Atos 16

Want’hu waidi wakakigwa mwe difingo

25 Mna mwe kilogati, Paulo na Sila wandaga wakakema mila ya kumlombeza Mnungu, wadya wavugailwa weyawe nawo wandaga wakawategeleza. 26 Aaho niyo halaila kisingisa, chasingisaga milango ye divugailo niyo yakomoka, zimp’hingu nazo wakakilizilwe wadya wavugailwa zatohokaga. 27 Mwamizi ywe divugailo enukaga, eze aone zinyivi ze divugailo zikomoka, naakagamba wavugailwa wanyilika. Ivo niyo asomola digola dyakwe akaunga akekome. 28 Mna Paulo niyo agutila kwa izwi kulu, "Usekukekoma! Suwe chose kiaha!"

29 Mwamizi alagizaga lumuli no kugulukila kundani, uku akazingiza he viga va Paulo na Sila. 30 Niyo awalongoza kuse nokuwauza, "Nyuwe wakulu, nitende vivihi niyokolwe?"

31 Niyo wamhitula, "Mhuwile Zumbe Yesu, nouyokolwe weye na want’hu mwe mp’huga yako." 32 Niyo wabilikiza mbuli ya Zumbe kwa yudya mwamizi na want’hu watuhu wose mwe inyumba yakwe. 33 Kukongela hadya, yudya mwamizi awaguhaga Paulo na Sila no kusunt’ha zinkwenge zawe, aaho niyo yehe hamwenga na wanawe wabatizwa. 34 Niyo awaguha Paulo na Sila kwe kaya yakwe no kuwenk’ha nk’hande. Yehe na wanawe wose wandaga na kinyemi kikulu kwaviya haluse nawaka mhuwila Mnungu.