1 Zumbe Mnungu kanink'ha maona matuhu, naonaga nt'hangulu imemile matunda yaivile. 2 Zumbe Mnungu niyo aniuza, "Amosi waonai?"

Niyo namhitula, "Naona nt'hangulu ina matunda yaivile"

Niyo Zumbe Mnungu anigamba uheelo wa want'hu wangu wa Izilaeli ubula. Heniwaonele mbazi naho mwo uwihi wawe. 3 Zumbe Mnungu niyo agamba, mwe zuwa idyo, ukemi mwe nyumba ya Mnungu nouhituke kunda mahongezo. Vimba vingi neviduulwe kila hant'hu na want'hu nawanyamalise!

4 Tegelezeni nyuwe kuwatendela vihile wasokezi, na kuwahujila wakiwa mwe isi. 5 Mkakelongela mwo moyo kugamba, "Zuwa dya kinyemi dyo kufosa mnenge dyasila ini? Vileke kikonge kutaga ulozo wetu na Zuwa dyo Kuhumula kitage ingano yetu? nekihime na vihimo vyetu heviligane naho nekiwadant'he want'hu kwa vihimo va udant'hi, 6 naho mwataga ufele we ngano hamwenga na ngano yedi mkawagula wakiwa kwa matundu na kuwagula want'hu heweena kint'hu kwa kuwaliha makwapa."

7 Zumbe Mnungu agamba uneva nyuwe mwakegamba ni welekwa wa Yakobo, "Kindedi henijale mbwitu udamanyi wenyu wiihile. 8 Kwaivo isi neisingisike na kila mnt'hu naahongeze na isi yose neizembeduke, neikwele na kuseela neinde enga mazi yakumema na kuhunguka mwo mto Naili. 9 Mwe dizuwa idyo neniditende zuwa diseele nomsi na nomsi nokunde na ziza dititihale. 10 Fugo zenyu nenizihitule kunda mahongezo na kukema kwenyu kunde ukemi we ndilo, neniwatende nyuwe nyose mvale magunia na kumoga zifili zenyu, neniwatende mhongeze enga mnt'hu abanikilwe ni mwana ekedu. Na zuwa idyo nedinde dya usungu utendese."

11 Zumbe Mnungu agamba, "Mazuwa yeza ayo neniigale gumbo ditendese mwe isi, mna hiyo gumbo hegu ya nk'hande hegu nk'hilu ya mazi, mna ni gumbo dya kwiva mbuli yedi ya Zumbe Mnungu. 12 Want'hu nawaangadike kulawa bahali mpaka bahali nt'huhu, kulawa kasikazini kubula kwa ulailo wa zuwa, nawaguluke wakazungula mbuli ya Zumbe Mnungu, mna hawaupate. 13 Mwe mazuwa ayo wandele watana na wabwanga wata ludole nawabanike kwa kuona nk'hilu. 14 Wadya wakukelisa kwa mnungu wo udant'hi wa Samalia na kugamba ‘Kwa zina dya mnungu Dani’ na kwa zina dya mnungu wa Belisheba wose nawagwe naho hawenuke."