha wogha ukula na kuichenga ku upalo.

17 Hinu, ninguwalongela nagha, na kuwakanisa nikiwela na Bambu, yiwa mkotoho kulikala kangi handa wandu wamkwinila ng'ogha Sapanga, weni kuwela mawachilo ghao yamema usihisihi, 18 na malangu ghao yawela mulwisa. Wawela kutali na ukomu wa Sapanga kwaikiva gha undyungi uwela mghati gha weni na kinyengu wawela nachu, 19 Wandu hagha wawela ng'ogha na honi, lipindi wangughola mahakata na wanguyendelela kughola mighalu mihakata kwaikiva gha kuihekelesa weni.

20 Lipindi mngulivula habali zya Kilisito mlivula ng'ogha mighalu mihakata. 21 Handa ndiwa iwela, mwenga mumhyoghanila kangi mvulwa na mweni, vila chakaka iwela ku Kilisito Yesu. 22 Hinu mwenga mngupalwa kulikala kutali na hila ndyangilu muwelile nayu haku dahile yeni kuwayalamisa na lumatamata lweni kungonga, 23 ili mgholwi wahyonu kumioyu na kumawachilo, 24 Kila mmonga wa mwenga aweli na ngalilu hyonu handa vila Sapanga kawalumba mlandani na mweni, mkighola mighalu yeni kumhekelesa Sapanga bila mahakata.

25 Hinu, walongu wa nenga muleki kulongela uhwangi, kila mundu kangupalwa kumlongela muyaki uchakaka, kwaikiva kila mmonga wa twenga ni vikongonu vya mhigha mmonga. 26 Hinu pamhyoma, mkotoho kuleka lilaka lya mwenga liwagholi mgholi sambi, na mleki kulikala na lilaka lichuwa lyogha, 27 wala kumpegha Lihyukana fwasi gha kuwasinda. 28 Na mundu yula awelili mwihi, aleki kuhuyila kangi wihi, ila agholi lihengu lyaki kwa kuyangala, na aweli na kindu kya kuwapegha wandu kapuku. 29 Mkotoho kulongela milando mihakata, lipindi lyogha mlongeli milando gha maheli yeni kuwachenga waghangi ili yawatangi wala wenikuyoghanila. 30 Mkotoho kumnyengemalisa Mpumulo wa Sapanga, kwaikiva Mpumulo hayu ni kilangihi kya Sapanga kwa mwenga kyeni kulangiha yiwa mwenga ni wandu ghaki, mbaka lichuwa lila Sapanga atewalokola. 31 Hinu, mleki magombi na kuhyoma na lilaka na kukalipa na malighu mleki kughola uhakata wowosi weni kuwesa kuwahakila waghangi. 32 Hinu muweli na luhungu na muweli na moyu wa kulitanga, na kila mmonga na amlekeseli mahakata myaki handa vila Sapanga amlekesenili mwenga sambi kupitila Kilisito.