1 "येशुले ऐलेऊ ङा मछ्यु, जेजन ऐढाच्या, जो भेडालं गोठल झलाप तन भितर मापसी, तर छुट्टैङन वूमस्यु पसि, नका गोए सनर डाका हो, 2 तर झलाप तन भितरलं पसिन्या भेडाङलं चान्या ग्वाला हो। 3 पाल्याले आ नाल्ट झलाप फएस्योवा, ओटन भेडाङै आग़ा थएरा, ओटन ओले आभेडाङ मिन पानस्यु-पानस्यु खुलौरा, ओटन नकाङजन पाखाल लाङौरा। 4 जब नकाले सोगलै आभेडाङजन पाखाल पलिटौर, तब नकाङल रां-रां बाया ओटन भेडाङै ओलजन पछ्याइरा, दानाङभन्या नकाङै आग़ा शईरा। 5 तर माशईसिन्या रुजन नकाङ मापछ्याइरदी, बरु नका ल्योङन ढोङरा। दानाङभन्या माशईसिन्या रुल ग़ा नकाङै माशईरदी।" 6 येशुले नकाङजन ईका आहान आपानस्योवाङ, तर ओले नकाङजन आछ्योङस्यान्या छेन नकाङै माबुजिदुरा।

7 येशुले फरि नकाङजन ऐआढोवाङ, ङा जेजन मछ्यु, ऐढाच्या, भेडाङलं झलाप ङाई ज्या। 8 ङातन हादेए रांन्या सोगलै गोएयाङ सनर डाङ्काङ हो, तर भेडाङै नकाङल छेन माथएदुरा।✝ 9 झलाप ङाई ज्या, जो रु ङाल्योङन भितरलं पसि ना जोगाइसिया, ओटन बाहेर भितर लेन्या ढोवा, ओटन खर्कल* लाऔ डोएवा।✝ 10 "गोए ता कुन्या सनर सएन्या ओटन नास जाएङा लेस्यु रांया। ङा ता नकाङै जिबन ग्याडोएरत्या, ओटन ना तबर ग्याडोएरत्या ऐटाइन्या यिङस्यु ङारांङु हो।"

11 ङा चान्या ग्वाला हो। चान्या ग्वालाले आभेडाङल नाल्ट आपरान अर्पिवा।✝ 12 भाराला रु ता भेडाङलं रांमिइ ग्वालाङमन माताइदी। नकाले ता फ्याऊ आरांन्या रङस्यु भेडाङजन राइस्यु ना ढोङा, ओटन फ्याऊले भेडाङजन गनज्याइस्यु लाङौरा, ओटन तत्तर-बित्तर जाटौरा। 13 ना ढोङा, दानाङभन्या ना भाराल रु हो, नकाले भेडालं नैज मतलब माढोवदी।

14 "ङा चान्या ग्वाला हो, ङा ङा भेडाङजन सहङरा, ङा ङा भेडाङै ङाजन ऐसहङरा। 15 जोमनलेस्यु बौले ङाजन सहौ, ङा बै बौजन शईङा, ओटन ङा भेडाङलं नाल्ट ङा जिबन अर्पन ढोङा।"✝ 16 "ङामि अपुर भेडाङ लेरा, जो ईका गोठलाङ माङडी। नकाङजन बै ङा होनन्या ताइज्याया ओटन नकाङै ङा ग़ा थएरा ओटन नकाङ तोलोअजै बगाल ताइन्यालेरा, ओटन तोलोअजै ग्वाला ताइन्यालेया।✝ 17 बौले ङाजन ऐताइस्यु प्रेम ढाङवा, दानाङभन्या ङा ङाजिबन फरि होलन्या यिङले अर्पन ढोङा। 18 काङ्काईले ङाल्योङन ङा परान होनौ माढुदुऊदी, तर ङा ङामि इच्छ्याले ङामि परान अर्पन ढोङा। ङा परान अर्पन ढान्या अढिकार ङाईसं लेया, ओटन फरि होलन्या अढिकार बै ङासं लेया। ईका आग्या ङा ङा बौ ल्योङन डोएस्यु लेङा।" 19 ईका बचनल कारनले यहूदीयाङ खार्ल फरि भाअसिइ ताहौ। 20 नकाङ मध्य भ्याईले ऐलिज्यावाङ, "इकाजन दुस्टआत्मा लागिस्यु लेया। ओटन ईका पुलज्याऔ। जे इकाल छेन दानाङ थएच्यो?" 21 अपुऱ्याङै ऐलेवाङ, "दुस्टआत्मा लागिन्या रुल छेन ऐमाताइदी। नैति दुस्टआत्माले अन्ढलाङ म्युउ फटौ आढुदुऊ का?"

22 यरुशलेमला मन्दिरजन परमेस्वरतं समर्पन ढान्या पर्ब रा:स्यु लेऊ, ईका हिउदाका समाय लेऊ। 23 येशु मन्दिर भितर सोलोमनल पटाहाल* हुदेएअदेए लेरिऊ। 24 यहूदीयाङै ओलं चारवरङन दुउसिस्यु रांगिनौ, "खक समन नङ गे यिङ दोधारल नाएसिन? नङ ख्रीस्ट ताहनकन गेजन प्रस्टै पानस्यासिन्ते।"

25 येशुले नकाङजन जबाक आयोवाङ, "ङा जेजन पानस्यादुच्या, तर जे बिस्वास माढोचिदी। ङा बौल मिनतन जो काम ढोङ, ओइले ङामि बयन योंवा। 26 तर जे बिस्वास माढोचिदी, दानाङभन्या जे ङा भेडाङ मध्यला माङडी।" 27 "ङामि भेडाङजन ङा सहङरा, ओटन नकाङै ङा ग़ा थएरा, ओटन ङाछिनछिन रारां। 28 नकाङजन ङा अनन्त जिबन योंङरा, ओटन नकाङ खकै नस्ट माताइरदी, ओटन काङ्काईले नकाङजन ङाकुईतन न्हानस्यु लाङौ माढुदुऊदी। 29 ङा बौले ङाजन ना आयांङु, ओ सोगलैतन घिन्या लेया, बौल कुईतन काङ्काईले नकाङजन न्हानस्यु लाङन्यामाल्दी। 30 बौ सनर ङा तोलोअ ज्या।"

31 यहूदीयाङै ईका छेन थएस्यु येशुजन टुपङा लेस्यु फरि लुङ रात्युकौ। 32 येशुले नकाङजन ऐआढोवाङ "ङा जेजन ङामि बौल्योङन भ्याई चान्या काम ङा थन्ङु, ना मध्य काङ्का कामल कारनले जे ङाजन लुङले टुपौ जेरोअचिऊ?"

33 यहूदीयाङै ओलजन जबाक रांयोव, "गे नङजन चान्या कामल नाल्ट लुङले मातुप्सिन्दी, तर नङ रु ताइस्यु बै नङझन्जै परमेस्वरसं नमानौकाले सनर ईस्वरलं बाए नढाऔकाले तुपौ गेरोअसिनु हो।"✝

34 येशुले नकाङजन जबाक आयोवाङ, नैति जेमि ब्यबस्थालं ऐटाइन्या सरसिन्या मालेऊ, "ङा ऐङाल्ङु, जे देउताङ हो?"✝ 35 "पबित्रशास्त्रले आपानन्या गे ऐसन्या बचन सदाईल नाल्ट सत्य ज्या, तर ना छेन भङ्ग माताइदी। ओटन ब्यबस्थाले नका रुयाङजन देउताङ ऐआढोवाङ, जोयाङजन परमेस्वरङन थाई यांसिवाङ। 36 बौले ङाजन छेल्स्यु ईका सङ्सारलं आपरिङ्ङु, ‘ङा परमेस्वरलं ज़ा हो’ ऐङालेऊक कैलेस्यु परमेस्वरलं बिरोद ताहौ? 37 यदि ङा बौले जो चाहि ना काम ङा माढोङकन ङाजन बिस्वास ताढोच्यो। 38 तर ङा बौल काम ढाज्याङा ओटन बै जे ङाजन बिस्वास माढाङच्योकन ईका कामयाङत बिस्वास ढोचिते, ओटन जे सनच्या ओटन बुजिच्या, कि बौ ङात लिज्याया, ओटन ङा बौत लिज्याङा।"

39 नका यहूदीयाङै येशुजन फरि कोलोकौ रारोकौ, तर ओलं नकाङल कुईतन फुत्किस्यु हिनौ। 40 ओटन येशु फरि यर्दन भईल हुदिन्त हिनस्यु नका पोल चुङौ, जोङ यहुन्नाले हादेए बप्तिस्मा आयोवाङ।✝ 41 तबर रुयाङ आल्योङ रांऔ तअसिवाङ, ओटन नकाङै ऐलेवाङ, यहुन्नाले नैज अचम्मला कामयाङ माढोडा, तर इकाले ता ढोदा, इकाल बारेल "यहुन्नाले जो छेन आपानौ ना मछ्युज्या रैस।" 42 ओटन नङ तबर रुयाङै येशुजन बिस्वास रांढोव।