1 Miye nenikimale mwe kaheha kwo luzo, nikaule idyo naanigambile naho ni uhituzi wani nenihitule mwe mbuli ino, uhituzi wa Zumbe.

2 Zumbe Mnungu niyo ahitula ivi, "Wandika aya huunga hulagise naho yawandike pwilili mwe vibao vileke kila mnt'hu akomboka aho ayasome. 3 Yadya hulagise uyaandike yagojele mwo lupisi noluzumilwe, nayo yasunguza kwiza mwe mazuwa yo uheelo, uneva yanasunguza kwiza. weye ugojele du kindedi hayasunguze kwiza. 4 Wakaule wana kitugu naho awo nawabanike, mna awedi nawekale kwa kumhuwila Mnungu."

5 Kindedi divai yazaganya, mnt'hu mta weduvi heekalise, kakeika lumwe kuwegala watuhu kwo kubanika, naho hekwiguta na kukeduganyila want'hu we si zose naho awetenda want'hu wose kunda wakwe. 6 Kila mnt'hu naambele mnt'hu enga uyo na kumtuwila wila wa kumsezenga, "Hangi weye mwenye ukukeduganyila vint'hu hi vako na kuguhila want'hu vint'hu vawe haheina kuvuza, nougendeele kudamanya ivo mpaka ini?"

7 Mna zuwa dimwenga wakuunga uwalihe nawasunguze kwiza, Togola wadya wakukutigiza naweze? Togola hawenuke na kukutisa? Aho nawakugwile na kukutenda mtahigwa ywawe. 8 Kwaviya kutaha ugoli wa want'hu wa si nyingi, mna nawasigale nawakutahe weye, kwaviya kwitila sakame ya mnt'hu na kuibanaga isi na mizi, na kila yumwenga mndani mwakwe.

9 Hangi weye mwenye ukuzenga nyumba nk'hulu mnanga mwo mnima kwa kuwahujila want'hu, nyumba iyo ukafanyanya kugamba nowinde hale na makunt'ho! 10 Mna kwa mizungu yako yo ubanangi kusulumiza want'hu wengi, kwa kubananga si nyingi, naho weye mwenye noukomigwe. 11 Nivo vikuleka hata maiwe nayalabile mwo lukandula, na mp'hapi ze nyumba nazo nezitende iivo.

12 Hangi weye mwenye ukuzenga mzi kwa kuwakoma want'hu na kuukimalisa mzi mkulu kwa uwihi. 13 Togola Zumbe Mnungu mta udahi niye akukint'hiza kukombekesa kwa want'hu kwagile mwo moto na want'hu we si zidamanye ndima heeina kint'hu? 14 Kwaviya want'hu nawameme mwe isi kwa kuumanya ung'azi wa Mnungu enga viya mazi yakugenyeela mwe bahali.

15 Hangi weye mwenye ukuwenk'ha wambwizo mp'hombe vileke iwatende wakolwe kwa kuwagidila mp'hombe mwe kazae vileke uwone ivo wekale kimbwigili. 16 Noune soni na want'hu hawakutunye. Nowiinywe we mwenye na kuzembeduka. Zumbe Mnungu mweye naakutende ukolwe na soni nezinde mwako. 17 Maihi ayo uwadamanyile want'hu wa Lebanoni noukuuwiye weye mwenye, na ubanangi uidamanyile mifugwa noukutise, naivo uwakoma want'hu wakwikala mwe mizi ino na kila yumwenga mndani mwakwe.

18 Mahili yasongolwe ni mnt'hu yana ndima yani? Ni hili dilungumlwe du dikuhiniza udant'hi, kwaviya wadya wadamanye dihili wadihuwila dihili hedikulonga! 19 Hangi weye mwenye uyo naaugambe "mti inuka!" Hegu "iwe kimala!" Togola hili dyadaha kuhiniza mnt'hu? Kaula ihakigwa zahabu na masawa, mna haina ugima wowose.

20 Mna Zumbe Mnungu eyumo mwe nyumba yakwe ikukile, want'hu we si zose wanyamale kwakwe.