1 हप्ताल पहेला दिन छकाल्या च्याअच्याअ च्युऊच्युऊकै मरियम मग्दलिनी ऊईल रांऔ, ओटन नकाले लुङ ऊईलन आहाएसिन्या आरङौ। 2 नका सिमोन पत्रुस सनर येशुले मया आढान्या छुट्टै सिइल्योङ चोएस्यु हिनौ, ओटन नकानेजन आपानस्यौने, "नकानेले ऐलेऊने प्रभुजन ऊईलन पाखाल लाङस्यु, ओजन काङ रांनाटौ, ना घोन मासन्चिदी।" 3 तब पत्रुस सनर छुट्टै सिइ पाखाल पलिईस्यु ऊई लेऊदेए हिनौने। 4 ना नेंलोअनें बोलोङबोलोङजै चोटौने, तर छुट्टै सिइ पत्रुसजन उछटत्याइस्यु ऊईल हाल ताप्‌रा:औ। 5 ऊईल भितरलं गोम लेस्यु आब्याटौक, नकाले हाक मलिङसिन्या पाटलो सुतिल क्वायाङ याएज राबोर्सिज्यान्या आरङौ, तर नका भितर मापसिडा। 6 सिमोन पत्रुस नकाल छिनछिन रांऔ, ओटन ऊई भितरलं पसिऊ, ओटन नकाले बै मलमलले बिरिसिन्या क्वायाङ याएज दाङज आवङज्यान्या आरङौ। 7 ओलं आङएल पोअसिन्या रूमाल मलमललं क्वायाङसं मालज्याऔ, तर अलक्कै तपोईत पत्याइस्यु नाएसिन्या लेऊ। 8 तब ऊईल हादेए तापरांन्या छुट्टै सिइ बै भितर पसिऊ, ओटन ना रङस्यु नकाले बिस्वास आढोव। 9 दानाङभन्या नकाङै येशु सिन्यातन जिङदा ताइस्यु सोवपरिया ऐलेन्या पबित्रशास्त्रला बचन अझ समन बुजिस्यु मालेवाङ।✝ 10 नालछिन्ट येशुल सिइयाङ राझिमदेए वल्वाङ।

11 तर मरियम ऊई पाखाल च्याङस्यु व्‌रज्याऔ। नकाले व्‌रस्यु-व्‌रस्यु ऊई लेऊदेए गोम लेस्यु आखिमौ, 12 ओटन जोङ येशुल सिन्या बुल नाएसिऊ, ओलं पालन्या क्वा क्वाएसिन्या नेंलोअ स्वर्गदुतने, तोलोअ ङए ल्योङ छुट्टै खङ ल्योङ नेंचुङज्यान्या आरङौने। 13 नकानेले मरियमजन ऐनेढोव, "औ मेएमा, दानाङ व्‌रज्यान?" नकाले ओनेजन ऐआढोवने, "नकाङै ङा प्रभुजन लाङदुरा रैस, ओटन ओजन काङ रांनाटौ, ङा मासनङदी।"

14 नका छ्योङस्यु आछिन्देए आवलौक, नकाले येशुजन आच्याङज्यान्या आरङौ, तर येशुजै ज्या ऐलेस्यु आमासहौ। 15 येशुले नकाजन ऐआढोव, "ऐ मेएमा, नङ दानाङ व्‌रन? काङ्काजन नरोअनु?" नकाले येशुजन बारील माली यिङस्यु आढोव, "औ, नङ ओजन आलन रांलाङन्या ताहकन, काङ रांनाटौ ङाजन पानस्याङते, ओटन ङा ओजन लाङ्ङा।"

16 येशुले नकाजन ऐआढोव, "मरियम!" नकाले वलस्यु ओजन हिब्रूल ऐआढोव, "रब्बोनि," अथाबा "औ गुरु ज्यू!"

17 येशुले नकाजन ऐआढोव, "ङाजन ताछुङ, दानाङभन्या ङा आकअ समन बौल्योङ हिनस्यु मालेङदी। तर ङा भाईयाङ ल्योङ हिनस्यु नकाङजन पानस्योवरते, ‘ङा बौ सनर जे बौ, ओटन ङा परमेस्वर सनर जे परमेस्वर ल्योङ ङाहिनज्याङु।’"

18 मरियम मग्दलिनी ओङ हिनस्युकने, सिइयाङजन आसथएवाङ, "ङा प्रभुजन ङारङ्ङु।" ओटन येशुले आपानन्या छेन नकाङजन आपानस्योवाङ।

19 नकाई दिन, अथाबा हप्ताल पहेला दिनल ओईक, जब यहूदीयाङल छ्याहै सिइयाङ झलापयाङ रूफ्स्यु भितरलं चुङज्यावाङ, येशु रा:स्यु नकाङल खार्ल च्याङौ, ओटन नकाङजन ऐआढोवाङ, "जेजन शान्ति!" 20 आवाए पानस्यु ओले नकाङजन आकुई सनर कोखा बै आठनस्योवाङ। प्रभुजन रङस्यु सिइयाङ भ्याई हेसाङवाङ। 21 तब येशुले फरि नकाङजन ऐआढोवाङ, "जेजन शान्ति! जोमनलेस्यु बौले ङाजन आपरिङ्ङु, नैलेस्युई ङा बै जेजन परिङच्या।" 22 ओटन आवाए पानस्यु येशुले नकाङयर्त सअ मुइस्यु ऐलेऊ, "पबित्र आत्माजन ग्रहन ढोचिते। 23 जो रुयाङल पाप जे छेमा ढोच्यो, नकाङजन छेमा ताहा, ओटन जोल पाप जे छेमा माढोच्यो नका छेमा ताइन्या माल्दी।"✝

24 येशु आरांऔक बारं गोटाङन तोलोअ, दिदुमस ऐराढान्या थोमा, ओयाङसं मालेऊ। 25 नैताइस्यु अपुर सिइयाङै नकाजन ऐराढोव, "गे प्रभुजन गेरङयिउ।" तर नकाले ओयाङजन ऐआढोवाङ, "जब समन ङा ओलं कुईला खिलल घ्वाङ मारङ्ङ, सनर खिलल घ्वाङल ङाकुईसै माझोकङ, ओटन ओलं कोखाल ङाकुई माझोकङ, तब समन ङा बिस्वास ढान्यामालेङदी।"

26 त हप्ता छिन्ट आ सिइयाङ फरि झिम भितरलं लिज्यावाङ। थोमा बै नकाङसं लिज्याऔ। झलापयाङ रूफ्सिज्याऔ, तर येशु भितर पसिऊ, ओटन खार्ल च्याङस्यु ऐलेऊ, "जेजन शान्ति।" 27 तब येशुले थोमाजन ऐआढोव, "नकुईसै इल नाएते, ओटन ङाकुईयाङ खिम्ते। नकुई हिनस्यु ङाकोखाल झोअते, तर बिस्वास ढोते तर सङ्का ताढो।" 28 थोमाले ओजन ऐआढोव, "ङा प्रभु सनर ङा परमेस्वर!"

29 येशुले नकाजन ऐआढोव, "नङ ङाजन नरङन्या कारनले ङाजन बिस्वास नढाङनु? बअचान्याङ नकाङ, जोले ङाजन रङस्यु मालरदी, ओटन बै बिस्वास ढाङरा।"

30 येशुले अपुर भ्याई अचम्मला कामयाङ आ सिइयाङ हार्मै आढोव, जो ईका किटापल मासरसिज्यादी। 31 तर आका सरसिज्याया, कि नङ येशु परमेस्वरलं ज़ा ख्रीस्ट ज्या, ऐलेस्यु बिस्वास ढोचिते ओटन ओलं मिनता बिस्वासङन ओलं जेजन जिबन ग्याडोएचित्या।