1 Zumbe Mnungu kwa maya yakwe awagubikaga want'hu wa Sayuni na maihi.

Nt'hunyo ya Izilaeli haihali naho,

Mwe dizuwa dya maya yakwe haionele kinyemi hata Inyumba yakwe.

2 Zumbe Mnungu abanangaga wikazi wa welekwa wa Yakobo aheina mbazi,

Kwa maya yakwe amolaga magomela ya want'hu wa Yuda.

Awagelaga soni maseuta wake na wakulu wakwe.

3 Ludole lwose lwa Waizilaeli alubanangaga kwa maya,

alekaga kuwambiza umwo waduganaga na wank'hondo wawe,

mwa maya yatendese awakomaga want'hu wa Yakobo enga moto ukoka pele.

4 Alasaga no msale wakwe enga mnk'hondo,

awakomaga wose kikeduvila.

Mwe zikaya zetu want'hu wa Sayuni kandilisa na maya, mwa suwe yandaga enga moto.

5 Zumbe Mnungu kanda enga mnk'hondo, kwakoma want'hu wa Izilaeli,

Mazumba yakwe yose kayamola, na magomela yakwe yose ya kiseuta,

Kawatendela want'hu wa Yuda waile na kuhongezesa.

6 Kamola Nyumba yakwe umwo kikumvika enga kaheha kimwe kiunga ivo kakumoligwa.

Kalemeza mazuwa yose ya kinyemi ne dizuwa dyo kuhumula,

kwa maya yakwe yatendese kawalemela maseuta na walavant'hambiko.

7 Zumbe Mnungu ahaonaga hikint'hu aho hant'hu ha kulavila nt'hambiko, na kuilemela Inyumba yakwe.

Nk'handula ye mazumba yakwe kawalekela wank'hondo wazimole,

Wagutilaga umwo mwe Nyumba ya Zumbe Mnungu enga vugo dya zuwa dya kinyemi.

8 Zumbe Mnungu kalamula kumola nkh'andula za Sayuni, iwe kuita iwe tuhu.

Ivo akonganga kumola

naho halekaga mpaka zink'handula na magomela vihongeze na kuzingiza.

9 Nk'hili zakwe zigwa hasi naho mihindo yakwe ya kilama ibanangwa na kuvunigwa vunigwa.

Seuta na wakulu wakwe weyuko kwo utumwa mwe si,

Na sigilizi nayo ihalawa, walotezi wakwe hawakupata uwona naho kulawa kwa Zumbe Mnungu. b

10 Wadala wa Sayuni wekala hasi wakafanyanya,

wakegela luvumbi mwe mitwi na kuvala mavalo ya gunia,

Wana kike wa Yelusalemu wafunamiza mitwi yawe hasi.

11 Meso yangu yavimba kwa kuila na moyo wangu nousokelesa.

Moyo wangu una kinyulu kitendese kwaviya want'hu wangu wakomigwa,

naho wana wakembe wazehuka na kubanika mwo mzi.

12 Wakawaiila wamami zawe, ikuhi nk'hande hegu mazi,

Uku wakalabila enga want'hu wazehuke mwe sila zo mzi

Na kubanikila mwe mikono ya wamami zawe.

13 Hugambilei weye Yelusalemu?

Huliganyize na mbwai? naho huliganyize na kint'hu kihi.

Hulangilize weye Sayuni wili wedi, niani nakadaha kukuhonya.

14 Walotezi wako wakusinyila maona yo udant'hi,

Hawabunk'hule uwihi wako, vileke weye udamanye ayedi.

Mna wakulotela maona yo udant'hi na ya kwazaganya.

15 Wagenda sila wose wakubela.

Wakuluvya weye Yelusalemu uku wakasingisa mitwi yawe

"Togoleni mzi uno nuwo wandaga wedi kujink'ha mizi yose? Naho mzi wa kinyemi mwe si yose?"

16 Wank'hondo wako wose wakutowa kizumo na kukufyondola, naho waku gwegwejuila meno wakagamba

"heiye kimbananga kindedi,

mwe dizuwa diya nekikagoja kwa nk'hwina haluse dibula naho kidiona!"

17 Zumbe Mnungu kakint'hiza yadya alaganaga.

Enga ivo aikaga aho kale, abanangaga haheina mbazi.

Awatendaga wank'hondo wande na kinyemi mwe masulumizo yako na kawatenda wank'hondo wako watoge.

18 Nk'handula zo mzi wa Sayuni zamwiile Zumbe Mnungu!

Masozi nayetike enga mto kilo na msi,

wiile na kuhongeza haheina kuhumula!

19 Kilo chose inuka ukaile naho mgambile Zumbe Mnungu ayo ye mwo moyo wako.

Mlombezeleni wana wenyu, wana wakubanika kwa sala mwe sila!

20 Kaula Zumbe Mnungu unifanyanye! Togola kuna yeyose umdamanyile enga suwe?

Togola hata wavele wa wana wawe wakuwaungisa!

Togola walavant'hambiko wakomigwe mwe Nyumba yako?

21 Vimba va wabwanga na wadala vikegoneza hamwenga mwe sila,

wana kilume wangu na wana kike kuwakoma kwa sime yako,

naho kuwakoma mwe dizuwa dya maya yako.

22 Kuwalalika mwe dizuwa dye kinyemi wank'hondo wangu awo wanitisaga kila nt'hendelo mwe dizuwa dya maya yako Zumbe Mnungu,

Hehali yeyose ahonile hegu kunyilika, wadya wana niwaleile na kuwakaulisa, mnk'hondo ywangu kawabananga.