1 Weye Zumbe Mnungu ukumbukile mbuli ziya zakipataga suwe.

Naho ukaule ivo chagelagwa soni.

2 Isi yetu ink'higwa wata kwiza,

Na nyumba zetu kwa want'hu watuhu.

3 Kinda wana nk'hiwa,

mami zetu walekigwa enga wafiilwe ni wagosi zawe.

4 Chaungwa kugula mazi yo kunywa.

Na k'huni zetu wenye nazo chagula.

5 Chatigizwa kudamanyisa ndima enga watumwa.

Kisokela mna hakikuungwa kuhumula.

6 Kikelava kwa Wamisili na Waashulu,

Vileke kipate nk'hande.

7 Wakale wetu wadamanyaga wavu naho hawahali.

Na suwe chasulumila kwaajili yo wavu wawe.

8 Watumwa nawo wakukilongoza.

Naho hehali wa kukiyokola.

9 Nk'hande yetu chaipata kwa kukelava wikazi wetu,

kwaviya wakomi we kila hant'hu.

10 Nk'handa zetu zakweela moto enga tanuli,

kwajili ye sala ivo ikuchoka.

11 Wavele wetu wakakaliswa wagone nawo mwo mzi wa Sayuni,

Na wana kike wetu mwe zikaya za Yuda.

12 Vilongozi wetu waguhigwa na kuhwelezwa mnanga ne mikono yawe,

wadala wetu hawenk'higwe nt'hunyo yeyose.

13 Wabwanga watigizwa kusaga ulozo kwa maiwe,

wabwanga nawo wangadika kwa mazilo ya nk'huni.

14 Wadala waleka kulava ulangilizi wawe,

na wabwanga waleka kukema.

15 Kinyemi che mioyo yetu kisila,

fugo zetu zihitula mahongezo.

16 Seuta nekikakeduvila hehali.

Hangi suwe wenye kwaviya kidamanya wavu.

17 Kwajili iyo myoyo yetu ilumila,

Naho kwa mbuli izo meso yetu yafinyafinya.

18 Kwaviya mnima Sayuni ulekigwa howiina kint'hu,

Na mauzi yagendagenda uumwo.

19 Mna weye Zumbe Mnungu umwo Useuta wako ni mazuwa yose.

Kulongoza kwako ni mwa vyeleko na vyeleko.

20 Nii kukileka lupisi lutali?

Nii kukijala mazuwa yose ayo?

21 Kivuze kwako weye Zumbe Mnungu, vileke naswe kikuwiiye!

Uvuze uhya nt'hunyo yetu enga aho kale.

22 Togola weye kukilemela vitendese?

Hegu kukiihiya vitendese?