1 येशुले आसिइयाङजन आहानङन ऐआढोवाङ, "तोलोअ रु ले अङ्गुरल बिरवा लाइस्यु नकाल चारवरङन बार आकरापौ, ओटन कोंलल खाल्टा आवोऊ। ओटन यिउबाइ जाएस्यु नकाले अङ्गुरल बारी काङ्का अढिया वालाङजन आयोवाङ, ओटन ओलं बाहेर प्रदेस देए लागिऊ।"✝ 2 बाली मीनन्या बेलाक नाले नका अढिया वालाङ्ङन तचियाए आजाएल बठा होनौ नाल्ट तोलोअ आमि सेवाऱ्याङ आपरिङौ। 3 तर नकाङै नका नोक्करजन कोलोअस्यु राटुपौ ओटन धाङ्गिल कुई रांपरिङौ। 4 फरि ना खसमले नकाङ ल्योङ तोलोअ सेवाऱ्याजन आपरिङौ, तर अढियावालाङै नकाल ङएट रातुप्‌स्योव ओटन नाल बिज्यात रांढोव। 5 खसमले फरि बै छुट्टैजन आपरिङौ, तर नकाङै ओजन बै रासटौ, ओटन अपुर तबर नोक्करयाङजन आपरिङवाङ, तर नकाङै ख्वाएजन रातुप्वाङ, ओटन ख्वाएजन रासएवाङ। 6 "आब तोलोअजाई बाङ्की लिज्याऔ नकाल आ ङानिज्युन्या ज़ा। ‘नकाङै ङाज़ाझन्टा आदर ऐढोरा’ ऐलेस्यु सोगलै आसापट नकाले ओइजन नकाङल्योङ आपरिङौ।"

7 "तर ना अढियावालाङ रारांल ऐलेवाङ, ‘ईका ता हकदार दी। रांचिते, गे इकाजन सएन्या, ओटन हक गेमिइ ताहा।’ 8 ओटन नकाङै नाजन कोलोअस्यु रासटौ, ओटन अङ्गुरल बारीलन बाहेर देए रांक्याहौ।" 9 येशुले आसिइयाङजन आगिन्वाङ, "तब अङ्गुर बारील साहूले नै कैलेऊ? नका रांया, ओटन ना अढिया वालाङजन नस्ट जाटौरा, ओटन अङ्गुरल बारी अपुर छुट्टै अढिया वालाङजन योंवरा। 10 नैति जे पबित्रशास्त्रलं ईका बचन जेमापरीचिऊ? ‘जो लुङजन झिम जाएन्याङै बिकामला राठहऱ्याहौ नकाईज सुरल ङएटा लुङ ताहौ,✝ 11 ईका परमप्रभुङन ताहौ हो, ओटन गे नजरत ईका अचम्मलाइ लेया।’"✝ 12 नालछिन्ट यहूदी अगवाङै येशुजन कोलोकौ रारोकौ, दानाङभन्या नकाङ सनस्यु लेवाङ कि आहान ओले ओयाङलै बिरोद त छ्योङज्याऔ ऐलेस्यु रायिङौ, नैताइस्यु ओयाङै बुजिन्याता राबुजिऊ। तर नकाङ रुयाङ हुल लेऊक राछ्याटौकाले ओलजन राइस्यु हिन्वाङ।

13 छिन्ट येशुजन छिन्ङन फसाहौ नाल्ट नकाङै फरिसीयाङ सनर हेरोदीयाङ तन ख्वाए रुयाङजन आल्योङ रापरिङवाङ। 14 * नकाङै रा:स्यु येशुजन रांढोव, "औ गुरुज्यू, गे ऐसन्या, नङ सत्य लेना, ओटन काङ्काईल वास्ता माढोन्दी। दानाङभन्या नङ हा खिमस्यु काम माढोन्दी, तर परमेस्वरलं सत्य यम ह्युउना। पानस्यासिन्ते कैसरजन तिरो यांन्या ठिक लेऊ, सन् मालेव, गे तिरो योईसन मायोई?" 15 येशुले नकाङल कपट सनस्यु नकाङजन आढोवाङ, "जे दानाङ ङाजन फसाहौ रोअज्याच्यो? तोलोअ चान्दील ध्याअ होनस्यु ङाजन खिमौ यिङचिते।" 16 नकाङै तोलोअ चान्दील ध्याअ राहोनौ। येशुले नकाङजन ऐआढोवाङ, "ईका सुरुप सनर मिन काङ्काल?" नकाङै ओजन ऐराढोव, "कैसरलं।" 17 तब येशुले नकाङजन ऐआढोवाङ, "कैसरलं लेकन, कैसरझन्ज योंचिते, ओटन जो परमेस्वरले परमेस्वर झन्ज योंचिते।" तब नकाङै आछेन थएस्यु अचम्म ताइवाङ।

18 फरि ख्वाएयाए अबिस्वासी सदुकीयाङ येशु ल्योङ रांवाङ, ओटन सिस्यु पुनरुत्थान माताइच्यो ऐलेस्यु ओलजन रांगिनौ,✝ 19 "औ गुरुज्यू, मोशाले गेजन सरस्युई यांस्यु नाएवा, कि काङ्काङै दाज्यू बिना सन्तान सिऊ ओटन नका मेएमाजन आमिईज भाईले ब्याहा ढास्यु आदाज्यूल नाल्ट सन्तान नाएन्याई ताहा।"✝ 20 "तोलोअ जाहानल साट भाई लेवाङ। ओयाङ तन जेठाले तोलोअ मेएमा ब्याहा आढोव, ओटन ना बिना सन्तान ताइस्युई सिदा। 21 आब माईला आभाईले ना मेएमाजन ब्याहा आढोव, ओटन ना बै बिना सन्तान ताइस्युई सिदा, ओटन साईलाल बै नैजै ताहौ। 22 ओटन साट जनाई भाईल सन्तान माताइदुरा। सोगल रासिऊ छिन्ट नका मेएमा बै सिदा। 23 आब सिन्याङ पुनरुत्थान राटाहौ बेला नका साट जनातन ना काङ्का वालाल मेएमा ताहौ? दानाङभन्या नकाङ साटै भाईले नकासं ब्याहा ढास्यु नाएरा।" 24 येशुले नकाङजन आढोवाङ, "जे अन्टातोल जेपरिन्या नैताइस्यु माङडी का, जे न त पबित्रशास्त्रजन सनच्यो, न त परमेस्वरलं सक्तिजै सनच्यो? 25 दानाङभन्या जब नकाङ सिन्याङ ङन बान्चिस्यु सोर। तब नकाङ न त ब्याहा धोर, न त नकाङल ब्याहा ताह तर नकाङ स्वर्गला दुतयाङ मन्जै ताइरा। 26 सिन्याङ जिङदा ताइस्यु सोन्याल बारेल नैति जे मोशाल ब्यबस्थाला किटापल जेमा परिचिऊ? कि कैलेस्यु पथरक्यांल बारेङन सरसिन्या पन्डाल मोशाजन ऐआढोव, ‘ङा अब्राहामल परमेस्वर, इसहाकलं परमेस्वर सनर याकूबल परमेस्वर ज्या।’✝ 27 परमेस्वर ता सिन्याङल परमेस्वर माङडी, तर जिङदाङल परमेस्वर हो। जे भ्याई भरमल जेपरिचिऊ।"

28 शास्त्रीयाङ तन तोलोअ रांऔ, ओटन नकाङ रारांल रांछ्योङज्यान्या आठटौ। येशुले रुयाङजन चान्यासै जबाक आयांज्यान्या, थएस्यु नकाले येशुजन आगिनौ, "ईका सोगल आग्याङ ङन घिन्या काङ्का हो?"✝

29 "येशुले जबाक आयोवाङ, सोगलैभन्या घिन्या आग्या ईका ज्या, ‘ऐ इस्राएल थएचिते, परमप्रभु गेमि परमेस्वर तोलोअ जै परमप्रभु ज्या।✝ 30 नङ परमप्रभु न परमेस्वरजन, नमी सोगलै यिङले, नमी सोगलै परानले, ओटन नमी सोगलै सक्तिले प्रेम ढोते।’ 31 ओटन छुट्टै आग्या आकाई ज्या, ‘नङ नमी डेराबारालाङजन नङ मन्जै प्रेम ढोवरते।’ इकातन घिन्या छुट्टै आग्या माल्दी।"✝

32 नका शास्त्रीले येशुजन आढोव, "औ गुरुज्यू, नङ भ्याई सत्य छ्योङना, कि परमेस्वर तोलोअ जै लेया, ओटन छुट्टै अपुर काङ्काई परमेस्वर माल्दी।✝ 33 नैताइस्यु नङ न परमेस्वरजन सोगलै यिङले, सोगलै यादले, सोगलै बर्गतले प्रेम ढोते, ओटन डेराबारालाङजन नङमन ज प्रेम ढोते ओटन सोगलै पशु बलि सनर अपुर बलियाङतन बै भ्याई चान्या हो।"✝ 34 नकाले यिङसिस्यु जबाक आयांन्या रङस्यु येशुले नकाजन ऐआढोव, "नङ परमेस्वरलं राज्यतन लोएङ मालेन्दी।" नका बेलाकन ओलजन गिनन्या काङ्काईल हिकमत माताइदा।

35 ओटन मन्दिरलं आह्युउज्याऔक येशुले ऐलेऊ, "ख्रीस्ट कैलेस्यु दाऊदल ज़ा ताहौ? ऐलेस्यु ब्यबस्याला शास्त्रीयाङै ऐलेवाङ? 36 दानाङभन्या दाऊदले ओलजै पबित्र आत्माङन ऐलेस्यु लेया परमप्रभुले ङा प्रभुजन ऐआढोव, ‘नङ ङा दाइन्याङन चुङनते, जब समन ङा नशत्तुरयाङजन नखङ पाईटला न्युउल मानातङ।’✝ 37 जब दाऊदले ओलं ओलझन्जै ‘प्रभु’ ऐलेऊ, ओटन काङन ओलं आज़ा ताहौ?" ओटन नङा घिन्या हुलले ओलं बचन हेसाङस्यु राथटौ।

38 ओटन येशुले सिक्छ्या आयांज्याऔक ऐलेऊ, "शास्त्रीयाङ्ङन होसियार ताइचिते नकाङ ल्होन्या क्वा क्वाएसिस्यु हुदेएअदेए डुलिन्या सनर बजारल रुयाङै धोक रायांन्या चाहिरा, 39 अथाबा यहूदी आराधना झिमल घिन्या-घिन्या मान सनर भोस ज्युउल घिन्या-घिन्या मान डोएन्या निज्युरा। 40 नकाङ बिदवाङल झिम लुटिरा, तर थनन्याल नाल्ट ल्होन्या-ल्होन्या प्रार्थना ढोरा। ऐटाइन्या रुयाङै भ्याई दन्डसजाय डोएरा।"

41 ओटन येशु मन्दिरलं भिटी चराइन्या बेला ओक चुङस्यु खिमज्याऊ, कि मन्दिरलं कैलेस्यु भिटी रांयोव, ओटन भ्याई साहूयाङै तबर राझोकौ। 42 ओटन तोलोअ गरिब बिदवा मेएमाले रा:स्यु ताम्बाल नेंलोअ छिनछिन्या आचराहौ। ना तपैसा बराबरला लेऊ। 43 आसिइयाङजन आल्योङ खुल्स्यु ओले नकाङजन ऐआढोवाङ, "मछ्यु ङा जेजन ऐढाच्या, भिटीलं जाल चराइन्या वालाङ तन ईका गरिब बिदवा मेएमाले सोगलैतन भ्याई आचराहौ। 44 दानाङभन्या सोगलैले रांमि धन भ्याईलन रांचराहौ, तर ईका मेएमाले अभाबङन बै जो ज्वाए आमि लेऊ, ओ सोगलै आजिबीकाईज चराइदा।"