1 Mlotezi Habakuki alombeza ivi,

2 Weye Zumbe Mnungu hiva mbuli zako

na miye nogoha yadya udamanye,

uyadamanye naho mwo lupisi lwetu

yatende yamanyike mwe miyaka yetu,

ukanda na maya chakulombeza ukionele mbazi.

3 Mnungu keza kulawa Temani

Mnungu akukile keza kulawa mwo mnima Palani.

Ung'azi wakwe ugenyela kwe mbingu,

na want'hu wose wa mwe si wamtogola yehe.

4 Ung'azi wakwe ni enga zuwa dikulawa,

miali yakwe yamulikaga kulawa mwo mkono wakwe

umwo ludole lwakwe nolufiswa.

5 Ayegala manyonge yaihile kulongole kwakwe

kunyuma kwakwe atimilwa ni ubanangi.

6 Anakimala si yasingisika,

akasinya want'hu wa mwe si wazingiza.

Milima ya kale yatulika tulika.

Vinenengwa va kale vagwa

sila zakwe zekala ni za ulo na ulo.

7 Nawaonaga want'hu wa Kushani wakasulumila,

na want'hu wa Midiani wakazingiza.

8 Weye Zumbe Mnungu, togola kuihia imito?

Togola kuihia vizuto?

Togola kuihia mazi ya mwe bahali

Hata kugendeza falasi zako,

na magali yakugendezwa na falasi kupata uhumi.

9 Kuiika lumwe uta wako,

niyo wagela misale yako mwe sigi.

Na kuitenda mito itule isi.

10 Milima neikuona niyo yazingiza,

malawo niyo yomboka uumwo yetika kulawa kulanga,

mina ye bahali niyo yant'hint'hila,

na mjubwaniso wakwe niyo weza kulanga.

11 Zuwa no mnenge nevinyamalisa mwo ulanga,

kwa ung'azi wa misale yako ikulasigwa,

ung'azi wo mjungo wako ukametameta.

12 Kwa maya yako wombokaga mnanga mwe isi,

na kwa maya yako kuwajata want'hu wa si zose.

13 Nokwiza kuwayokola want'hu wako,

kumyokola yudya umsagule kwa kumkumba mavuta,

Umhondile kilongozi we difyo dya waihi,

na kuwabananga pele fyo dyakwe.

14 Kwa mjungo wako mwenye wawatulaga mitwi yawe,

watowani wakwe wazaga enga kasungula vileke kisambale,

wakanda na kinyemi enga we hagihi na kukifunj'ha, wadya wasokezi wandile mwe kukefisa.

15 Wombokaga mwe bahali kwa falasi zako

bahali ikuzungulukwa ni mjubwaniso.

16 Nevaga mwo moyo wangu niyo nogoha,

milomo yangu niyo yazingiza ize ive izwi,

usokezi niyo wanyatila mwe mavuha yangu,

na viga vangu havikudaha kugenda,

Hata ivo nenigojele mwe dizuwa idyo dyo ubanangi dikuwezila wadya wakukukimp'hukila.

17 Ikanda mtini hakusuka mabwali,

naho hahana zabibu mwo mzabibu,

ikanda mzeituni haukweleka,

naho hata migunda haikulava nk'hande,

ikanda hahana ngoto mwe didewa,

hegu ng'ombe mwe didewa,

18 Miye nenigendee kunda na kinyemi mwa Zumbe Mnungu,

nenewange kwa Zumbe Mnungu myokozi wangu.

19 Zumbe Mnungu niye ludole lwangu,

aitogeza viga vangu kunda na ludole enga mbala,

aitenda idahe kombokela mwe milima.