1 Zumbe Mnungu agamba ivi, "Want'hu wa Moabu wadamanya wavu nk'hanana nyingi, ivo heniwaleke kuwasengela kwaviya wayokaga mavuha ya seuta ywa Edomu niyo yanda maivu. 2 Ivo neniigale moto mwe isi ya Moabu, na moto uwo nouwoke magomela ya mzi wa Kelioti. Watowani umwo nawatowe maizwi yawe na kutowa magunda want'hu wa Moabu nawabanike mwa maizwi ayo ye nk'hondo. 3 Iviyaiviya miye Zumbe Mnungu nenimkome kilongozi ywakwe na kuwakoma wandima wakwe wose."

4 Zumbe Mnungu agamba ivi, "Want'hu wa Yuda wadamanya wavu nk'hanana nyingi, kindedi neniwasengele, kwaviya walemela sigilizi zangu naho hawatimile malagizo yangu. Wadant'hilizwa na milungu yo udant'hi iidya wandile nayo wakale wawe wakaivikila. 5 Ivo neniigale moto mwe isi ya Yuda, na kuzoka pele magomela ya Yelusalemu."

6 Zumbe Mnungu agamba ivi, Waizilaeli wadamanya wavu nk'hanana nyingi, kindedi naniwasengele. Wawatagaga want'hu wangu wawagilwa kwa matundu na iviyaiviya wawatagaga want'hu wangu wakiwa kwa makwapa. 7 Awasezengaga na kuwahujila wasokezi, na wakiwa kuwapagula wasekupata uwagilwa wawe. Mwana na ise wahanganyila mvele yumwenga, ivo wadigela usavu zina dyangu dikukile. 8 Want'hu wagona mnk'handa ye kilingo na suke ziikigwe kulawa kwa want'hu wakiwa mwe nyumba ya milungu yawe uku wakanywa divai iyo iguligwe kwa matundu yatozigwe want'hu kwa kutigizwa.

9 Hata ivo nyuwe want'hu wangu neniwakome pele Waamoli, awo wandaga watali enga miti ya mielezi, na wata ludole enga miti ya mialoni, nehiyabananga matambi yakwe na maizi yakwe. 10 Nehiwalava kulawa mwe isi ya Misili na kuwalongoza kombokela mwe dijangwa kwa miyaka milongo mine, mpaka aho mwawahokile isi ya Waamoli kunda yenyu. 11 Nehiwasagula mwa nyuwe wana wenyu kunda walotezi na wabwanga wenyu wakelave kwajili ya kumdamanyila ndima Mnungu, togola nyuwe Waizilaeli aya hulonga hiyo ya kindedi? Ni miye Zumbe hulonga aya. 12 Mna nyuwe muwatenda want'hu waikile kilapi wanywe divai na kuwalemeza walotezi wasekulava uwona. 13 Haluse neniwahonde naho enga digali ivo dikuhonda umwo dikanda dimemeza ulozo. 14 Hata wadya wakugulukisa hawadahe kunyilika, wata ludole nawasiilwe ludole na mhumi haadahe kuyokola wikazi wakwe. 15 Wakulasa mwe nk'hondo hawadahe naho, na wakugulukisa hawadahe kukeyokola hegu wakugendeza falasi hawadahe kuyokola wikazi wawe. 16 Hata watowani wadahi mwe dizuwa idyo nawaguluke haheina vitowanilo. Ni miye Zumbe Mnungu hulonga.