1 जब येशु बाऔयन आढाज्याऔक तोलोअ आजर्मिऊ कन्ज अन्ढला रुजन आरङौ, 2 आसिइयाङै ओजन रांगिनौ, "रब्बी, काङ्काले पाप आढोव, इकाले सन् इकाल आमा-बौले, ओटन ईका अन्ढला ताइस्यु जर्मिऊ?"

3 येशुले जबाक आयोवाङ, "न त इकाले पाप आढोव न इकाल आअमा-बौले, तर ऐताइस्यु अन्ढला ताहौ कि ईका रुल जिबनतन परमेस्वरलं सक्तिल काम ग्यारंनत्या। 4 ङाजन परिङन्याल कामयाङ गे लाअकैज ढान्याताहौ। रिउ ताहकन काङ्काईले काम ढाऔ माढुदुरदी। 5 जब समन ङा सङ्सारलं लिज्याङ, तब समन ङा सङ्सारला ज्योति हो?"✝

6 येशुले ईका छेन पानस्यु नामल आठिलौ, ओटन ठिलले व्म चरिन्या जाएस्यु नकाल म्युउल आठिइस्याङु। 7 ओटन येशुले नकाजन ऐआढोव, "हिनन्ते सिलोआमला पोखराअल हुर्ते" (सिलोआमल अर्थ हो, परिङसिन्या) नकाले हिनस्यु आहुरौ, ओटन रङन्या ताइस्यु वलौ।✝ 8 नकाल आडेरालाङ सनर नकाजन बया आनीन्या रङन्याङै ऐलेवाङ, "नैति ईका रु चुङस्यु बया नीन्या रु ईकाइ माङडी?" 9 काङ्का-काङ्काङै ऐलेवाङ "ईका नकाई ज्या।" अपुऱ्याङै ऐलेवाङ, "माङडी, ईका नका मनताइन्याई रंना।" नकाले ऐलेऊ, "ङा नकाई रु ज्या।" 10 तब नकाङै ओजन रांगिनौ, "नङ कढाई नरङनु वन?" 11 नकाले जबाक आयोवाङ, "येशु ऐढासिन्या तोलोअ रुले व्मजन चरिन्या जाएस्यु ङा म्युउल आठिइस्याङु, ओटन ‘सिलोआमल हिनस्यु हुर्ते आढाङु।’ ओटन हिनस्यु ङाहूरङु, ओटन ङा रङन्या ङाताइङु।" 12 नकाङै ओजन ऐराढोव, "नका काङ लिज्याऔ वन?" नकाले ऐआढोवाङ, "ङा मासनङदी।"

13 हादेए नका अन्ढला रुजन नकाङै फरिसीयाङ ल्योङ राहोनौ। 14 जो दिन येशुले व्म चरिन्या जाएस्यु नकाल म्युउ आफएस्योव ना शबाथ-दिन लेऊ। 15 फरिसीयाङै नकाजन रांगिनौ, "नङ कैलेस्यु रङन्या नताइनु?" नकाले ओयाङजन ऐआढोवाङ, "ओले ङा म्युउल चरिन्या व्मले आसेपस्याङु का, ङाहूरङु ओटन रङन्या ङाताइङु।"

16 फरिसीयाङ्ङन काङ्का-काङ्काङै ऐलेवाङ, "ना रु परमेस्वरङन रांन्या माङडी, दानाङभन्या नकाले शबाथ-दिन पालन माढोडा।" तर अपुऱ्याङै ऐलेवाङ, "कढाई पापी रुले ऐटाइन्या अचम्मला कामयाङ ढाऔ ढुदुऊ?" ओटन नकाङल खार्ल भाअसिइ ताहौ।

17 तब नकाङै ना अन्ढलाजन फरि रांगिनौ, "ओले न म्युउ फएस्यादुन्वा रैस, आब ओलं बारेल नङ नै पानन्?" नकाले ऐआढोवाङ, "ओ तोलोअ अगमबक्ता हो।"

18 नजर डोएन्या रुले आअमा-आबौजन खुल्स्यु मागिनौसमन यहूदी अढिकारीयाङै ईका अन्ढला लेऊ, ओटन रङन्या ताहौ ऐलेस्यु बिस्वास रांमाढोव। 19 तब नकाङै आबौ आअमानेजन रांगिनौ, "नैति ईका झेन ज़ा आ म्युउ मारङन्याई जर्मिऊ ऐझेनलेचिनु? आब कढाई रङौ ढुदुन्या ताहौ?" 20 नकाल आमा-बौनेले नकाङजन ऐनेढोवाङ, "घोन ऐसनच्या ईका घोन ज़ा ज्या, ओटन अन्ढलाई जर्मिस्यु लेऊ। 21 तर घोन ईका कैलेस्यु रङन्या ताहौ ऐलेन्या मासन्चिदी, अथाबा इकाल म्युउ काङ्काले आफएस्योव, ना बै घोन मासन्चिदी। इकाल उमेर योअदा, इकाजन जै गिन्चिते। आबारेङन नका ओलजै छ्योङा।" 22 नकाल आमा-बौने यहूदी अढिकारीयाङजन रङस्यु छ्याटौने। दानाङभन्या यदि काङ्काङै येशुजन ख्रीस्ट ऐलेस्यु सुइकार ढोरकन, नकानेजन यहूदी आराधना झिमलन पलिईन्याने। ऐलेस्यु यहूदी अढिकारीयाङल सल्ला हादेए जै ताइस्यु लेऊ। 23 नैताइस्यु नकाल आमा-बौनेले ऐनेढोवाङ, "इकाल उमेर योअदा, इकाझन्ज गिन्चिते।"

24 तब नकाङै ना अन्ढलाजन नेंपाला खुल्स्यु ऐराढोव, "परमेस्वरलं महिमा योंते। गे ऐसन्या ईका रु पापी हो।" 25 नकाले जबाक आयोवाङ, "ओ पापी लेऊसन मालेऊ ङा मासनङदी। तोलोअ याएजै छेन सन्ङा कि ङा पहेला अन्ढला ङाल्ङु तर आकअ ऐरङदुङा।" 26 तब नकाङै नाजन ऐराढोव, "ओले नङजन कै आजाएनु? नाले कढाई नम्युउ आफएस्यानू?" 27 "नकाले ओयाङजन जबाक आयोवाङ, ङा जेजन हादेएजै पानस्याचिऊ, तर जे माथएदुच्या। आब फरि दानाङ थटौ रोअच्यो? जे बै ओलं सिइयाङ ताहौ जेरोअचिऊ सन् नैति?"

28 ओयाङै नाजन सज्याअस्यु ऐराढोव, "नङडी ओलं आ सिइ का, तर गे ता मोशाल सिइयाङ हो। 29 गेजन थाई लेया, मोशा सकाए परमेस्वर छ्योङस्यु लेऊ, तर गे मासनैदी ईका रु काङन रांऔ।" 30 नका रुले जबाक यांस्यु नकाङजन आढोवाङ, "कैताइन्या अचम्मला छेन! ओ काङन रांऔ जे मासन्चिऊ, तर ङा म्युउ ओलेई आफएस्याङु ज्या। 31 गे ऐसन्या कि परमेस्वर पापीयाङल छेन माथएस्यौरडी, तर परमेस्वरसं छ्याएन्याङ सनर ओलं इच्छ्या पालन ढान्या रुयाङल छेन परमेस्वरले थएस्यौरा।✝ 32 सङ्सारलं सुरु आताहौकन ऐटाइन्या जर्मिऊकन्ज अन्ढलाल म्युउ काङ्काईले आफएन्या छेन खकै माथएसिदा। 33 यदि नका रु परमेस्वरङन आमारांन्या ताहकन ओले नैज ढाऔ माढुदुऊदीहोला।" 34 नकाङै नाजन जबाक यांस्यु ऐराढोव, "नङ ता ऐजै पापल नजर्मिनु, ओटन नैति नङ गेजन ह्युउकौ नरोअनु?" ऐलेस्यु नकाङै नाजन यहूदीयाङल आराधना झिम बाहेर देए रापलिटौ।

35 ओयाङै नाजन पाखाल रापलिटौ ऐलेन्या येशुले आठटौ, ओटन नाजन डोएस्यु ऐआढोव, "नैति नङ रुल ज़ाजन बिस्वास नढोनु?" 36 नकाले जबाक यांस्यु ऐलेऊ, "औ प्रभु, ओ काङ्का हो? ङा ओजन बिस्वास ऐढोङा?" 37 येशुले नाजन ऐआढोव, "नङ ओजन ऐरङज्याना, सनर नङसं छ्योङज्यान्या ङा ओइ ज्या।" 38 तब नकाले ऐलेऊ, "औ प्रभु, ङा बिस्वास ऐढोङा।" ओटन नाले येशुजन ढोक आयोव। 39 ओटन येशुले ऐआढोव, "ङा नियालं नाल्ट ईका सङ्सारलं ङारा:ङु हो, जोकि मारङन्याङै ग्यारङरत्या ओटन रङन्याङ अन्ढला ग्याताइरत्या।" 40 ईका छेन थएस्यु आलेऊक लिज्यान्या फरिसीयाङ्ङन काङ्का-काङ्काङै येशुजन ऐराढोव, "नैति गे बै अन्ढलाङ वन?" 41 येशुले नकाङजन ऐआढोवाङ, "जे अन्ढला जेताइन्या ताहकन पापल दोसी ताइन्या जेमाल्चिऊ, तर जे ‘गे ऐरङया’ ऐलेन्या जिग्राइ ढोच्या, नैताइस्यु जे अझ बै दोसी लेच्या।"