1 फरिसीयाङ मध्य निकोदेमस मिनला तोलोअ रु यहूदीयाङल आराधना झिमला अगवा लेऊ। 2 तयोअ रिउल नका येशु ल्योङ रा:स्यु ऐआढोव, "गुरुज्यू, गे ऐसन्या। नङ परमेस्वर ङन रांन्या गुरु ज्या, दानाङभन्या परमेस्वरसं बोलोङ मालेन्कन ईका नङ नढान्या अचम्मला कामयाङ काङ्काईले ढाऔ माढुदुऊदी।" 3 येशुले नकाजन जबाक आयोव, "मछ्यु ङा नङजन ऐढाना,* यदि काङ्काङ छार ताइस्यु फरि माजर्मिरकन नकाङै परमेस्वरलं राज्य रङौ माढुदुरदी।" 4 निकोदेमसले येशुजन ऐआढोव, "रु शेरस्यु कैलेस्यु फरि जर्मिऊ ढुदुऊका? नैति ना आअमाल गर्बल फरि तपाला पसिस्यु जर्मिऊ ढुदुवा का?"

5 येशुले जबाक आयोव, "मछ्यु ङा नङजन ऐढाना, काङ्काङ री सनर आत्माङन माजर्मिकन* परमेस्वरलं राज्यल पसिऊ माढुदुऊदी। 6 बुललन जर्मिन्या बुल ज्या, ओटन आत्माङन जर्मिन्या आत्मा ज्या। 7 ङा नङजन छार ताइस्यु जर्मिन्याताहा ऐङालेऊक अचम्म तामानि। 8 घूईका जोदेए ङप्सी ओदेएजै उदिया। नङ घूईकाल ग़ा ऐठएना, तर ना काङन रांऔ, ओटन कान्देए हिनौ ना मासनन्दी। आत्माङन जर्मिन्या सोगलै रुयाङ नैज ताइरा।"✝ 9 निकोदेमसले येशुजन आगिनौ, "नै कढाई ताहौ आढुदुऊ?" 10 येशुले नाजन जबाक आयोव, "नङ इस्राएलला मानिसिन्या गुरु ताइस्यु बै ईका छेन नमासन्नु?" 11 मछ्यु ङा नङजन ऐढाना, गे जो सनई नाइ पान्या, ओटन गे जो रङस्यु गेलेयिउ नाइ बयन योंया, तर जे गे बयन माकोन्चिदी। 12 ङा जेजन पिरथ्बीला छेन ङापानस्याचिऊ ओटन बै जे बिस्वास माढोचिदी, ओटन जेजन स्वर्गला छेन पानस्याच्योकन कढाई बिस्वास ढोच्यो? 13 ओटन स्वर्गत हिनस्यु लांइस्यु रांन्या रुल ज़ा बाहेक अपुर काङ्काई माल्दी।✝ 14 जोमनलेस्यु मोशाले हरहर ताइन्या पोल डाङजन आछेनौ, नैलेस्युजै रुल ज़ा, बै छेन्सिन्या लेया,✝ 15 ओटन जोले ओजन बिस्वास ढोव, ओले अनन्त जिबन डोएवा। 16 "दानाङभन्या परमेस्वरले सङ्सारजन ऐटाइन्या प्रेम आढोव, कि ओले आमि तोलोअ याएज ज़ा आयोव, ताकि ओजन बिस्वास ढान्या काङ्काई बै नास ताटाइत्या, तर नकाले अनन्त जिबन ग्याडोटौत्या। 17 दानाङभन्या परमेस्वरले सङ्सारजन निया ढान्या ऐलेस्यु रुल ज़ाजन सङ्सारलं आपरिङौ माङडी, तर सङ्सारले ओल्योङन उद्दार ग्याडोटौत्या ऐलेस्यु आपरिङौ हो। 18 जोले ओलं यर्त बिस्वास माढोव, नका हादेए जै नियाल परीस्यु लेया, तर बिस्वास ढान्या नियाल मापरिदी, दानाङभन्या नाले तोलोअ परमेस्वरलं ज़ाल मिनतन याएज बिस्वास ढास्यु लेया।✝ 19 निर्नय आकाई ज्या ज्योति सङ्सारलं रा:स्यु लेया, तर रुयाङै ज्योतिल भन्या बरु च्युऊन्याजन रांनिजिऊ, दानाङभन्या नकाङल काम माचान्या लेऊ। 20 दानाङभन्या माचान्या काम ढान्या सोगलैले ज्योतिजन सज्युरा, ओटन ज्योतित मारारदी, मानकन्ता नकाङल कामयाङ रंनन्या लेरा। 21 सत्यङन बान्चिन्या रु ज्योतित रांया, ओटन नैताइस्यु नाले आढान्या कामयाङ परमेस्वरङन ढासिन्या ज्या ऐलेन्या छरलङ्गै रंना।"

22 ओलं छिन्ट येशु सनर आ सिइयाङ यहूदिया प्रदेसलं हिन्वाङ, ओटन नङ नकाङ सकाए तचिइ दिन लिज्यास्यु बप्तिस्मा आयोवाङ। 23 यहुन्नाले बै सालीमल वङ्क एनोनल* बप्तिस्मा यांज्याऔ, दानाङभन्या नङ री खाटखाट लेऊ। नाबेला नल रुयाङ रांज्यारा ओटन ओले नल बप्तिस्मा यांज्याऔ। 24 यहुन्ना नवाए बेला समन कैदल परीस्यु मालेऊ।✝

25 नाइ बेला यहुन्नाल सिइयाङ तोलोअ यहूदीसकाए चोखाइसिन्यालं बारेल यिसीइ ताहौ। 26 आल्योङ रा:स्यु नकाङै यहुन्नाजन ऐराढोव, "गुरु यर्दनल पुर्ब हूत जो नङसं लिज्याऔ, जोल बारेङन नङ बयन नयोनु, ब्याएते, ओले बप्तिस्मा योंज्याया, ओटन सोगलै ओ लेऊ देए हिनज्यारा।" 27 यहुन्नाले नकाङजन जबाक आयोवाङ, "जब समन स्वर्गङन रुजन मायासी तब समन नाले नैज छेन डोटौ माढुदुऊदी। 28 ‘ङा ख्रीस्ट माङडी, तर ङा ओटन हादेए ङापरिङसिङु हो’ ऐलेन्या ङामि बयन जे जै यांज्याच्या।✝ 29 जोसकाए दुलही ले, दुलाहा ओइ ज्या। दुलाहाल न्हाए नाइ ज्या जो आलेऊक च्याङज्या, ओलं ग़ा थएस्यु भ्याई आनन्दै ताहा। नैताइस्यु ङामि ईका आनन्द आब पुरा ताइस्यु लेया। 30 आब ओ बदिन्या, ओटन ङा घटिन्या आबस्यक लेया।

31 "हर्तन रांन्या सोगलैतन महान लेया। पिरथ्बीलन ताइन्या पिरथ्बीलाई ज्या, ओटन पिरथ्बीलाई छेन छ्योङा। स्वर्गङन रांन्या सोगलैतन महान लेया।✝ 32 ओले जो रङौ सनर थटौ, नाइ बयन योंवा, तर आमि बयन काङ्काईले ग्रहन माढोरदी। 33 जोले नकाल गवाइ ग्रहन ढोव, ओले परमेस्वर सत्य लेया, ऐलेन्या छेनल प्रमान योंवा। 34 दानाङभन्या जोजन परमेस्वरले आपरिङौ, नकाले परमेस्वरलै ग़ा छ्योङा दानाङभन्या परमेस्वरले असिमित* पबित्र आत्मा योंवा। 35 बौले आज़ाजन प्रेम ढोवा, ओटन सोगलै जन्तु ओलै कुईत सुम्पिस्यु नाएवा।✝ 36 जोले ज़ाल यर्त बिस्वास ढोव, नकाले अनन्त जिबन डोएस्यु लेया। जोले परमेस्वरलं ज़ाल आग्या मामानिऊ नकाल जिबन माल्दी, तर परमेस्वरलं रिई नकायर्त लिज्याया।"