1 Ino niyo milosi ya Amosi, yumwenga mwa wadimi wo mzi wa Tekoa, Mnungu amgubuilaga maona mwa Izilaeli, miyaka miidi umwo isi hainati isingisike, Naho mwo lupisi ulwo Uzia uyo andile seuta wa Yuda na Yeloboamu mwana wa Yehoashi andaga seuta wa Izilaeli.

2 Amosi nakagamba ivi,

"Zumbe Mnungu atint'hila kulawa mwo mnima wa Sayuni,

naho atint'hila kulawa Yelusalemu.

hata madimilo ya wadimi yanyala,

mani ya mwo mnima Kalimeli yanyala."

3 Zumbe Mnungu agamba ivi, "Want'hu wa Damasiko wadamanya wavu nk'hana nyingi, naho henileke kuwasengela, nawawatendela want'hu wa Gileadi mbuli ziihile. 4 Ivo nenisigiile moto mwe nyumba ya seuta Hazaeli, na moto uwo nouwoke magomela ya seuta Ben Hadadi. 5 Zumbe Mnungu agamba ivi, neniiibanange nk'hili yo mzi wa Damasiko, nenimbanange seuta eli mwe dikolongo dya Aveni, uyo kilongozi mwa Beti Edeni. Want'hu wose wa Alamu nawaite mwe isi nt'huhu uko Kili enga watahigwa."

6 Zumbe Mnungu agamba ivi, "Want'hu wa Gaza wadamanya wavu nk'hanana nyingi, kwaivo henileke kuwasengela, nawawenula watahigwe mwe isi yose na kuwataga wande watumwa wawe kwa Waedomu. 7 Ivo neniigale moto mwe zink'handula zo mzi wa Gaza, na moto uwo nouwoke magomela yakwe. 8 Nenimkome seuta wa mzi wa Ashidodi na yudya akulongoza mwe Ashikiloni, neniwakump'hukile want'hu wa Ashidodi mpaka Wafilisiti wose wasigale nawakomigwe."

9 Zumbe Mnungu agamba ivi, "Want'hu wa Tilo wadamanya wavu nk'hanana nyingi, ivo henileke kuwasengela. Kwaviya wawaguhaga want'hu wa Izilaeli na kuwegala kwo utumwa uko Edomu, hawatimile lagano dyo umbuya idyo wadamanye. 10 Ivo neniigale moto mwe zink'handula za Tilo, na moto uwo nouwoke magomela yakwe."

11 Zumbe Mnungu agamba ivi, "Want'hu wa Edomu wadamanya wavu nk'hanana nyingi, kindedi neniwasengele, nawawaongola wandugu zawe Waizilaeli kwa sime haheina mbazi, naho hawalekile kuwakump'hukila naho na maya yawe niyo yanda ivo. 12 Ivo neniigale moto mwo mzi wa Temani, na moto uwo nouwoke magomela ya Bosila."

13 Zumbe Mnungu agamba ivi, "Want'hu wa Amoni wadamanya wavu nk'hanana nyingi, heniwaleke kuwasengela. Kwaviya umwo wakatoana nk'hondo kongezela ukulu we isi yawe nawawatumbula wavele wata inda mwe isi ya Gileadi. 14 Ivo neniigale moto mwe zink'handula zo mzi wa Laba, na kuwoka magomela yakwe. Mwe mazuwa ye nk'hondo nokunde na ndilo itendese na nk'hondo iyo neinde nk'hulu enga nk'hungunt'ho. 15 Miye Zumbe Mnungu nagamba ivi, seuta ywawe hamwenga na wandima wakwe wose nawaite kwikala ukwo wasamizilwe enga watumwa."