1 Miye ni mnt'hu napataga makunt'ho, kwa maya yakwe Mnungu.

2 Aniguhaga na kunigala hant'hu hana ziza naho hiyo ko ung'azi.

3 Kanisulumiza na kuinsulumiza kilo na msi.

4 Katenda nk'handa yangu na mavuha yangu vitulike.

5 Kanikup'hukila na kunizungulusila usungu wa makunt'ho.

6 Kanitenda nikale mwe diziza enga wadya wabanike kale.

7 Kanizungulusila nk'handula nisekunyilika, na kuninyinya kwa minyololo izamile.

8 Hata uneva ninatowa lwasu hegu kulombeza wambizi nise kuzumilwa.

9 Kakindila sila yangu kwa maiwe makulu naho hikudaha kuita kokose.

10 Enga kala dikwitangwa dubu naho enga simba ikuninyatila.

11 Anibulumulaga kulawa mwe sila yangu, na kunileka haheina wambizi.

12 Avutaga uta wakwe na kunionyekeza miye.

13 Anilasaga no msale mwo moyo, msale ulaile mwe dichaka dyakwe.

14 Hinda kint'hu cha kubelwa kwa want'hu wangu wose, msi wose hinda mnt'hu wakusekwa.

15 Kanimemeza makunt'ho, na kunitenda nindilise na usungu.

16 Kanitenda miye nigwegwejule meno yangu mwe zmp'halamba, na kkunifiligisa mwa maivu.

17 Moyo wangu haumanyize utondowazi naho, kinyemi kwangu ni kint'hu hikimanyize.

18 Hingilisa chevu kawiilo dyangu hadihali naho.

19 Nayakumbukila makunt'ho yangu na kwangadika kwangu ni enga usungu wa sungwi.

20 Nayafanyanya ayo yose, na moyo wangu umema usungu.

21 Mna nakumbukila mbuli imwenga du, na miye nina kawiilo.

22 Suwe hakikomwa kwaviya lwa Zumbe Mnungu lukulisa, naho mbazi zakwe ni za mazuwa yose.

23 Kila kukacha kwanda kuhya, uhuwilwa wakwe ni mkulu vitendese.

24 Zumbe Mnungu niye humuunga, ivo nenimwikile kawiilo dyangu.

25 Zumbe Mnungu ni ywedi kwa wadya wakumhuwila na kwa wose wakuzungula wambizi wakwe.

26 Ni vedi mnt'hu kugojela kwa kufinyiliza, kwajili yo uyokozi wa Zumbe Mnungu.

27 Ni vedi mnt'hu kuhina kufinyiliza akanda akei mbwanga.

28 Ni vedi kwikala kwa kunyamala, umwo makunt'ho yakakumpata kulawa kwa Mnungu.

29 Yaungwa kufanamiza mtwi kwa kukeseleza, vadahika dikanda diaho kawiilo.

30 Hata kikatoigwa na kuhomolwa ni vedi kiyahokele yose.

31 Kwaviya Zumbe Mnungu haakilemele mazuwa yose.

32 Hamwenga na kugamba akitenda kinde na kinyulu, mna naakionele mbazi viligane no wingi wo uwedi wakwe.

33 Yehe hakuunga kuwasulumiza hegu kuwatenda want'hu wande na kinyulu.

34 Zumbe kamanya Wavugailwa wose mwe isi ivo wakahujilwa na kutendelwa yaihile,

35 amanya uwagilwa wa want'hu ivo ukwazwa ha Zumbe Mnungu mkulu.

36 Na kumhoka mnt'hu uwagilwa wakwe, togola Zumbe Mnungu asekuona mbuli izi.

37 Niani akudaha kulonga kint'hu kidamanyike, togola hiyo Zumbe Mnungu akudamanya ayo.

38 Mbuli zedi na mbuli ziihile zalaila du kwa kuunga mwenye Zumbe Mnungu.

39 Nii mnt'hu ande alabile, ikanda kasengelwa kwo wavu wakwe?

40 Naho kihime na kupelemba lugendo lwetu, vileke kidahe kumuuiya Zumbe Mnungu.

41 Nekimwinuile Zumbe Mnungu myoyo hamwenga na mikono yetu kwa kumlombeza.

42 Suwe kidamanya wavu na kukuhituka mna weye hukiusile wavu.

43 Kukigubika kwa maya yako na kukikulumbuza niyo wakikoma haheina mbazi.

44 Kukesungulusila vunde dizamile, vileke kulombeza kwetu kusekukubwiila.

45 Kukitenda kinde nt'hagata na usavu mgati mwa want'hu wa si nt'huhu.

46 "Wank'hondo wetu wose wakitowa kizumo.

47 Kisulumila kwa wogohi na makunt'ho ya kipump'ha, ubanangi na ukomi."

48 Meso yangu yatumbuka nc'hoko yo mto wa masozi, kwaviya yo kubananga want'hu wangu.

49 Meso yangu yalawa masozi haheina kuleka,

50 mpaka aho Zumbe Mnungu naakaule hasi na kuona.

51 Naila na kuona usungu, haona yadya yawapatile wavele wa mzi wangu.

52 Wadya wandile wank'hondo wangu haheina dyodyose wanongola enga dege.

53 Nawaniduula mwe dibome handa mgima, na mnanga mwakwe niyo waniduganyila maiwe.

54 Mazi nayakonga kugubika mtwi wangu, name hagamba uno nuwo uheelo wangu.

55 Kulawa hasi ye dibome nehikuwiila weye Zumbe Mnungu.

56 Weye kwiva hakuiila, unase kuleka kwiva ndilo yangu halombeza wambizi.

57 Umwo nakwitange nokwiza hagihi, ukagamba usekogoha.

58 Zumbe ywangu kunigombela masa yangu na kukombola ugima wangu.

59 Zumbe ywangu weye kuona uwihi nidamanyilwe, nilamuile masa yangu.

60 Weye kuona uwihi wa wank'hondo wangu na mizungu yawe yose mwa miye.

61 Zumbe ywangu kwiva ivo wakunihomola, na malongelezo yose yaihile mwa miye.

62 Msi wose milosi na fanyanyi za wank'hondo wangu, ni kwa miye kunibananga.

63 Wakaule mwo lupisi lwose wakanda wekala hegu kukimala mwo ukemi wawe wakanibela.

64 "Weye Zumbe Mnungu uwasengele kiya wakuwagilwa, kwaviya watendile.

65 Waligite vileke wapate makunt'ho!

66 Kwaviya kuwafiila maya uwakulumbuze mpaka uwakome pele asekusigala hata yumwenga mwe isi!"