1 Toweni gunda uko Sayuni,

Toweni lukunga mwo mnima wangu ukukile,

Wakaya wose wa mwe isi ya Yuda wazingize,

Kwaviya zuwa dya usengeelo wa Zumbe Mnugu dyeza,

Kwaviya zuwa idyo dihagihi.

2 Nedinde zuwa dya ziza na kinyulu,

Zuwa dya mavunde na ziza kulu.

Wank'hondo enga fyo kulu dya sige dihagihi,

enga ziza dikugubika milima.

Hainati ilaile hata zuwa dimwenga,

naho heioneke naho

mwe vyeleko vose vikwiza.

3 Enga ivo moto ukoka pele.

Fyo idyo nivo dikubananga kila kint'hu kulongole kwakwe.

Na kuleka kunyuma kila kint'hu kikahya,

umo dikanda hadinati komboka isi ni enga kiunga cha Edeni,

mna dinomboka, isi yanda jangwa.

Hahana kikudaha kudinyilika.

4 Waoneka enga falasi,

waguluka enga falasi za nk'hondo.

5 Wakapilikapilika kulanga mwo mnima,

walava izwi enga magali yakugendezwa ni falasi,

wavumila enga moto wa mani yanyaile,

wakepanga enga fyo kulu dya watowani wakeikile lumwe kwa nk'hondo.

6 Fyo idyo dikanda hagihi want'hu wengilwa ni wogofi,

futa zose zihuza kwa kogoha.

7 Watoana enga watowani,

wakwela mwo lukazi enga watowani.

Wose wakup'huka kwa hamwenga,

hahali hata yumwenga ywawe akuhitula sila.

8 Hahali yumwenga akumsindika miyawe.

Kila yumwenga atimila sila yakwe.

Womboka hagati ya watowani wanavitowanilo,

naho hahana akudaha kuwakindila.

9 Waukump'hukila mzi,

wakwela mwo lukazi,

wakwela mwe nyumba

wakehenyeza mwe dilanga enga wabavi.

10 Isi yose yazingiza hameso yawe,

mbingu nazo zasingisika,

zuwa no mnenge vigelwa ziza,

nt'hondo zaleka kwalika.

11 Zumbe awenk'ha sigilizi watoani wakwe kwa izwi kulu,

watoani wakwe wandilisa wengi naho wana udahi,

wakumzumila hawakuwazika.

Kindedi zuwa dya Zumbe kulu naho dyatisa!

Niani akudaha kufinyiliza?

12 Mna Zumbe Mnungu agamba,

"Niuiyeni miye kwa mioyo yenyu yose,

fungeni naho muile na kunda na kinyulu.

13 Msekutatula suke zenyu du kulagisa kugamba mkweiila,

mna kweiileni mwe miyoyo yenyu."

Muwiyeni Zumbe Mnungu ywenyu.

Kwaviya yehe kandilisa ywedi naho ana mbazi,

hiyo mhufu wa maya,

mazuwa yose ana udahi wa kulekela masa na kuleka kusengela. 14 Mafani Zumbe Mnugu ywenyu naahituke,

na kuwavikilani kwa ulozo,

nomdahe kumlavila malavo ya nk'hande na vo kunywa. 15 Toweni gunda mwo mnima wa Sayuni!

Muwagambe want'hu wafunge,

wadamanye mdugano ukukile.

16 Waduganyeni want'hu,

muwakukize want'hu awo,

duganyeni wadala vilongozi,

duganyeni wana

hata wana wakonk'ha,

walombi wafose mwe zinyumba zawe.

Hamwenga na mlombigwa.

17 Walavant'hambiko wakumdamanyila ndima Zumbe hagati ye nk'hili ye Nyumba ya Zumbe na hant'hu ha kulavila nt'hambiko,

waile wakagamba,

"Weye Zumbe, waonele mbazi want'hu wako.

Usekuwaleka want'hu wa si nt'huhu wakibele na kukiseka

wakagamba, ‘Ekuhi Mnungu ywenyu?’ "

18 Aho niho Zumbe naalagise lukunde kwajili ye isi yakwe

na kuwaonela mbazi want'hu wakwe.

19 Zumbe Mnugu niyo ahitula na kuwagamba want'hu wakwe.

Haluse neniwenk'he ngano na divai na mavuta ya zeituni,

nyuwe mdye mwigute.

Henileke naho nyuwe

mbeligwe ni isi nt'huhu. 20 Neniwause wank'hondo awo walaile mkoma mahanya,

neniwatende wanyilike mpaka kwe dijangwa.

Wank'hondo wandile kulongole neniwatende waduulwe mwe bahali ifile,

na wadya wandile kunyuma mwe bahali ya Meditelania.

Vimba vawe nevinunk'he

neni wabanange kwa yadya yose wawatendeleni.

21 Nyuwe want'hu wa mwe isi msekogoha,

mna mnde na kinyemi na kwanga,

kwaviya Zumbe kadamanya mbuli nk'hulu.

22 Nyuwe makala msekogoha,

kwaviya mani ya kwembago yanda yekwani,

miti nayo yeleka matunda yedi,

mizabibu na mikuyu yelekesa.

23 Nyuwe want'hu wa Sayuni indeni na kinyemi.

Mnde na kinyemi kwajili ya Zumbe Mnungu ywenyu,

kwaviya yehe kawenk'hani fula mkuziunga.

Fula za vuli zink'hintile kwa lupisi lwakwe na masika yank'hintile kwa lupisi na mnwati kwa lupisi lwakwe enga ivo zandaga nk'hongo.

24 Hant'hu ho kuhetela ingano nahameme ngano,

vint'hu vo kukingila nevimeme divai na mavuta ya zeituni.

25 Name neniwavuzileni idya miyaka idigwe ni sige,

na kila kint'hu kidigwe ni ngeda na halala.

Ni miye naditumile kwenyu idyo difyo dikulu.

26 Nomdye nk'hande niyo mwasigaza.

Nomditogole zina dya Zumbe Mnungu ywenyu,

uyo atendile mbuli za kwehela.

Naho want'hu wangu hawabeligwe mbwitu.

27 Nyuwe Waizilaeli,

nommanye kugamba miye ni hamwenga na nyuwe,

na kugamba miye ni Zumbe Mnungu ywenu.

Hahana mtuhu enga weye.

Want'hu wangu hawabeligwe mbwitu.

28 Naho akajika nenigele Muye ywangu mwa want'hu wose.

Wana wa kilume na we kike nawalonge ulosi wa Mnungu,

wadala wenyu nawalote sozi zikulawa kwa Mnungu,

wabwanga wenyu nawo nawaone maona.

29 Naho mwo lupisi ludya nenigele Muye ywangu,

hata mwa watumwa wagosi kwa wavele. 30 "Name nenilagise vilagiso va kweehela,

mwe mbingu na mwe isi,

sakame na moto na mavunde ya mosi.

31 Zuwa nedihitulwe kunda ziza,

mnenge nounde wink'hundu enga sakame,

umwo zuwa dikulu dya Zumbe dikutisa dikei kwiza.

32 Mna

mnt'hu yeyose akuunga alombeze kwa zina dya Zumbe nayokolwe,

enga ivo Zumbe Mnungu alongile.

‘Wamwenga mwo mzi wa Yelusalemu, nawanyilike

awo wadya miye Mnungu niwasagule.’ "