1 Hinu walongu ghangu, mlami kwa kukovekela mlandano ghaki Sapanga kwaikiva mwenga ni wana ghaki wapalwa. 2 Upalo ulongosi ngalilu gha mwenga handa vila Kilisito atupalile twenga, kwa kulighola mweni aweli litambiko lya kulungusa lyeni manungilo maheli na lyeni kumhekelesa Sapanga.

3 Mwenga ni wandu wa Sapanga, hinu ngongola, ndaka yeyosi au uwimi vikotoho kulongelwa katu kwa mwenga, 4 kangi mkotoho kulongela milando gha honi, usihisihi au kubisana, hagha hyogha ghamaha ng'ogha kwa mwenga, milando gha kumshukwile Sapanga ndiwa maheli kwa mwenga. 5 Mmanyi yiwa mundu yeyosi mwenikuwela mghola ndaka au mhakata au mwimi, kwaikiva hai ni ndambu ghangi gha kuyupa ling'omung'omu. Mundu yeyosi wa ndambu hai atepata ng'ogha chochosi kuunkosi wa Kilisito na wa Sapanga.

6 Mkotoho kungongwa na milando gha kubyodosa, kwaikiva Sapanga atewanyokola wandu wogha weni kumyitikila ng'ogha. 7 Hinu walongu ghangu mkotoho kulikongana na weni. 8 Haku dahile mwenga muwelili mlwisa, ila hinaa mwenga muwela kumhana kwa kukonga na Bambu. Hinu mlikali handa wana wa kumhana. 9 Wandu weni kulama kumhana wangughola mighalu gha maheli na gha maha na gha chakaka lipindi lyogha. 10 Mwenga myangali kumanya ghala yeni kumhekelesa Bambu. 11 Mkotoho kughola mighalu gha maha ng'ogha, ila muwalongeli wandu yiwa mighalu hai ghamaha ng'ogha. 12 Mighalu yenikugholwa kukifisu na wandu wahakata ni honi hata kuilongela. 13 Ila mhana ungulangiha lipali yiwa mighalu hai, yiwa ghamaha ng'ogha. 14 kwaikiva kila kindu kinguvikwa paluagha na mhana. Ndiwa kwaikiva tungulongela,

"Uyimuki wenga mweni kuwonja!

Uhinduki,

na mhana wa Kilisito utewela kwa wenga."

15 Hinu, mtami mihu vila mngulama. Mkotoho kulama handa wandyungi, ila handa wandu weni luhala. 16 Mtumili maheli lipindi hali muwela nalu kwaikiva machuwa hagha ni machuwa gha uhakata, 17 kangi mkotoho kuwela wandyungi, ila myesi kumanya ghala yangupalwa na Sapanga.

18 Mleki kulowela uyimbi kwaikiva hai itewayalamisa, ila mmemeswi Mpumulo wa Sapanga. 19 Myimbilane mwenga kwa mwenga, mkiyimbilana uyimbu gha kumpumulo, mkimyimbila na kumsifila Bambu kumioyu gha mwenga. 20 Mumshukwile Sapanga Tati machuwa hyogha kwa ghala hyogha agholile, kwa lihina lya Bambu Yesu Kilisito.

21 Kila mundu amyitikili myaki kwaikiva gha kumtundamila Kilisito.

22 Mwenga wahumbu, muwayitikili wangwana wa mwenga handa vila mungumyitikila Bambu wa mwenga Yesu Kilisito, 23 kwaikiva mngwana ni kilongosi wa mhumbu ghaki, handa Kilisito vila kawela kilongosi wa lipinga lyeni kumkwinila. Kangi Kilisito ni mlokola wa lipinga lya weni kumkwinila, hinu ni handa mhigha ghaki. 24 Hinu handa vila wakwinila wangumyitikila Kilisito, hilahila na wahumbu wawayitikili wangwana ghao kukila mghalu.

25 Mwenga wangwana, muwapali wahumbu wa mwenga handa vila agholili Kilisito paalipalili lipinga lyeni kumkwinila, akajihumisa ahweghi kwaikiva gha lipinga hali. 26 Agholile nagha ili kwa lilando lyaki atughululi na kuwela wandu wa Sapanga, na agholile na badili gha kutuwofula kwa masi, 27 apalile kulipatila lipinga lyeni kujumilwa kuulongolo gha Sapanga na lyeni kuwela ng'ogha na uhakata, ndaka au chochosi kyeni kulandana na mahakata. 28 Hilahila wangwana wangupalwa wawapali wahumbu ghao handa mihigha ghao weni, kwaikiva mngwana mweni kumpala mhumbu ghaki angulipala mweni, 29 kwahela mundu mweni kulema mhigha ghaki, ila kuupegha mulyo na kuuvwalisa. Ndiwa handa Kilisito angulilela lipinga. 30 Kwaikiva twenga ni vikongonu vya mhigha ghaki. 31 Hinu handa yala mayandiko yangulongela, "Kwaikiva gha nagha, mlumi atemleka tati ghaki na nyongo ghaki, atekonganika na mhumbu ghaki na hagha waivili watewela mhigha mmonga." 32 Kuwela na uchakaka weni kulihigha kumilando hai, ila nenga ningulola yiwa hagha yangumlongelela Kilisito na lipinga lyaki lyeni kumkwinila. 33 Ila kila mmonga wa mwenga angupalwa kumpala mhumbu handa vila anguipala mweni. Na mhumbu angupalwa kumyitikila mngwana ghaki.