1 Uno nuwo Ulosi wa Zumbe Mnungu wamwiziilaga Yoeli mwana Patueli.

2 Tegelezeni nyuwe wadala,

tegelezeni nyose mkwikala mwe isi ya Yuda.

Togoleni kwalailaga kint'hu chochose mwe isi enga iki mwo wikazi wenyu

hegu mwo lupisi lwa wakale wenyu?

3 Wagambileni wana wenyu mbuli ino,

naho wana wenyu wawagambile wana wawe,

wana wawe nawo wawagambile cheleko kikwiza.

4 Yasigazwe ni matuluma ya sige

yadigwa ni matuluma ya ngeda

naho yasigazwe ni matuluma ye zingeda

yadigwa ni matuluma ya mp'hasi,

yasigazwe ni matuluma ya mp'hasi

yadigwa ni matuluma ya mahalala.

5 Nyuwe wakozi leukweni mwuile,

gutileni nyuwe nyose wakozi we divai

kwaviya zabibu zo kudamanyila divai mp'ya zibanangwa.

6 Wank'hondo enga fyo dya sige waibananga isi yetu,

wana ludole lukulu naho wabinda wingi

meno yawe enga ya simba

ngeso zawe enga za simba vele.

7 Wabananga mizabibu yetu,

naho wafunc'ha mitini yetu

wayagomola magome yawe

no kuyaduula hasi

niyo matambi yasigala heyeina kint'hu.

8 Nyuwe want'hu ileni enga mwali na mazanga availe gunia,

akuhongeza file ya mgosi amtumize.

9 Malavo ya nk'hande na ya vokunywa

havihali mwe Nyumba ya Zumbe Mnungu.

Walavant'hambiko wahongeza kwaviya waswesa cho kumlavila Zumbe Mnungu.

10 Nk'honde zibanika,

sanga inyala

nk'hande zibanangwa

divai imp'ya ibanangwa

mavuta ye mizeituni hayahali.

11 Mnde ne kinyulu nyuwe walimi,

ileni nyuwe wandima we nk'honde ye mizabibu,

ngano na shaili zibanika

ulozo wose mwe nk'honde ubanangwa.

12 Mizabibu ne mikuyu inyuluka,

miti yose ya matunda inyuluka niyo yafa.

Kinyemi cha want'hu kihauswa.

13 Valeni magunia mhongeze,

ileni nyuwe wandima wa hant'hu hakulavila nt'hambiko

Iteni kwe Nyumba ya Mnungu mkacheleze mkahongeza.

Haihali nk'hande hegu divai ya kumlavila Mnungu ywenyu.

14 Wagambeni want'hu wafunge.

Itanga mdugano ukukile,

waduganyeni vilongozi

na want'hu wose wa isi ya Yuda

kwe Nyumba ya Zumbe Mnungu ywenyu,

niyo mwa mwiila.

15 Hangi suwe wenye kwe dizuwa diya!

Kwaviya zuwa dyo usengelo dya Zumbe dihagihi,

nedize enga ubanangi kulawa kwa Mta Udahi wose.

16 Ulozo wetu ubanangwa

ha meso yetu,

kinyemi na kwanga

mwe nyumba ya Mnungu havihali.

17 Mbeyu ziola hasi mwe sanga inyaile

nc'hanja nazo hazina kint'hu

gulu dyo kuikila ulozo dibanika

kwaviya hahana ulozo wo kuika.

18 Makala yailisa!

mafyo ya Ng'ombe yangadika,

kwaviya yaswesa nk'hande,

heiye, mafyo ya ngoto nayo yangadika.

19 Naila kwa weye Zumbe Mnungu,

kwaviya ludyo lwe mifugwa ne miti inyala

iivo moto nawo woka miti yose mwe zink'honde.

20 Hata makala mbago yose yakwiila weye,

vizuto va mazi vinyala

kwaviya moto uhiilisa mani yose uko kwe mbago.