1 येशुले प्रार्थना आढाऔ छिन्ट आसिइयाङसं किद्रोन खोल्सा हुदिफन हिनौ, नङ तोलोअ बारी लेऊ ओटन आसिइयाङसं ओलं हिन्वाङ। 2 ओलजन कोलोअन्या यहूदाले बै नका पो शईस्यु लेऊ, दानाङभन्या येशु सनर आ सिइयाङ तबर पाला ओलं हिनस्युलेवाङ। 3 तब कजम्तिइ, भाङ सनर हतियारयाङ होनन्या सिपाइयाङल त बगाल सनर मुख्या पुजाउरो सनर फरिसीयाङै रापरिङन्या पाल्याङजन हिनस्यु यहूदा बारील रांऔ। 4 तब आयर्त परिरान्या सोगल छेन सनस्यु येशु हाङन रांऔ, ओटन नकाङजन ऐआढोवाङ, "जे काङ्काजन जेरोअज्याचिऊ?"

5 नकाङै ओजन ऐराढोव, "नासरतला येशुजन।" येशुले नकाङजन ऐआढोवाङ, "ङा ओइ ज्या।" आब ओलजन कोलोअन्या यहूदा बै नकाङसै च्याङज्याऊ। 6 जब येशुले नकाङजन ऐआढोवाङ, "ङा ओइ ज्या" ऐलेऊ, तब नकाङ छिन्देए हाएसिवाङ, ओटन नामल पाइवाङ। 7 फरि नकाङजन आगिन्वाङ, "जे काङ्काजन जेरोअज्याचिऊ?" नकाङै ऐलेवाङ "नासरतला येशुजन।" 8 येशुले जबाक आयोवाङ, "ङा जेजन ऐढादुच्या, कि ङा ओइ ज्या। नैताइस्यु यदि जे ङाजन रोअज्याङच्योकन ईका रुयाङजन हिनौ योंचिरते।" 9 "नङ ङाजन नयांन्याङ्ङन तोलोअजन बै ङा मागवाइदुङरा" ओले ऐआलन्या बचन पुरा ग्याताइत्या ऐलेस्यु ईका ताहौ।

10 सिमोन, पत्रुसले ओलसं लिज्यान्या तरवाल हाएस्यु मुख्या पुजाउरोल सेवाऱ्याजन आराइस्याऔक नकाल दाइन्या ना च्वाट्टै आपलस्यौ। नका सेवाऱ्याल मिन हो माल्खस। 11 येशुले पत्रुसजन ऐआढोव, "तरवाल सिपल झोअते। नैति बौले ङाजन आयांन्या कटौरा ङा माओङा?"✝

12 "नालछिन्ट रोमी पाल्याङल बगाल, नकाङल कप्तान, सनर यहूदी अढिकारीयाङल पाल्याङै येशुजन राकोलोकौ, ओटन ओलजन रांपोकौ। 13 हादेए नकाङै ओलजन हन्नासल्योङ रालाङौ, जो नका साल्ला प्रधान पुजाउरो कैयाफाल मामा लेऊ। 14 ईकाइ कैयाफा ज्या, जोले ‘जनताल नाल्ट तोलोअ रु आसिन्याई चान्या लेया’ ऐलेस्यु यहूदी अढिकारीयाङजन सल्ला यांस्यु आनाएवाङ।"✝

15 सिमोन पत्रुस सनर येशुल छुट्टै तोलोअ सिइ येशुल छिन्ट लागिऊ। ना छुट्टै सिइ प्रधान पुजाउरोल नशईन्या लेऊ, ओटन येशु सकाएजै प्रधान पुजाउरोल ठरबाङल हिनौ। 16 तर पत्रुस पाखाङ झलापत च्याङज्याऊका। जो प्रधान पुजाउरोले नशईन्या छुट्टैवाला सिइ, पाखाल पलिईस्यु झलापल चुङन्या किटीजन खुलौपरिङस्यु पत्रुसजन भितर आहोनौ। 17 तब झलापत चुङन्या नका किटीले पत्रुसजन ऐआढोव, "नैति नङ बै ईका रुल सिइयाङ्ङन तोलोअ माङडी का?" पत्रुसले ऐआढोव, "ङा माङडी" 18 नङ नोक्करयाङ सनर पाल्याङ भलाङज्यान्या मी मुनसिस्यु च्याङज्यावाङ, दानाङभन्या झिमज्याऔ। ओटन पत्रुस बै नकाङसं च्याङस्यु मी मुनसिऊ तअसिऊ।

19 आब प्रधान पुजाउरोल येशुजन आ सिइयाङ सनर आसिछ्यालं बारेल आगिनौ। 20 येशुले नकाजन जबाक आयोव, "ङा सङ्सारलं सोगलैजन प्रस्टै पानस्युलेङा। ङा सदाईज आराधना झिमजिऊल सनर मन्दिर जिऊल सिक्छ्या यांज्याङा, जोल सोगल यहूदीयाङ दुउसिरा। ङा गोप्यल नैज पानस्यु मालेङदी। 21 ङाजन दानाङ गिनज्याङ? ङा नकाङजन कैङाढोङवाङ ना थएन्याङझन्जै गिनौरते। ङा ङापानन्या छेनयाङ इकाङजन थाहै लेया।"

22 येशुले ईका छेन आपानौक नेराक च्याङज्यान्याङ पाल्याङ्ङन तोलोअले ऐलेस्यु येशुजन आलपत्याहौ, "नैति प्रधान पुजाउरोजन ऐलेस्यु जबाक योंना?"✝ 23 येशुले नकाजन ऐआढोव, "ङा गलत बयन ङायान्या ताहकन नकाल प्रमान यांङते, तर यदि ङा ठिकै ङापानन्या ताहकन ङाजन दानाङ टुपङ?" 24 तब हन्नासले ओलजन पोअसिज्यान्याईज प्रधान पुजाउरो कैयाफा ल्योङ आपरिङौ।

25 सिमोन पत्रुस च्याङस्यु मी मुनसिज्याऔ। नकाङै नकाजन ऐराढोव, "नैति नकाल सिइयाङ्ङन तोलोअ नङ बै माङडी?" नकाले माभनस्यु ऐआढोवाङ, "ङा माङडी।" 26 प्रधान पुजाउरोल सेवाऱ्याङ मध्य तोलोअ, जोल नालनाठाल नां पत्रुसले आपलस्यौ, नकाले आगिनौ, "नैति नङजन ङा नकासं बारील ङामारङनु का?" 27 तब फरि पत्रुसले इन्कार आढोव। ओटन ओचोएटै भाल्या कोव।

28 तब नकाङै येशुजन कैयाफाल झिमलन महल लेऊदेए आलाङौ। नवाए बेला छकाल्यादेए हो। जुठुउ परीस्यु निस्तार-पर्बल ज्यान्या ज्याऔ माढोतैदी ऐलेन्या, छ्याइले नकाङ महल भितरलं मापसिवाङ। 29 ऐताइस्यु नकाङल्योङ पाखा पलिईस्यु पिलातसले ऐआढोवाङ, "ईका रुल बिरोदत नैकाम दोस लाइच्यो?" 30 यहूदी अढिकारीयाङै ऐलेवाङ, "यदि ईका रु अपरादि माताहकन गे इकाजन नल्योङ मासुम्पिइदी।"

31 पिलातसले यहूदी अढिकारीयाङजन ऐआढोवाङ, "जे इकाजन लाङचिते, ओटन जे जेमिई ब्यबस्था अनुसार इकाल निया ढोचिते।" यहूदी अढिकारीयाङै ओलजन ऐराढोव, काङ्काई रुजन म्रित्युदन्ड यांन्या अढिकार गेसं माल्दी। 32 येशुल काल कैताइन्या रीतिले ताइन्या नकाल सङ्केट यांस्यु ओले आपानन्या बचन पुरा ग्याताइत्या ऐलेस्यु ऐताहौ।✝ 33 पिलातस फरि महल भितरलं पसिऊ, ओटन नकाले येशुजन खुल्स्यु ऐआढोव, "नैति नङ यहूदीयाङल रय रों?" 34 येशुले जबाक आयोव, "नङजै ऐलिज्याना, सन् ङाबारेङन नङजन अपुर काङ्काङै रापानस्यानु?"

35 पिलातसले जबाक आयोव, "नैति ङाक्या यहूदी का? नरुयाङ सनर मुख्या पुजाउरोयाङै नङजन ङाकुईत रा:सुम्पिनु। नङ नै नढोनु?" 36 येशुले जबाक आयोव, "ङा राज्य ईका सङ्सारला माङडी ङा राज्य ईका सङ्सारलं आलन्या ताहकन्ता ङा सेबकयाङ ङा नाल्ट खप्सिदुरा होला, ओटन ङा यहूदीयाङ कुईत परिन्या मालेङदी। तर ङा राज्य ईका सङ्सारलं माङडी।" 37 पिलातसले ओलजन आगिनौ, "नै नङ रय ज वन?" येशुले जबाक आयोव, "ङाजन नङजै रय ऐढाङज्याना। इकालै नाल्ट ङा ङाजर्मिङु हो, ओटन इकालै नाल्ट सत्यल बयन यांन्या ङा ईका सङ्सारलं ङारांङु हो। सोगल जो सत्यल पक्छेल ले, नकाले ङा ग़ा थएवा।"✝ 38 पिलातसले ओलजन आगिनौ, "सत्य नैति?" छेन छ्योङस्यु ओलं यहूदी अढिकारीयाङ ल्योङ पाखा पलिईस्यु हिनौ, ओटन नकाङजन ऐआढोवाङ, ङा इकाल नैज दोस माडोटङदी।

39 "निस्तार-पर्बक बेलाक जे नाल्ट तोलोअजन राइस्यान्या जेचलन लेया। कि यहूदीयाङल रयजन राहङ सन् कैजेल्चिऊ?" 40 तर नकाङ फरि ऐलेस्यु कलिऊवाङ, "इकाजन माङडी, बारब्बाजन।" बारब्बा डाङ्का लेऊ।