1 ईका आपानौ छिन्ट येशुले आ म्युउ स्वर्गदेए खिमस्यु ऐलेऊ, "औ बौ, समाय तापरादा, न ज़ाल महिमा सथन्ते। ओटन ज़ाले न महिमा ग्याथनौत्या। 2 दानाङभन्या नङ ओजन सोगलै रुयर्त अढिकार यांस्यु लेना, ताकि नङ ओजन नयांन्या सोगलै रुयाङजन ओले अनन्त जिबन ग्यायौरत्या। 3 आब अनन्त जिबन अर्थ ईकाइ ज्या, कि नकाङै नङ तोलोअयाएज सत्य परमेस्वरजन ग्याशईरत्या, ओटन नङ नपरिङन्या येशु ख्रीस्टजन ग्याशईरत्या। 4 जो काम नङ ङाजन नयांङनु, ना पुरा ढास्यु नङजन ङा पिरथ्बील न महिमा ङाढोङु। 5 औ बौ, आब सङ्सारला स्रिस्टी आताहौ हादेए न सामन्दी जो ङा महिमा लेऊ, नैकाईले न उपस्थितिलं ङाजन महिमित जातङते।"

6 "सङ्सारलं जो रुयाङ नङ ङाजन नयांङनु, नकाङजन न मिनजन ङा थनसिस्यु लेङा। नकाङ नमीई लेवाङ, ओटन नङ नकाङ ङाजन नयांङनु, ओटन नकाङै नमी बचन पालन ढाज्यारा। 7 नकाङजन आब थाह ऐलेया, कि नङ ङाजन नयांन्या सोगलै छेन नल्योङन रांऔ ज्या। 8 दानाङभन्या जो बचन नङ ङाजन नयांङनु, ङा नकाङजन यांस्यु लेङा, ओटन नकाङै ना ग्रहन ढास्यु लेरा। ङा नल्योङन ङारांङु ऐलेन्या नकाङै मछ्युजै सनस्यु लेरा, ओटन नङ ङाजन नपरिङनु ज्या ऐलेस्यु नकाङै बिस्वास ढास्यु लेरा।"

9 ङा नकाङल नाल्ट प्रार्थना ढोङा, सङ्सारलं नाल्ट ङा प्रार्थना माढोङदी, तर नकाङल नाल्ट, जोजोरुयाङ नङ ङाजन नयांङनु। दानाङभन्या नकाङ नमियाङ ज्या। 10 ङामि जो ले सोगलै नमीईज ज्या, ओटन नमी जो ले ओ ङामिइज ज्या। ङा महिमा नकाङ्ङन रंनौ। 11 "ङा फरि सङ्सारलं मालिज्याङदी," तर इकाङ ता सङ्सारलै लिज्यारा। ङा नल्योङ रांज्याङा। पबित्र बौ, नङ ङाजन नयांङन्या नमिनत नकाङजन सुरक्छित नाटौरते, ओटन घेनमन्जै नकाङ बै तोलोअ ग्याताइरत्या। 12 जब समन ङा नकाङ सकाए ङाल्ङु, नङ ङाजन नयांन्या सक्तिशाली मिनतन नकाङजन सुरक्छित ङानाटङवाङ। नकाङल रक्छ्या ङाढोङु। ओटन नकाङ्ङन बिनाशल ज़ा बाहेक अपुर काङ्काई नस्ट माताइदा, दानाङभन्या पबित्रशास्त्र पुरा ताइन्या आबस्यक लेऊ।✝ 13 "तर आब ङा नल्योङ रांज्याङा। सङ्सारलं ङाल्यौक ईका छेन ङा छ्योङ्ङा, कि नकाङल्योङ ङायिङलं आनन्दले पुरा ग्याताइत्या। 14 ङा नकाङजन नबचन ङायोङवाङ, तर सङ्सारले नकाङजन आसज्युवाङ, दानाङभन्या नकाङ सङ्सारलाङ माङडी, जोमनलेस्यु ङा सङ्सारला माङडी। 15 नङ नकाङजन सङ्सारलन लाङौरते ऐलेस्यु ङा प्रार्थना माढोङदी, तर नकाङजन दुस्टतन सुरक्छित नाटौरते। 16 जोमनलेस्यु ङा ईका सङ्सारला माङडी, ओमनलेस्युजै नकाङ बै ईका सङ्सारलाङ माङडी। 17 नकाङजन सत्य सनर पबित्र कामल नाल्ट रांईझन्ज समर्पित ग्याजाएरत्या, जो नमी बचन सत्य लेया। 18 जोमनलेस्यु नङ ङाजन सङ्सारलं नपरिङनु, ङा बै नकाङजन सङ्सारलं परिङस्यु लेङा। 19 नकाङल नाल्ट ङा ङाईझन्ज पबित्र जाएङा, ताकि नकाङ बै सत्यताले पबित्र ग्याताइरत्या।

20 "ङा इकाङ नाल्ट याएज प्रार्थना माढोङदी, तर इकाङ थाईतन ङाजन बिस्वास ढान्याङल नाल्ट बै प्रार्थना ढोङा, 21 कि नकाङ सोगलै तोलोअ ग्याताइरत्या। औ बौ, जोमनलेस्यु नङ ङासं नलिज्यानु, ओटन ङा नङत, नैलेस्युई नकाङ बै गेसकाए ग्यालेरत्या। ओटन नङ ङाजन नपरिङनु ऐलेस्यु सङ्सारले बिस्वास ग्याढोउत्या। 22 जो महिमा नङ ङाजन नयांङनु, ङा नकाङजन यांस्यु नाटङरा, ताकि जोमनलेस्यु गे तोलोअ गेताइयिउ नकाङ बै ओमनलेस्युई तोलोअ ग्याताइरत्या। 23 ङा नकाङत, सनर नङ ङात, ओटन नकाङ बअबनाई तोलोअ ग्याताइरत्या, ओटन नङ ङाजन नपरिङन्या, सनर ङाजन प्रेम नढान्यामन नङ नकाङजन बै प्रेम नढोन्वाङ ऐलेस्यु सङ्सारले ग्यासनौत्या।

24 "बौ, ङा इच्छ्या ढोङा, कि नङ ङाजन नयांन्या रुयाङ ङा जोङ लेङ ङासै ग्यालिज्यारत्या, ओटन ङा महिमा ग्यारङरत्या, जो महिमा, सङ्सारलं स्रिस्टी ताहौ हादेएजै ङाजन प्रेम नढाऔकाले नङ ङाजन यांस्यु नल्‌नु।" 25 "धार्मिक बौ, सङ्सारले नङजन माशईदुन्वा, तर नङजन ङा ऐशईना, ओटन नङ ङाजन नपरिङनु ज्या ऐलेस्यु इकाङै ऐसनज्यारा। 26 ङा नमिन इकाङ ल्योङ ङासथन्ङु, ओटन नमिन इकाङ ल्योङ सथनज्याङा, ताकि जो प्रेम नङ ङाजन नढाङनु, नका प्रेम नकाङल्योङ ग्यालत्या, ओटन ङा नकाङल्योङ ग्यालिज्याङत्या।"