1 Namuonaga Zumbe Mnugu kakimala hank'handa ye kilingo, na yehe niyo alava sigilizi, "Towa kulanga ye mikola ye Nyumba ya Mnungu mpaka nk'hongelo zakwe zisingisike, naho igwese mikola iyo iwagweele want'hu mwe mitwi, na wadya nawasigale neniwakome, hehali hata yumwenga ywawe naahone. 2 Hata wakakesimbila sila mpaka kwe isi ya wabanike, uko neniwalave kwa mkono wangu, umwo wakakwela kwe mbingu neniwaseleze hasi. 3 Umwo wakeza kukefisa mwo vinenengwa va Kameli uko neniwazungule na kuwaguha, naho wakeza kukefisa hasi ye bahali, umwo nenidisigiile zoka dya mwe bahali diwalume. 4 Umwo wakeza kutahigwa na wank'hondo wawe na kwigalwa kwe isi yo utumwa, uuko nenisigiile wakomigwe, neniwakaulise vitendese na neniwadamanyile yaihile naho hiyo yedi."

5 Zumbe Mnungu, Mnungu mta udahi wose, yehe akukwafya si nayo niyo yasingisika na wose wakwikala mndani mwake nawahongeze, na isi yose neikwele na kuseela enga mazi yakumema na kuhunguka mwo mto Naili

6 Zumbe Mnungu akuizenga nyumba yakwe ya kiseuta kwe mbingu,

isi kuigubika kwa ulanga,

na kuyetanga mazi ya bahali,

na kuyetila mazi mwe isi inyaile,

Zumbe Mnungu nidyo zina dyakwe!

7 Zumbe Mnungu agamba ivi, "Kwangu miye nyuwe Waizilaeli hamna mliganyizo wowose na want'hu wa Esiopia, miye nawalavaga Waizilaeli kulawa isi ya Misili na Wafilisiti kulawa Kafutoli na Waalamu kulawa Kili. 8 Miye Zumbe Mnungu nenikaule useuta una wavu, naho neniubanange pele kulawa mwe si, mna heniwabanange welekwa wose wa Yakobo.

9 "Kwaivo nenilave sigilizi na kuwaheta Waizilaeli mwe ziisi zint'huhu naho enga mnt'hu akuheta ulozo, hakuna hata mp'huluzi imwenga yedi neigwe hasi, na kuwatoza wose wata wavu. 10 Wata wavu mwa want'hu wangu nawakomwe kwe nk'hondo, awo nawo wakulonga, ‘Makunt'ho hayakipate hegu kukibwiila.’"

11 Zumbe Mnungu agamba ivi, "Zuwa dyeza umwo neniutende uhya useuta wa Daudi, naho nenizidamanye nk'handula zakwe, na kuyazenga uhya mank'hala yakwe, naho nenizenge uhya enga aho kale. 12 Akajika Waizilaeli nawawekaile want'hu wa mzi wa Edomu wasigale ne ziisi zose zisigale," Ni miye Zumbe Mnungu hulonga ayo.

13 Zumbe Mnungu agamba ivi, "Lupisi lweza,"

"Umwo ulozo nousunguze kwajika

na zabibu nezisunguze kwajika kujink'ha divai,

na divai imwile

na vigulu navyo nevilave divai.

14 Miye neniwavuze naho want'hu wangu kulawa kwo kutahigwa

nawaizenge naho mizi ibanangwe,

na woho nawekale umwo, nawahande zabibu na kunywa divai

na kulima migunda na kudya nk'hande izo wavunile.

15 Neniwatende want'hu wangu Waizilaeli wekale mwe mwe isi yawe wenye,

naho hawahauswe naho, kulawa mwe isi newenk'hile."

Ni miye Zumbe Mnungu hulonga ayo.