1 Ivo nivo zahabu yetu yazile ung'azi wakwe, naho zahabu yedi haikung'ala,

na maiwe ya yombe kulawa mwe Nyumba ya Mnungu visambala mwe kila sila.

2 Wabwanga wa Sayuni watunyagwa vitendese, wakauliswe enga zahabu yedi,

nivo vili haluse vinda enga vyombo va ulongo, viumbigwe ni muumbi.

3 Hata uzi dyonk'heza wanawe, mna want'hu wangu wanda heweena mbazi,

enga mbuguni kwe nyika.

4 Milomo ya wana wa mbuguni inyala kwa nk'hilu,

walombeza nk'hande mna hehali akuwenk'ha.

5 Wadya nawakadya nk'hande zedi haluse wazehuka mwe sila,

Wadya nawakavala suke za zambalau, haluse wagona mwa maivu.

6 Makunt'ho ya want'hu wangu ni makulu kujink'ha ya mzi wa Sodoma,

mzi usunguzwe kubanangwa, haheina mnt'hu ywa kuwambiza.

7 Wakulu wawe wa Yelusalemu wang'alaga mbee,

miili yawe yandaga ink'hundu guu, na uwedi wawe enga valo dya samawiti.

8 Haluse futa zawe nt'hitu tii, wakomboka mwe sila hawakumanyika,

nk'handa zawe zimamatilana na mavuha, naho inyala enga nk'huni.

9 Wadya wakomigwe kwa sime ni wedi kujink'ha wadya wakubanika kwa sala,

wasulumila kwa sala, mpaka wabanika.

10 kwa mikono yawe wenye wavele awo wakundaga na mbazi wawaambikaga wana wawe wenye haheina mbazi,

wakawatenda wande nk'hande yawe umwo want'hu wangu wakakomigwa. b

11 Zumbe Mnungu alagisaga maya yakwe yatendese,

Na kuugela moto mzi wa Sayuni, moto uwo wokaga mazumba ne zink'hongelo zakwe zose.

12 Maseuta hawahuwile,

hegu wakaya wowose wa mwe isi kugamba nawakump'hukilwe hegu mnk'hondo naakadaha kwingila mwe nk'hili ya Yelusalemu.

13 Ayo nayalaila kwajili yo wavu wa walotezi wawe,

Naho nayalaila kwajili yo uwihi wa walavant'hambiko wawe, kwaviya wawakomaga want'hu heweena malema.

14 Vilongozi wangadikaga mwe sila enga mant'hunt'hu,

hakwandile na yeyose wa kuwakwafya kwaviya mavalo yawe yajabalaga sakame za want'hu awo wawakomile.

15 "Want'hu nawakawatoela lwasu wakagamba foseni!" mwite zenyu nyuwe mwili wasavu, "Foseni naho msekukikwafya!"

Ivo wandaga want'hu wakwangadika uko na uko naho want'hu wa si nt'huhu walongaga hawahokelwe kwikala kwetu.

16 Zumbe Mnungu mwenye awatendaga wasambale,

Hakuwakaula naho na walavant'hambiko hawapate nt'hogola na vilongozi nawo hawatogolwe.

17 Nekisokela kwikala meso kugojela waambizi.

Nekicheleza na kugojela kwa nk'hwina mwa want'hu hewekudaha kukiyokola.

18 Wank'hondo nawakakinyatila mwe sila niyo chadunduga kombokela mwe zisila zetu.

Mazuwa yetu yandaga yajika na uheelo wetu wabulaga.

19 Awo nawakakitimila wandaga wahufu enga swaa.

Wakigulusaga mwo mnima, naho wakinyatilaga mwe nyika.

20 Nawamgwila yudya kikumhuwila mwo wikazi wetu.

yudya seuta asagulwe ni Zumbe Mnungu, yudya chagambaga mwo wamizi wakwe nekikale mwe ziisi.

21 Wakaya wa Edomu mwadaha kwanga ivi haluse.

Naho wakaya wa Uzi mwadaha kunda na kinyemi, mna usengelo uno wa makunt'ho nouweziileni na kuyahambula mavalo yenyu.

22 Usengelo wo wavu wako mwa want'hu wa Sayuni ukint'ha.

Zumbe Mnungu haawaleke msamesame, mna nyuwe Waedomu naawasengele mwo uwihi wenyu.