1 Nyuwe Waizilaeli Tegelezeni ivo huhongeza kwajili yenyu.

2 Isi ya Izilaeli igwa enga viya mwali na mazanga yakwe,

Naho hehali yeyose wa kumwinula,

Kalekigwa mwana nk'hiwa mwe isi yakwe,

3 Kwaviya Zumbe Mnungu agamba ivi, "Want'hu alufu imwenga nawalawe mwo mzi kuita kutowana mna nawauye gana dimwenga du, nawalawe want'hu gana mwe mzi umwenga mna nawahone ni want'hu mlongo."

4 Zumbe Mnungu awagamba ivi Waizilaeli, "Nizunguleni miye nanywe nomkalise. 5 Mna msekuita uko Beteli hegu Giligali hegu msekudendeluka kuita Beel Sheba, kwaviya wakaya wa Giligali kindedi nawatahigwe na mzi wa Beteli noubanangwe."

6 Mzunguleni Zumbe Mnungu na nyuwe nomkalise. Mnalemela kudamanya ivo, vituhu vakwe naawakump'hukileni welekwa wa Yusufu enga moto, naho umoto nouwaoke wakaya wa Beteli naho hehali hata yumwenga naadahe kuuzima. 7 Kauliseni nyuwe mkuhitula uwagilwa kunda usungu na kuutenda uwagilwa hi kint'hu!

8 Uyo adamanye nt'hondo zikwitangwa kilimia na olioni,

uyo akuhitula ziza dititihale kunda msi,

na msi kunda kilo

uyo akuyaika hamwenga mazi ya bahali

na kuyakupula mnanga mwe isi inyaile,

Zumbe Mnungu nidyo zina dyakwe.

9 Yehe niye akuwakoma wata ludole, na kubananga magomela yawe.

10 Nyuwe mwawaihiya want'hu wakugombela uwagilwa na wata kulonga ikindedi mwe kitala. 11 Nyuwe mwawahujila wakiwa na kuwatoza ulozo usump'hule, mwazenga nyumba za maiwe ya kusongola mna nyuwe homwikale umwo, mwalima viunga vedi va mizabibu mna homnywe divai yakwe. 12 Kwaviya miye namanya uwazilo wa masa yenyu na ukulu wa wavu wenyu, mwawasulumiza wata uwagilwa na kuhokela matundu ya soni na kukindila uwagilwa wa wakiwa mwe kitala. 13 Ivo mnt'hu mta umanyi naanyamale mwo lupisi ulwo, kwaviya lupisi ulwo nolwinde lwiha!

14 Zunguleni kudamanya ayedi naho hiyo yaihile, vileke mpate kwikalisa na Zumbe Mnungu mta udahi ande na nyuwe enga ivo mkulonga ehamwenga na nyuwe. 15 Ihieni yaihile na ungeni yedi na kudamanya uwagilwa mwe kitala, yadahika Zumbe Mnungu mta udahi naawaonele mbazi welekwa wa Yusufu wasigale.

16 Zumbe Mnungu mta udahi agamba ivi, "Nokunde na ndilo mgati mwe sila zose na usungu mwe sila nk'hulu zose, walimi nawetangwe kwiza kuila, na wadya wakulihwa kwajili ya kuila weze wahongeze. 17 Nahande na ndilo mwe migunda ya mizabibu, kwaviya miye neniyomboke mgati mwenyu na kuwasengela." Ni miye Zumbe Mnungu hulonga.

18 Hangi nyuwe wenye mkudibela zuwa dya Zumbe Mnungu! Nii mwadibela zuwa dya Zumbe Mnungu? Zuwa idyo nedinde ziza naho hiyo ung'azi. 19 Zuwa diya nedinde enga mnt'hu akunyilika simba, na kubwiilana na uzi enga mnt'hu akuuya kwe kaya na kuika mkono wakwe mwe nk'handula na kulumwa ni nyoka! 20 Zuwa dya Zumbe Mnungu nedinde ziza dititihale naho hiyo ung'azi, neinde kinyulu haheina uyokozi wowose.

21 Zumbe Mnungu agamba ivi, "Fugo zenyu za kunivika naziihiya na kuzibela, naho midugano yenyu ye miviko yaniihiya! 22 Hata uneva mwanilavila malavo yenyu ya kokwa na malavo ya unga miye henizumile kuzihokela, malavo yenyu ya utondowazi na za mifugwa wagimbale, miye henizisinye. 23 Nihausileni lwasu lwa ukemi wenyu, miye henitegeleze maizwi ya mazeze yenyu. 24 Mna damanyeni mbuli zose kwa uwagilwa naho mbuli izo zigendeele kudamanyika enga ivo mazi yakuseela mwo mto heyekunyala.

25 "Nyuwe Waizilaeli, Togoleni nomniigaila malavo na nt'hambiko kwedijangwa kwa miyaka milongo mine? 26 Mwo lupisi ulwo mwainulaga hili dya mnungu ywenyu Sakuti seuta ywenyu na mahili ya Kaiwani mkumwitanga mnungu ywenyu ywa nt'hondo, vint'hu ivo mkedamanyile nyuwe wenye. 27 Kwaivo neniwasamize mwe isi ya utumwa uko Damesiki," Zumbe Mnungu uyo zina dyakwe ni Mnungu Mta Ludole lwose.