1 Zumbe Mnungu agamba,

"Mwe mazuwa yakwiza no lupisi lukwiza,

neniwambize want'hu wa Yuda na Yelusalemu wekale vedi.

2 Neniziduganye si zose,

nenizigale kwe dikolongo dikwitangwa Mnungu asengeela.

Uko neniwasengele want'hu

kwa yadya ziwatendele want'hu wangu Izilaeli,

kwaviya wawasambaza want'hu wangu mwe zi isi nt'huhu,

niyo waipanga isi yangu.

3 Wawatoelaga simbi want'hu wangu wakaule akuunga apate watumwa,

na kuwataga wabwanga vileke wapate mapamp'he,

naho wawataga wandele

vileke walihile divai.

4 "Nyuwe nanywe mwaungaga mnitendelei, want'hu wa Tilo na Sidoni na si zose za Filisti? Haluse nomnilihize kikoda? Uneva nomnilihize kikoda, miye neniwalihizeni kikoda aaho! 5 Mguha matundu yangu na zahabu yangu naho mguha vint'hu vangu vedi ivo huunga na kuvigala mwe zinyumba zenyu zo kuvikila." 6 Want'hu wa Yuda na want'hu wa Yelusalemu muwataga kwa Wagiliki vileke mpate kuwasamiza hale na isi yawe. 7 Haluse neniwavuze want'hu wangu kulawa uko muwatagile name neniwalihize kikoda kwa iki mdamanye. 8 Neniwatende wana wenyu wabwanga na wandele na kuwataga kwa want'hu wa Yuda nawo nawawatagile want'hu wa Sheba, isi ya hale. Miye Zumbe Mnungu hilonga. 9 "Wagambileni want'hu wa si nt'huhu mbuli ino,

‘mkeike lumwe kwajili ya nk'hondo,

wetangeni watowani wenyu,

watowani wose wakeduganye,

waite kulongole.

10 Saneni magembe yenyu yande mabamba,

hengo zenyu zinde mikuki.

Hata wasokezi wagambe.

Hata suwe ni watowani.

11 Tenda nguzu mwize nyuwe si zose we nt'hendelo zose,

mkeike hamwenga mwe dikolongo.’ "

Weye Zumbe uwaseleze watoani wako wose wawatoe.

12 "Si zikeike lumwe,

yeze mwe dikolongo dikwitangwa

Zumbe Mnungu Akusengela,

kwaviya uko miye Mnungu,

nenikale kusengela isi zose zihagihi. 13 Haluse guheni hengo kwajili yo kuvuna,

kwaviya haluse uvuni ubula,

wajatangizeni enga zabibu,

izo zimemile divai. q Uwihi wawe utendesa,

enga mabiga yamemese."

14 Wanda wengi mafyo makulu kwa mafyo makulu,

mwe dikolongo dya Kusengela,

kwaviya zuwa dyo usengelo dya Zumbe dihagihi.

15 Zuwa na mnenge zigelwa ziza,

nt'hondo nazo nezileka kunda no ung'azi.

16 Zumbe naabume kulawa Sayuni

naho naalave izwi kulawa Yelusalemu

mbingu na isi nevizingize

Mna Zumbe naande unyilikilo wa want'hu wakwe

gomela ditogile dya want'hu Izilaeli.

17 Aho niho want'hu wa Izilaeli nommanye kugamba, Zumbe Mnungu ywenyu

ekala Sayuni, mnima ukukile

Yelusalemu neinde ukuka

wageni hawautahe naho.

18 Naho mwe dizuwa idyo milima neigubikwe ni mizabibu

naho nokundilise na ng'ombe zina mele.

nokunde na mazi mengi mwe mito ya Yuda.

Mazi mengi nayalawe mwe Nyumba ya Zumbe,

nayomele dikolongo dya Shitimu.

19 "Misili neinde heiina kint'hu

Edomu nayo neitende jangwa

kwaviya nawawakump'hukila want'hu wa Yuda

naho nawawakoma want'hu heweina masa mwe isi yawe.

20 Yuda naikalwe ni want'hu ulo na ulo

Yelusalemu neinde uuko vyeleoko vose.

21 Neni walekele want'hu wangu wa Yuda masa yawe ayo nandaga hinati kuwalekela.

Miye Zumbe nenitende wikazi wangu hamwenga na want'hu wangu."