1 Hangi nyuwe wenye mkwikala wikazi wedi mwe Sayuni na nyuwe mkukeona mna utondowazi mwe milima ya Samalia, nyuwe mwakeona kunda vilongozi wa si zikumanyika kujink'ha isi nt'huhu, awo Waizilaeli wose wawahuwila! 2 Iteni mzi wa Kaline mkaone uko naho mwite mpaka hamati mzi mkulu niyo mseele kubula Gati ya Wafilisiti, Togoleni woho ni wedi kujink'ha seuta zenyu mbili na isi yawe ni nk'hulu kujink'ha yenyu? 3 Nyuwe hamkuunga kufanyanya kwiza kwa zuwa diihile mna kwa kudamanya uwo mwaditenda zuwa idyo dinde hagihi. 4 Hangi nyuwe wenye mkugona mwe zisazi zigeligwe mahambo ya mp'hembe za nt'hembo, na kukechulula mwe vifumbi va yombe, na kudya wana ngoto wagimbale na ndama zigimbalise! 5 Nyuwe mwatowa mazeze, uku mkatula wila mhya kwa vinanda vi hengi enga seuta Daudi. 6 Mwanywa divai kwa nyiga, na mwakehaka mavuta yana mhemp'he wedi, mna hamna usungu mwa kubanangwa welekwa wa Yusufu. 7 Kwaivo nomnde want'hu wa nk'hongo kwigalwa mwe isi yo utumwa, fugo zenyu na kinyemi chenyu nekisile.

8 Zumbe Mnungu akelisaga, Mnungu mta udahi wose agamba, "Naihiwa kwa kukeduvya kwa want'hu wa Izilaeli na nyumba zawe zedi naziihiya, na mzi wawe na kila kint'hu kili umwo nenikiink'hize kwa wank'hondo wawe."

9 Uneva kuna want'hu mlongo mwe mp'huga imwenga wose nawabanike. 10 Uneva ndugu neeze koka vimba akeza kuvifoseza kuse ye nyumba na kumuuza yeyose akefisile umwo, "Togoleni eyaho yeyose hamwenga nae?"

Naye akagamba, "bule!"

Naho nenilonge, "Nyamala zii! hakikuungwa kutambula zina dya Zumbe Mnungu."

11 Zumbe Mnungu kawagamba , wank'hondo wamole pele zinyumba zink'hulu ne zindodo. 12 Togoleni falasi zadaha kuguluka mwo luwe? Togola mnt'hu adaha kulima mwe bahali kwa ng'ombe? Mna mhitula uwagilwa kunda usungu na uwedi kunda usungu.

13 Nyuwe mnda na kinyemi kuutaha mzi wa Lodebali, "Nanywe mwakeduvila muutaha mzi wa Kalinaumu kwa ludole lwenyu."

14 Kwaviya Zumbe Mnungu mta udahi wose agamba, "Nyuwe Waizilaeli neniwegale want'hu watuhu wose wawasulumize kukongela mwe dikolongo dya Lebo Hamati uko kasikazini kubula kwe dikolongo dya Alaba nt'hendelo ya kusini."