1 Uno nuwo ulosi Zumbe Mnungu amgubuile mlotezi Habakuki.

2 Weye Zumbe Mnungu, nohwiile weye unambize mpaka ini? na weye ukaleka kuniiva na kunambiza, Togola nakuwiila kwa mbuli ihile ukaleka kuniyokola? 3 Nii wanitenda niyaombokele maihi na makunt'ho? Ubanangi na masulumizo yanizunguluka miye, kutowana na mahigano yatendesa. 4 Kwaivo umwiko haukudamanywa ivo ukuungwa kudamanywa hegu uwagilwa haukudamanywa. Waihi wawahuma wawagilwa, ivo hawakusengela kwa uwagilwa.

5 Zumbe Mnungu niyo awagamba, Kauleni want'hu we ziisi zint'huhu mkaule, nanywe nomwituke na kwehelwa. Kwaviya nenidamanye kint'hu mwe mazuwa yenyu mkwikala, nanywe hata mnagambilwa homhuwile. 6 Nenidisigile fyo dya watowani dya Wakalidayo diwakump'hukile, watowani awo wana nk'hani na wamunk'hiswa naho wazunguluka mwe isi yose na kuwahoka kaya zenyu. 7 Awo ni want'hu wa kutisa na wakogohwa, wakesaguila wenye cho kudamanya na hawakuzumila umwiko.

8 Falasi wawe wahufu kuguluka kujink'ha suwi, naho watendesa ukali kujink'ha uzi wata sala. Wakugendeza falasi walawa hale, wapilika enga mp'hungu enga ivo ikupola.

9 "Watowani wose naweza kwajili ya kuwabananga want'hu watuhu, futa zawe zatisa, womboka kulongole enga mp'heho ya kwe dijangwa, na kuduganya watahigwa enga msanga wa kwe bahali. 10 Wawabela maseuta na kuwasogola vilongozi. Waiseka imizi yose izungulusilwe magomela, wakaduganya viumbiko va ulongo na kukwela kuitaha mizi yawe. 11 Ivo wombokesa enga mp'heho, wadamanya masa kwaviya mnungu ywawe awenk'ha ludole."

12 Togola hiyo weye Zumbe Mnungu kulawa aho nk'hongo, weye ni weye Mnungu ywangu nawe ni mkuki naho hukubanika. Weye Zumbe Mnungu kuwasagula Wakalidayo wakisengele, Weye wili luwe lwangu kuwasagula vileke wakisengele suwe. 13 Weye kukuka hukudaha kukaula yaihile, Nii haluse wakaula wakudamanya yaihile na kunyamala?

Nii wanyamala kuona umwo want'hu waihi wakawabinda want'hu wedi kujink'ha woho?

14 Kuwatenda want'hu enga samaki za mwe bahali, na enga viumbwa vikutambala heviina kilongozi. 15 Wakalidayo walowa want'hu kwa nduano, enga samaki na kuwaduganya mwe dizuwa dyakwe no kunda na kinyemi! 16 Ivo wazitambikilaga zinyavu zawe na kufunk'hiza ubani kwaviya zinyavu zawetenda wekale vedi naho zawegaila nk'hande yedi.

17 Togola want'hu awa hawagendele kutowana nk'hondo, na kuwabananga want'hu wa si nt'huhu haheina mbazi?