1 Aya nayo anilagise Zumbe Mnungu mwe maona, namuonaga Mnungu akaika lumwe mafyo ya mp'hasi umwo mwo kwajika kumkant'hila seuta mani na umwo vihandwa vikasuka. 2 Naonaga mp'hasi zikadya na zikabinda vihandwa vose va mwe isi, nehiila kwa izwi kulu nikagamba, "Weye Zumbe Mnungu ukionele mbazi suwe want'hu wako. Togola welekwa wa Yakobo wadaha ivihi kunda wagima? Kaula ivo weli wageke"

3 Aho Zumbe Mnungu etukaga niyo aleka kiya akuunga adamanye, niyo agamba, "Idi hedilaile naho."

4 Zumbe Mnungu anilagisaga maona matuhu, Zumbe Mnungu andaga akawitanga moto wa usengelo na moto uwo wanyazaga zinjoko zose na kuiyoka isi. 5 Naho agambaga, "Zumbe Mnungu nakulombeza kindila, togola want'hu wa Izilaeli wadaha ivihi kunda wagima? Kaula ivo weli wageke"

6 Aho Zumbe Mnungu etukaga niyo aleka kiya akuunga adamanye, niyo agamba, "Idi hedilaile naho."

7 Zumbe Mnungu anilagisaga maona matuhu, namuonaga Zumbe Mnungu kakimala hagihi na nk'handula katoza luzigi luna kint'hu cha kihimilo mwo mkono wakwe vileke ahime lukandula uneva luchuuluka. 8 Naye Zumbe Mnungu niyo aniuza, Togola, "Amosi waona mbwai?"

Niyo namhitula, "Naona luzigi luna kobilo"

Niyo Zumbe Mnungu agamba, "Kaula neniike luzigi luna kobilo mwa want'hu wangu wa Izilaeli, miye heniwaonele mbazi naho. 9 Uko kwe vigulu, welekwa wa Isaka wakuvikila milungu nokubanangwe, na kila hant'hu hakukile ha Izilaeli ha kuvikila nahabanangwe, Neniwakump'hukile wank'hondo wa welekwa wa Yeloboamu."

10 Niyo mlavant'hambiko Amazia wa mzi wa Beteli asigiilaga ulosi kwa Yeloboamu seuta ywa Izilaeli akagamba, "Amosi egala finju mwa Izilaeli, want'hu wakwikala umwo hawakudaha kugendeela kufinyiliza kiya akulonga. 11 Kwa idi nidyo Amosi akulonga, ‘Yeloboamu naakomigwe kwe nk'hondo, naho kindedi Waizilaeli nawegalwe kwe isi yo utumwa.’"

12 Niyo Amazia amgamba Amosi ita weye mlotezi! "Uuye mwe isi ya Yuda na kukepatila upati wako uuko na kulava ulotezi wako. 13 Usekugendeela kulava ulotezi mwo mzi wa Beteli, kwaviya aha ni hant'hu ha seuta ha kuvikila naho ni ukalo wa kiseuta."

14 Amosi niyo amhitula Amazia, "Miye hiyo mlotezi hegu mwana mlotezi, miye ni mdimi wa ngoto na kukaula miti ya mikuyu. 15 Zumbe Mnungu anilavaga mwe ndima yangu yo udimi, na kunisigiila nize kuwagambila ulotezi want'hu wakwe Izilaeli. 16 Haluseelo, mwive ulosi wa Zumbe Mnungu, weye wanigamba usekulava ulotezi mwa Izilaeli, naho uleke kubilikiza mwe welekwa wa Isaka. 17 Kwaivo, Zumbe Mnungu agamba ivi, ‘Mkazio naande pamp'he mwo mzi na wana wako we kilume na wa kike nawakomigwe kwe nk'hondo. Nk'honde yako neipangwe na kwink'higwa want'hu watuhu, na weye noubanikile mwe isi ina usavu, na Waizilaeli nawegalwe kwe isi yo utumwa.’"