1 Nyuwe want'hu wa Izilaeli tegelezeni ulosi wa Zumbe Mnungu uwo nalongaga na nyuwe umwo nawalavaga mwe isi ya Misili. 2 "Ni miye du niwasagule mwa want'hu wa si yose, kwaivo neniwasengele nyuwe kwa uwihi wenyu wose muudamanye."

3 Togola want'hu waidi wagenda hamwenga haheina kuzumilana?

4 Togola simba yadaha kubuma mwe mbago haheina kongola? hegu simba ndodo yadaha kubuma mwe mp'hanga haheina kupata kint'hu?

5 Togola dege dyadaha kutozwa mwo mtego haheina kint'hu?

Hegu wadaha kufyuka haheina kukwafigwa?

6 Togoleni want'hu hawakogoha magunda ya nk'hondo yakatoigwa mwo mzi?

Togoleni mzi ukapata makunt'ho ni Zumbe Mnungu atendile?

7 Kindedi Zumbe Mnungu haadamanye chochose haheina kuwagubuila kinyele wandima wakwe walotezi.

8 Simba ikabuma, niani haagohe?

Zumbe Mnungu anagamba niani naalemele kubwelekeza ulosi wakwe?

9 Bwelekezeni kwa want'hu wakwikala mwe nyumba ya seuta wa Ashidodi na nyumba ya seuta wa Misili, mkagambe ivi, "Mdugane mwe milima ya Samalia naho mkaule nk'humbizi na want'hu wakuhujilwa mwe isi ya Misili."

10 Zumbe Mnungu agamba ivi, "Want'hu awa hawamanyize kudamanya yedi, woho wakememezela vint'hu vo ubavi mwe zinyumba zawe. 11 Wank'hondo nawaizunguluke isi yawe na kuyagwesa hasi magomela yenyu na kutaha vint'hu vedi mwe zinyumba zenyu."

12 Zumbe Mnungu agamba ivi, "Enga viya mdimi akuyokola mwo mnomo wa simba vihande viidi du va mavuha ya kiga, hegu kihande cha gutwi, ivo nivo Waizilaeli nawayokolwe, wadya wakwikala Samalia mnk'handa mwe zisazi zawe na vigonelo vidamanywe kwa suke zingaile. 13 Zumbe Mnungu mta udahi wose agamba ivi, tegelezeni aya na mwite mkawakanye welekwa wa Yakobo," 14 "Mwe mazuwa neniwasengele Waizilaeli kwaviya yo wavu wawe, nenizibanange pele vilingo va Beteli. nenizikant'he zimp'hembe za kila kilingo na kuzigwesa. 15 Nenizimole zinyumba zose mwo msimu wa mp'heho na zinyumba zoze mwo msimu wa zuwa, iviyaiviya nenizimole nyumba zawe zihambigwe kwa mp'hembe za ndovu na mazumba makulu yedi."