1 तर येशु जैतुन डान्डात हिनौ। 2 ओलं छकाल्याई यरुशलेम मन्दिर देए वलौ, ओटन सोगलै रुयाङ आल्योङ रांवाङ ओटन चुङौ, ओटन नकाङजन आह्युउवाङ। 3 शास्त्रीयाङ सनर फरिसीयाङै तोलोअ मेएमाजन ब्यबिचार आढाज्याऔक कोलोअस्यु राहोनौ, ओटन नाजन रुयाङ खार्ल रा:सच्यानौ। 4 नकाङै येशुजन ऐराढोव, "औ गुरु, ईका मेएमाले ब्यबिचार आढोवका गेकोलोअयिउ। 5 ब्यबस्थालं नियाम अनुसार मोशाले गेजन ऐटाइन्या मेएमाजन लुङले टुपन्या आग्या यांस्यु नाटैवा। इकाल बारेल नङ नै पानन्?"✝

6 तर नकाङै येशुजन बिचारौ नाल्ट सनर आयर्त दोस लाहौ ढुदुसिऊसन लेस्यु ऐराढोव। येशुले गोम लेस्यु नामल कुईसैले आसरौ। 7 तर नकाङै च्याङस्यु येशुजन रांगिनौ, तब येशुले च्याङस्यु नकाङजन ऐआढोवाङ, "जेङन जो चोखा ले, नकाईले ना मेएमाजन हादेए लुङले ग्यातुपौत्या।" 8 ओटन फरि बै गोम लेस्यु येशुले नामल कुईसैले आसरौ। 9 तर जब नकाङै ईका राथटौ, तब सेरयाङ्ङन सुरु ढास्यु लुलल्याङ समन तो-तोलोअ ङन हिन्वाङ ओटन येशु नका मेएमासकाए आबाठए लिज्याऔ, ओटन ना मेएमा आहाक च्याङज्याऊ।

10 येशुले नका मेएमाजन ब्याएस्यु ऐआढोव, "ऐ मेएमा, नकाङ कान्देए हिन्वाङ? नैति काङ्काईले नङजन सजाय रांमायानू?" 11 नकाले ऐलेऊ, "प्रभु, काङ्काईले मायांदुङरा।" येशुले ऐआढोव, "ङा बै नङजन सजाय मायान्दी। हिनन्ते, फरि पाप ताढो।"*

12 येशुले फरिसीयाङजन आढोवाङ, "ङा सङ्सारला ज्योति हो। जो ङाछिन्ट बा नका चिऊन्याल मालिज्यादी, तर नकाले जिबनल ज्योति डोएन्यालेया।"✝

13 तब फरिसीयाङै येशुजन ऐराढोव, "नङ नबारेल बयन नयांज्यानु। न गवाइ सत्य माठहरिदी।"✝

14 येशुले जबाक आयोवाङ, "ङा ङामिइज बारेल बयन योंङा, ओटन बै ङा बयन सत्य लेया। ङा ऐसन्ङा, कि ङा काङन ङारांङु, ओटन ङा कान्देए ङाहिनज्याङु। तर जे मासन्चिदी, ङा काङन ङारांङु, या ङा कान्देए ङाहिनज्याङु। 15 जे मनवाल नजरले निया ढोच्या। ङा काङ्काईल निया माढोङदी। 16 ङा निया ढोङ्कन बै, ङा निया सत्य ठहरिया। दानाङभन्या निया ढान्या ङा ङाबाठए मालेङदी, तर ङा सनर ङाजन परिङन्या बौ लेच्या। 17 जे ब्यबस्थालं बै नेंलोअ रुनेंल बयन सत्य ठहरिया ऐलेस्यु सरसिस्यु लिज्याया।✝ 18 ङाबारेल ङा ङाईज बयन योंङा, ओटन ङाजन परिङन्या बौले ङाबारेल बयन योंवा।" 19 नकाङै येशुजन ऐराढोव, "न बौ काङ लिज्याऔ?" येशुले जबाक आयोवाङ, "जे न त ङाजन सहङच्यो न ङा बौजन। जे ङाजन जेशईन्या ताहकन ङा बौजन बै शईदुच्याहोला।"

20 ईका छेन येशुले यरुशलेम मन्दिरलं सिक्छ्या आयांज्याऔक भिटी चराइन्या बेदील लेऊक ऐलेऊ। ओटन काङ्काईले ओलजन माकोलोदुरा, दानाङभन्या येशुल बेला अझै ताइस्यु मालेऊ।

21 येशुले फरि नकाङजन ऐआढोवाङ, "ङा ङाहिनौ छिन्ट जे ङाजन रोंकङच्या, ओटन जे पापले सिच्या। जोङ ङा हिनङ, जे ओङ रांऔ माढुदुचिदी।"

22 नैताइस्यु यहूदी अढिकारीयाङै ऐराढोव, "ईकाले आत्महत्या ढोङा लेऊसन नैति? दानाङभन्या इकाले ‘जोङं ङा हिनङ, जे ओङ हिनौ माढुदुचिदी’ ऐलिज्याऔ।"

23 ओटन येशुले नकाङजन ऐआढोवाङ, "जे मिङाङ हो। ङा हर्ङा हो। जे ईका सङ्सारलाङ हो। ङा ईका सङ्सारला माङडी। 24 ङा जेजन ऐङाढाचिऊ, जे जेपापलेई सिन्यालेच्या, दानाङभन्या ङा ओइज ज्या ऐलेस्यु जे बिस्वास माढोच्योकन जे पापलेई सिन्यालेच्या।"

25 ओयाङै येशुजन रांगिनौ, "नङ काङ्का वन?" येशुले नकाङजन ऐआढोवाङ, "ङा ओइज ज्या, जो ङा जेजन सुरुकन्जै पानस्याज्याच्या। 26 ङा जे बारेङन पानन्या सनर निया ढान्या भ्याई लेया। तर ङाजन परिङन्या सत्य लेया, ओटन ओल्योङन ङा जो ङा थएङु नाइज छेन ङा सङ्सारजन पानस्योङा।,"

27 येशुले बौल बारेल आपानौ हो, ऐलेस्यु ओयाङै माबुजिदुरा। 28 ऐताइस्यु येशुले ऐलेऊ, "जब जे रुल ज़ाजन हर्देए छेनच्यो, ङा ओइज ज्या लेस्यु जे सनन्यालेच्या, ओटन ङा ङामिइ अढिकारङन नैज माढोङदी, तर बौले आह्युउन्या छेनयाङ छ्योङा लेस्यु सनन्यालेच्या। 29 ङाजन परिङन्या ङाईसं लिज्याया। ओले ङाजन ङाबाठए राइस्यु मानाएङुदी, दानाङभन्या ङा सदाई ओलजन खुशी जाएन्या काम ढोङा।" 30 येशुल छेन थएन्याङ भ्याईले ओलजन बिस्वास रांढोव।

31 येशुले ओलं बिस्वास ढान्या यहूदीयाङजन ऐआढोवाङ, "जे ङा बचनत लिज्याच्योकन जे मछ्यु ङा सिइयाङ ज्या। 32 तब जे सत्य नैति ना सनच्या, ओटन सत्यले जेजन स्वतन्त्र जाएचिवा।"✝

33 नकाङै ओलजन जबाक रांयोव, "गे अब्राहामल सन्तानयाङ हो, ओटन आकअ समन काङ्काईल सेवाऱ्या ताइस्यु मालेईदी। ‘जे स्वतन्त्र ताइन्यालेच्या’ ऐलेस्यु नङ कढाई ऐनलज्यानु?"✝

34 येशुले नकाङजन जबाक आयोवाङ, "ङा जेजन मछ्यु ऐढाच्या, पाप ढान्या सोगल पापल सेवाऱ्या ज्या। 35 सेवाऱ्या ता सदाईज झिमल मालिज्यादी, तर ज़ा ता सदाईज झिमलै लिजिया।✝ 36 नैताइस्यु ज़ाले जेजन स्वतन्त्र जाएचिऊकन जे पक्का बै स्वतन्त्र ऐताइच्या। 37 ङा ऐसन्ङा, जे अब्राहामल सन्तानयाङ ज्या। तर जे ङाजन सटौ रोअज्याच्या, दानाङभन्या ङा बचनले जेल्योङ पोइज माडोटौदी। 38 ङा बौल्योङन जो ङारङ्ङु, ङा नाइ पानङा। ओटन जे बै जो जेबौल्योङन जेथएचिऊ, नाइ ढोच्या।" 39 नकाङै ओलजन ऐराढोव, "गे बौ ता अब्राहाम ज्या," येशुले नकाङजन ऐआढोवाङ, जे अब्राहामल सन्तान ताइच्योकन अब्राहामले जो काम ढोव, "जे बै ओइज काम ढोदुच्याहोला। 40 ङा परमेस्वरङन ङा थएन्या सत्य छेन जेजन पानस्याज्याच्या, तर आकअ जे ङाजन सटौ रोअज्याच्या। अब्राहामले ऐटाइन्या काम माढोडा। 41 जे बौले जो आढोव जे नकाई काम ढोच्या।" नकाङै येशुजन ऐराढोव, "गे ब्यबिचारङन जर्मिन्याङ माङडी! गे बौ तोलोअजै ज्या, ओ परमेस्वर हो।"

42 येशुले नकाङजन ऐआढोवाङ, "परमेस्वर जे बौ ताहकन्ता जे ङाजन प्रेम ढाङच्याहोला, दानाङभन्या ङा परमेस्वरङन ङारांङु। ङा ङामि इच्छ्याले ङारांन्या माङडी, तर ओले ङाजन आपरिङ्ङु हो। 43 जे ङापानन्या दानाङ माबुजिच्यो? दानाङभन्या जे ङा बचन थटौ माढुदुचिदी। 44 जे बौ दियाबलसजै ज्या। ओटन ऐकाता जे बौल इच्छ्या पुरा ढान्या जे यिङ लेया। ना ता सुरुकन्ज साइढवा लेऊ, ओटन सत्यस नकाजन नैज मतलब माल्दी। दानाङभन्या नका सकाए नैज सत्य माल्दी। जब नाले ग्वारस्यु छ्योङौ, नकाले आबानि अनुसार छ्योङा, दानाङभन्या ना ग्वारवा हो, ओटन ग्वारवाल बौ हो।✝ 45 तर ङा सत्य छ्योङ्ङा, नैताइस्यु जे ङाजन बिस्वास माढाङचिदी। 46 जेमध्यलन ङाजन नङ पापल दोसी नल्‌नु ऐलेस्यु काङ्काले प्रमानित जाटौ जेढुदुचिऊ? यदि ङा सत्य छ्योङ्ङकन, जे ङाजन दानाङ बिस्वास माढोच्योवन? 47 जो परमेस्वरलं तरफङन रां, नकाले परमेस्वरलं बचन थएवा। जे परमेस्वरलं माङडी, नैताइस्यु माथएचिदी।"

48 यहूदीयाङै येशुजन जबाक रांयोव, "नैति आका गे छेन ठिक माङडी, कि नङ सामरी ज्या, ओटन नङजन दुस्टआत्मा लागिस्यु लेऊ?" 49 येशुले जबाक आयोवाङ, "ङा दुस्टआत्मा लागिस्यु मालेङदी, तर ङा ङामि बौल आदर ढोङा, सनर जे ङामि आदर माढोचिदी। 50 तर ङा ङामिइज महिमा मारोकङदी, तोलोअ लेया जोले महिमा रोअवा ओटन निया ढोवा। 51 ङा जेजन मछ्यु ऐढाच्या, यदि जोले ङा बचन पालन ढोव नका खकै सिन्यामाल्दी।"

52 यहूदीयाङै येशुजन ऐराढोव, "आब गेजन थाह ताइदा कि नङ पक्का दुस्टआत्मा नलागिनुज्या। अब्राहाम सिऊ, ओटन अगमबक्ताङ बै सिवाङ, तर नङ ऐलिज्याना, कि ‘जोले ङा बचन पालन ढोव, नकाले खकै सिन्या डारन्या माल्दी।’ 53 नैति गे शाखा अब्राहामतन नङ घिन्या रों? ओ ता सिदा, ओटन अगमबक्ताङ बै सिदुरा। नङकने नङझन्जै ङा काङ्का ऐलेस्यु दाबि ढाज्याना?"

54 येशुले जबाक आयोवाङ, "यदि ङा ङामिइज महिमा ढोङ्कन ङामहिमा दाङजै ताहा। ङाजन महिमा यांन्या ङा बौज लेया, जोजन जे ‘गे परमेस्वर’ ऐजेढोचिऊ। 55 जे ओजन माशईचिदी, ङा ओजन शईङा। ङा ओजन मासहङदी ऐलेदुङा भन्या जेमन्जै ग्वारवा ताइङा। तर ङा ओजन ऐशईङा, ओटन नैताइस्यु ओलं बचन पालन ढोङा। 56 जे शाखा अब्राहाम ङा दिन रङौ नाल्ट टेकाटेक ताइस्यु लेऊ, ओटन नकाले रङस्यु हेसाङौ।" 57 नैताइस्यु यहूदीयाङै येशुजन ऐराढोव, "नङ अझै पचास बर्स योअस्यु मालेन्दी, नैति नङ अब्राहामजन रङस्यु नल्‌नु?" 58 येशुले नकाङजन ऐआढोवाङ, "मछ्यु ङा जेजन ऐढाच्या, अब्राहाम आजर्मिऊ हादेएजै ङा ङाल्ङु।" 59 तब नकाङै ओलजन टुपङा लेस्यु लुङ रात्युकौ, तर येशु मोअसिस्यु मन्दिरलन बाहेर पलिईस्युहिनौ।