1 Tegelezeni ulosi uno nyuwe wavele mdamane enga ng'ombe za Bashani, mwili mnanga mwo minima Samalia, mkuwasulumiza wakiwa na kuwabela wakuunga kwambizwa na kugendeela kuwagambila wagosi zenyu kileteleni divai kinywe! 2 Zumbe Mnungu akukile aikaga kilapi akagamba, "Kaula mazuwa yeza, aho wank'hondo wenyu nawawabulumuleni, kila yumwenga ywenyu naande enga samaki atozigwe mwe nduano. 3 Nombulumulwe mpaka mwe zink'handula zimoligwe na kuduulwa kuse," Kwigalwa Hanimoni kwombokela hant'hu hamokile mpaka mwo lukandula.

4 Ni miye Zumbe Mnungu hulonga aya, "Iteni Beteli mkadamanye wavu, naho iteni Giligali mkakombeke kudamanya wavu, naho igaleni nt'hambiko zenyu kila mtondo na fungu dyenyu dyo mlongo kila zuwa dya katatu. 5 Laveni nt'hambiko ya mikate heigeligwe ugwadu inde malavo ya nt'hunyo, naho laveni kwa kuunga nyuwe wenye, na nyuwe mketunyile na malavo ayo kwaviya nivo mkuunga kudamanya.

6 "Ni miye Zumbe Mnungu, nehiwegaila sala kila mzi, na kuswesa nk'hande kila mzi naho hamnati kuniwiiya miye. 7 Iviyaiviya nehikindila fula isekunya umwo ulozo wenyu noukaunga fula kwa miezi mitatu, fula neinya mwo mzi umwenga na kukindila isekunya mwo mzi mtuhu, mgunda umwenga noupata fula na mgunda mtuhu hawapataga fula nadyo nedinyalisa. 8 Want'hu wa mizi miidi hegu mitatu nawagulukila ko mzi mtuhu vileke wapate mazi, mna hayawakint'hile, mna nyuwe mwalemelaga kuniwiiya miye.

9 "Nehiwegaila nk'hangu na zuwa na viunga vyenyu na migunda yenyu ye mizabibu yanyalaga mp'hasi niyo zadya tini na mizeituni, mna nyuwe mwalemelaga kuniwiiya miye.

10 "Nehiwegaileni unyonge wihile enga udya nawegaile Wamisili, nawakomaga wabwanga wenyu mwe nk'hondo, na kuguha falasi zenyu za nk'hondo. Na vimba venyu vamemaga mwe zink'hambi zenyu na kuwanunk'hila vihile mna nyuwe mwalemelaga kuniwiiya miye.

11 "Nawabanangaga wamwenga wenyu enga ivo nawabanangaga want'hu wa Sodoma na Gomola, wadya wahonile nawanda enga kizinga kilavigwe mwo moto, mna nyuwe mwalemelaga kuniwiiya miye, ni miye Zumbe Mnungu hulonga aya," 12 "Kwa ivo miye name neniwadamanyileni kint'hu icho Wazilaeli, kwaviya neniwadamanyileni ivo, kekakeni mdugane na Mnungu ywenyu!"

13 Mnungu uyo aumbile milima,

niye aumbile mp'heho na kugubula fanyanyi zakwe kwa want'hu,

yehe akuhitula msi na kilo,

yehe niye akujata vinenengwa vo mnima,

yehe zina dyakwe

Zumbe Mnungu mta udahi wose!