1 फरि येशु आराधना झिमल हिनौ। नल आकुई राङन्या तोलोअ रु लेऊ। 2 किगर्दाङ शबाथ-छिम्क येशुले नाजन आसबेलौ सन् आमासबेलौ लेस्यु, येशुजन दोस लाहौ नाल्ट रुयाङ काङ्काङ आचेवाल लिज्यावाङ। 3 तब ओले आकुई राङन्या वाला रुजन ऐआढोव, "रुयाङ खार्ल च्याङनते।" 4 ओले नकाङजन ऐआढोवाङ, ब्यबस्थाला नियाम अनुसार "शबाथ-छिम्क भलाई ढान्या ठिक लेऊसन? माचान्या ढान्या, परान जोगाइन्या सन् नास जाएन्या?" नै ठिक लेऊ? तर नकाङ छपक्कै दिङवाङ।

5 नकाङ यिङला कठोरताले गर्दा दुख मानिस्यु नकाङजन आयिङ चोस्यु चारवर आखिमौ, ओटन नका रुजन ऐआढोव, "न कुई पसारते" नकाले आकुई आपसारिऊ ओटन नाल कुई बेल्दा। 6 तब फरिसीयाङ आराधना झिमलन पलिईस्यु पाखाल हिन्वाङ, ओटन येशुजन सटौ नाल्ट ओचोएटै हेरोदीयाङ सकाए सल्ला ढाऔ तअसिवाङ।

7 नाल छिन्ट येशु आ सिइयाङ सकाए समुन्दर वङल हिन्वाङ, गालील प्रदेस सनर यहूदाला पोलन, रुयाङल घिन्या हुल येशुल छिन्ट लागिवाङ। 8 यरुशलेम सहरङन, इदुमिआला, यर्दन भईल पुर्बङन टुरोस सनर सीदोनल नावङला पोलन सोगल रुयाङल घिन्या हुल येशु ल्योङ रांवाङ, ओटन नकाङै थएस्यु रांनाटौ कि नाले अचम्मला काम ढाज्याऔ। 9 हुलले ङाजन तामिचिङरत्या ऐलेस्यु येशुले आ सिइयाङजन आ नाल्ट तोलोअ इङन्या डोङ्गा तयार जाटौ आपरिङवाङ।✝3:9 मर्कुस ४:१; लूका ५:१-३ 10 येशुले तबर रुयाङजन आसबेलौकाले, रोगियाङ सोगलैले ओलजन छुङा लेस्यु रांहिनौक थुईसिवाङ। 11 जब दुस्टआत्मायाङै ओलजन रङर, तब आहाक गोम लेस्यु ऐलेस्यु कलिऊरा, "कि नङ परमेस्वरलं ज़ा ज्या।"

12 तर येशुले दुस्टआत्माङजन कडा चेताउनी आयोवाङ, कि ङा काङ्का ऐलेस्यु तापानच्यो।

13 नकाल छिन्ट येशु डान्डाल वूमौ, ओटन येशुले आचाहिन्या भरिजन आखुल्वाङ, ओटन नकाङ येशु ल्योङ रांवाङ। 14 ओटन येशुले बारं सिइयाङजन आछेल्वाङ, ओटन नकाङजन प्रेरित मिन आनाएस्योवाङ, ओटन नकाङजन आढोवाङ, जे ङासै लिज्यान्याल नाल्ट सनर ङा जेजन परमेस्वरलं चान्याथाई प्रचार ढाऔ नाल्ट ङाछेल्चिऊ, 15 ओटन नकाङजन दुस्टआत्माङजन पलिईन्या "अढिकार बै आयोवाङ।" 16 नका बारं प्रेरितयाङ इकाङ हो सिमोन, जोल मिन येशुले पत्रुस आनाटौ। 17 जब्दियाल ज़ा याकूब सनर याकूबल भाई यहुन्ना। ओले नकानेलोअजन बोअनर्गेश अथाबा "गर्जनल ज़ानें" ओमनलेन्या मिन आयोवने। 18 अन्द्रियास, फिलिप, बारथोलोमाइ, मत्ती, थोमा, अल्फयसलं आज़ा याकूब, सनर थेदियस, सिमोन कनानी, 19 ओटन यहूदा इस्करियोत जोले येशुजन धोखा यांस्यु कोलोकौ आपरिङौ।

20 तब येशु फरि झिमदेए हिनौ। नल फरि तपाला आवाए घिन्या रुयाङ हुल दुउसिवाङ, कि येशुले ज्यान्या ज्यावनाम बै माडोएदा। 21 जब येशुल जाहानयाङै ईका राथटौ तब ओलजन लाङन्या लेस्युकने नकाङ झिमलन पलिइवाङ, दानाङभन्या रुयाङै येशुल यिङ आथअल माल्दी ऐलेवाङ। 22 ब्यबस्थाला ख्वाएयाए शास्त्रीयाङ जो यरुशलेम सहरङन रा:स्यु लेवाङ, नकाङै ऐलेवाङ, "नकात बालजिबुल भूत लेया, ओटन भूतयाङल खसमलं बलले ज भूतयाङजन पलिटौरा।"✝3:22 मत्ती ९:३४; १०:२५ 23 तर नकाङजन आल्योङ खुल्स्यु आहानङन छ्योङौ तअसिऊ, "सैतानले कैलेस्यु सैतानजन पलिटौ ढुदुऊ?" 24 यदि काङ्का राज्ययाङ रारां बिरोद ढास्यु च्याङदुरा भन्या नका राज्यले कैलेस्यु बोलोङ लिज्याऔ ढुदुऊका। 25 ओटन यदि काङ्का झिमल बै रारांल मामिलिरकन नका झिमल बै तनस्यु लिज्याऔ माढुदुरदी। 26 ओटन यदि सैतानले सैतानले बिरोदत च्याङस्यु मामिलिरकन ओयाङ बै टनौ माढुदुरदी, तर नकाङ बाठए-बाठए ताइस्युई मांरा।

27 जो कोबाअले बलल्या रुल झिमल पसिस्यु नकाल धनसम्पत लुटिऊ माढुदुऊदी। नैताइस्यु जब समन नाले पहेला नकाले नका बलल्याजन मापोकौ। तब समन नाले झिम लुटिऊ माढुदुऊदी।

28 "ङा जेजन मछ्यु ऐढाच्या, सोगलै रुयाङल पाप सनर ईस्वर बिरोदल छेमा ढान्यालेसिया, 29 तर पबित्र आत्माल बिरोदत यदि बाए ढोच्योकन ना खकै बै छेमा ढान्यामाल्सिदी। मानकन्ता नका अनन्त पापल अपरादि ठहराइसिया।"✝3:29 लूका १२:१० 30 येशुले ईका बचन ऐलेस्यु छ्योङौ, ओटन ना शास्त्रीयाङै "नका ल्योङ अशुद्दआत्मा लेऊ" ऐलेस्यु नकाङै ऐलेवाङ।

31 तब येशुल आअमा सनर आभाईयाङ नल रांवाङ, ओटन बाहेरलै च्याङस्यु ओलजन खुलौ रांपरिङौ। 32 रुयाङल हुल येशुल नावङल, चुङज्यावाङ ओटन नकाङै येशुजन ऐराढोव, "खिम्ते, नाअमा सनर नभाईयाङ पाखाल नङजन रोअज्यावाङ।" 33 येशुले नकाङजन जबाक आयोवाङ, "ङाअमा सनर ङा भाईयाङ काङ्काङ?" 34 ओटन ओले चारवर खिमस्यु ऐआढोव, "ब्याएचिते, इकाङ ज्या ङाअमा सनर ङा भाईयाङ। 35 दानाङभन्या जोले परमेस्वरलं इच्छ्या पालन ढोव नकाङज ज्या ङा भाईयाङ सनर ङा बैनाङ ओटन ङाअमाङ ज्या?"