1 Kaula ivo vili mzi wamemile want'hu!

Mna ivi haluse usigala howiina want'hu, haluse unda enga mvele afiilwe ni mgosiwe,

Mwo lupisi lutuhu nokunda kumanyikisa mwe ziisi, yudya andaga malikia haluse kanda mtumwa.

2 Ailisa kwa usungu aho nekilo,masozi yakamhuluwa

Hehali hata ywa kumsangalaza hata yumwenga mwa wambuyaze,

wose wamdant'hiliza naho wanda wank'hondo wakwe.

3 Mwo kwajika makunt'ho na kudamanyisiswa ndima vidala,

Yuda kasamizwa kwaviya yo kuhujilwa, haluse wekala mwa want'hu wa si nt'huhu naho hawapatile hant'hu ha kuhumula

Awo wose nawakawongola wawagwila wakanda mwe makunt'ho.

4 Hakuna yeyose akwiza kuvika mwe Nyumba ya Mnungu,

na wandele wakukema wana makunt'ho, zink'hili zakwe nazo hazina kint'hu,

Walavant'hambiko wakwe waila kwa usungu wana kike wawe nawo wana kinyulu, mzi wenye nao umwa makunt'ho.

5 Wank'hondo wako nawo wakilongoza naho wanda wapati.

Kwaivo Zumbe Mnungu kawasulumizani kwaviya yo uwihi wenyu utendese,

Wanawe watahigwa na kwigalwa hale.

6 Ukulu wose wa want'hu wa Sayuni uhalawa.

Wakulu wakwe wanda enga kapala kazehuke,

wawasumka wank'hondo wawe iivo no usokezi wawe.

7 Mwe mazuwa ya makunt'ho na kwangadika, Yelusalemu wakumbukila ukulu wakwe.

Umwo wagwilagwa ni wank'hondo wawe, hahali yeyose ywa kuwambiza.

Wank'hondo wakwe wasekaga kwa kuhumwa kwawe.

8 Yelusalemu kadamanya wavu wihile, naho niyo wanda msavu kwa wavu wakwe.

Wose nawakautunya ivi haluse waubela,

Kwaviya wakeona soni wenye wakakefisa.

9 Uwavu wakwe wonekaga pwilili, mna woho wenye hawaukaule uheelo wakwe.

Ukugwa kwakwe nokunda kwa kwehela, hehali akudaha kuusangalaza.

Wagamba kaula Zumbe Mnungu makunt'ho yangu, kwaviya mnk'hondo wangu kanihuma.

10 Wank'hondo wawahokaga vint'hu vakwe vose va yombe.

Ivo kuona want'hu wa hi Wayahudi wakengila mwe Nyumba ya Mnungu,

want'hu awo Zumbe Mnungu awalemelaga kunda hamwenga na want'hu wakwe.

11 Want'hu wakwe wose waila kwa usungu,

umwo wakazungula nk'hande na kusakanya vindolo vawe kwa nk'hande vileke wagendeele kunda wagima.

Kaula weye Zumbe Mnungu ufanyanye ivo hubeligwa.

12 Nyuwe wagenda sila mwaona hi kint'hu?

"Kauleni hehali mta usungu enga miye!"

usungu aniigaile Zumbe Mnungu, mwe dizuwa dya maya yakwe yatendese.

13 Kulawa kulanga egalaga moto, niyo wanoka mwe mavuha yangu.

Anitegelaga mtego niyo wanigwila niyo anivuza kunyuma,

Na kunileka hyehelwa na kwituka msi wose.

14 Wavu wangu unyinyigwa kwa hamwenga mwe mikono yakwe,

Zibula mwe singo yangu Zumbe kahausa ludole lwangu na kunigela mwo ludole lwa wadya hikudaha kuhigana nawo.

15 Zumbe Mnungu awalemelaga watowani awo nawakanamila,

naho abwelekezaga lupisi lwa kunisulumiza,

Kuwakoma wabwanga wangu, na awahondaga enga kuminya divai want'hu wangu wa Yuda.

16 Ayo nayo yalekile haila, masozi yeketika,

Hehali mnt'hu yeyose wa kunisangalaza na hehali wa kunigela moyo,

Wanangu walekigwa wakiwa kwaviya wank'hondo wangu wanihuma.

17 Naichulula mikono yangu mna hehali wa kunambiza.

Zumbe Mnungu kalava sigilizi mwangu miye Yakobo,

Wambwiya zangu wande wank'hondo wangu naho miye Yelusalemu hinda kinyala kwawe.

18 Mna Zumbe Mnungu kadamanya yakuwagila.

Kwaviya hisaguka mwo ulosi wakwe naho nitegelezeni nyuwe want'hu wose, yakauleni masulumizo yangu.

Wana kike wangu na wabwanga wangu watahigwa.

19 Nehiwetanga wambwiya zangu, mna woho wanilemelaga.

Walavant'hambiko na wadala wangu wabanikila kwo mzi,

wakazungula nk'hande yawe wenye yo kudya.

20 Kaula weye Zumbe Mnungu nivo nili mwe makunt'ho!

Moyo wangu usokela na muye wangu una kiyangayanga kwaviya hisaguka vihile.

Uko kuse kumema ukomi, kundani nako ni enga file du.

21 "Want'hu weva ivo huila kwa usungu.

Mna hehali yeyose wa kunisangalaza,

Wank'hondo wangu wose weva ivo hukunt'ha,

Welelwa mwa diya udamanye, nalombeza wigale mwe dizuwa dimwenga du vileke woho nawo waone enga ivo huona miye.

22 Uwiihi wawe wose wize hako,

uwadamanyile enga ivo unitendile miye kwaviya yo uwihi wangu wose.

Nehinda na kinyulu mwo moyo wangu na kunda na makunt'ho."