1 आर आनटिओखिया़रे ताहेंकान का़लिसिया़रे दो ना़बिको आर चेचेत्‌कोको ताहेंकाना, बारनाबास आर निगेरको मेताय सिमियोन, आर कुरेनिरेन लुकियोस, आर हेरोद साँवतेये आ़सुल हारालेन मानाहेन आर सा़उल। 2 आर प्रोभुको सेवावायकान आरको उपा़सआकात् ताहेंकानरे सोनोत जिवे मेनकेदा, "बारनाबास आर सा़उल बेगार ओडोकआ़ञपे, ओना का़मि ला़गित्‌ ओकाटाक् मेनतेञ होहो आकावात्‌किन।"

3 खानगे ओनको दो उपा़स आर कोयकाते आर चापोकेत्‌किनतेको बिदा़ गोत्‌कात्‌किना,

4 आर उनकिन दो सोनोत जिउ होतेते कोल ओचोयेनते सिलुकिया़तेकिन सेनएना, आर ओंडे खोन दो जाहाजते कुपरोस टा़पुतेकिन चालावेना। 5 आर सालामिसरे सेटेरकाते जिहुदिकोवाक् सुना़गोगकोरे इसोराक् काथाकिन पोरचारकेदा, आर जोहान मा़रकुस हों उनकिनरेन गोक्‌ड़ोयिच्ए ताहेंकाना।सामाङ सेच खोन ञेलोक् रे सुना़गोग

6 आदो गोटा टा़पु पाफोस हा़बिच् किन सेन पारोमएन खान मित्‌टेन गुनिदार, एड़े ना़बि जिहुदि होड़किन ञाम केदेया, ओने उनियाक् ञुतुम दो बारजिसु। 7 उनि दो सेरगियोस पा़उलुस, दिसा़म चाक्‌लाविच् मित्‌टेन बुजहा़नतार होड़ ठेने ताहेंकाना। नुय दो बारनाबास आर सा़उल होहो आ़गु ओचोकेत्‌किनते इसोराक् काथा आँजोमे खोजकेदा। 8 मेनखान एलुमा़स गुनिदार (एनते ओना काना उनियाक् ञुतुम दो तोरजोमाते) उनकिने ता़किच्‌ दारामकेत् किना, दिसा़म चाक्‌लाविच् बिसवा़स खोन भाङटावेये मेनवानते। 9 मेनखान सा़उल दो ओने उनि पावल होंको मेताय, सोनोत जिउतेये पेरेच्एनते उनिये बेङगेत् उरिच्आदेया। 10 आरे मेनकेदा, "एया आम जोतो फा़सिया़रा आर फोरफुनदिते पेरेच् आकानिच्, सायतानरेन होपोन, जोतो भा़क्‌ला़याक्‌ रेन बा़इरि प्रोभुवाक् सोजहे होरको कोंडयाय दो बाम बा़गिया?"

11 "नितोक् दो ञेलमे प्रोभुवाक् ति दो आमरे पाड़ावक्आ आरेम काँड़ाँक्आ थोड़ा दिन सिञ चाँदो बाम ञेल दाड़ेयाया।" आर उनिरे दो ञुत हेच्‌ पाड़ावादेया आर हानते नाते टा़मडा़उ बाड़ाये एहोप्‌ एना, जेमोन जाहाँय उनियाक्‌ ति साप्‌कातेको इदिये। 12 खान दिसा़म चाक्‌लाविच् दो ओना होयेनाक् ञेलकातेये पा़तिया़वेना, प्रोभुवाक् सिकना़ततेये भाड़ोयेना।

13 आदो पाफोस खोन जाहाज लाड़ावकेत्‌ते पावलतेको दो पामफिलिया़ रेयाक्‌ पेरगातेको सेटेरेना, मेनखान जोहान मा़रकुस दो उनकिन खोन बेगारेनते जेरुसालेमतेये रुवा़ड़ेना। 14 आर उनकिन दो पेरगा खोन सेन इदियेनते पिसिदिया़ रेयाक्‌ आनटिओखिया़तेकिन सेटेरेना, आर जिरा़उक् माँहाँ हिलोक् सुना़गोगरे बोलोयेनतेकिन दुड़ुप्‌ एना। 15 आदो आ़न आर ना़बिको रेयाक्‌ पाड़हावेन तायोम सुना़गोगरेन मुखिया़को दो काथा कोलात्‌किनतेको मेनकेदा, "ए बोयहाकिन, होड़को ला़गित्‌ जाहान सिखा़उ पाड़हाव काथा मेनाक्‌ताबेन खान मा रोड़बेन।"

16 खानगे पावल दोए तेङगोयेना आर तिते इसा़राकेत्‌तेये मेनकेदा, ए आपे इसराएल होड़को आर इसोर बोतोरायकानको आँजोमपे। 17 नोवा इसराएल जा़तरेन इसोर दो आबोरेन हापड़ामकोय बाछावकेत्‌कोताबोना, आर मिसोर दिसा़मरे उपरिया़को ताहेंकानरेगे उनि दोए माराङकेत्‌कोवा आर दाड़ेयान तिते ओंडे खोने ओडोक आ़गुकेत्‌कोवा। 18 आर पोनगेल सेरमा दिन गान हाहाङकाररेये आ़सुललेत्‌को ताहेंकाना। 19 आर कानान दिसा़मरे एयाय जा़तरेनकोय मारावकेत्‌कोते ओनकोवाक् दिसा़मे आ़इदा़रि ओचोवात्‌कोवा।

20 आर ओनाकाते पोन साय मोंड़ेंगेल सेरमा गान बिक्‌चा़रकोय एमात्‌कोवा। सामुएल ना़बि हा़बिच्‌। 21 आर इना़काते मित्‌टेन राजको कोयाना, आर इसोर दो किस होपोन सा़उल, बेनजामिन खुँटरेन मित् होड़े एमात्‌कोवा, पोनगेल सेरमा हा़बिच्‌। 22 आर उनिये ओचोक्‌केदे खान ओनकोरेन राज मेनकाते दा़उदे तेङगोकेदेया, ओने ओकोय रेयाक्‌ गोहा होंए एमकेत्, एनकाथाय जा़सा़य होपोन दा़उद इञ ञाम आकादेया, इञाक् मोने लेकान मित्‌टेन होड़, ओने उनि दो इञाक् सानाम मोनेजोङाक्ए पुरा़उ। 23 नुय बोंसरेनगे, इसोर दो गोक्‌आक्‌ लेका इसराएलको मित्‌टेन बाबाञचाविच्ए आ़गुवात्‌कोवा, मेताक्‌मे जिसुगे। 24 आर जोहान दो उनिये हिजुक् लाहारे सानाम इसराएलको मोन आ़चुर रेयाक्‌ बा़प्‌तिसमाय पोरचार माड़ाङात्‌कोवा। 25 जोहान दो आयाक्‌ का़क्‌मिए पुरा़उ ला़गिदोक्‌कान ताहेंकानरेये मेनकेदा, ओकोय का़ना़ञ मेनतेपे बादेञकाना? इञ दो उनि दोञ बाङ काना, मेनखान ञेलपे, इञ तायोमते मित्‌टेने हिजुक्‌काना, ओने उनियाक्‌ जाङगा रेयाक्‌ खारपा तोनोल राड़ायताय लेक होंञ बाङकान।

26 ए बोयहा मिसराको, आबराहामरेन बोंसको आर आपे मोदरेन इसोर बोतोरायकानको आबो ठेनगे नोवा बाञचावक् रेयाक्‌ काथा दो कोल आकाना। 27 एनते जेरुसालेमरे ताहेनको आर ओनकोरेन मुखिया़को दो उनि बाको बाडाय ओरोमलेदेते, आर ना़बिकोवाक्‌ आड़ाङ हों बाङ, ओने जिरा़उक् माँहाँ पिछे पाड़हावक्‌कान उनिको बिचा़र दुसिकेदेते ओनाको पुरा़उकेदा। 28 आर गोच्‌ओचोक् जाहान दोस बाको ञामलेत्‌तायरे हों, पिला़त ठेनको खोजकेदा जेमोने गोच्‌ओचोक्। 29 आर उनि रेयाङ ओल आकानाक्‌ जोतोवाक्‌को पुरा़उकेत् खान, कुरुस खोन फेडकेदेते कोबोररेको बायकेदेया। 30 मेनखान इसोर दो गोच्‌को खोन उनिये जिवेत् बेरेत्‌ केदेया। 31 आर ढेर दिन ओनको ठेने ञेल ओचोयेना, ओने ओनको गा़लिल खोन जेरुसालेमते उनि साँवतेको सेनआकान ताहेंकान, ओने ओनको नित उनिरेन गोहाको कानको दिसा़म होड़को ठेन। 32 आर आ़लिञ दो हापड़ामको ठेन होयलेन गोक्‌आक्‌ रेयाक्‌ भागे सोमबातलिञ आ़गुवापे काना। 33 चेत् लेका इसोर दो आबोरेन गिदरा़कोय पुरा़उ उता़रआकावात्‌कोवा, जिसुये बेरेत्‌केदेते, चेत् लेका दोसाराक् सेरेञरे हों ओल आकाना,

"आम दो इञरेन होपोन कानाम,

इञगे तेहेञिञ जानामकेत्‌मेया।"

* 34 आर गोच्‌को खोन उनिये बेरेत्‌केदेते सेयाक् ला़गित्‌ आलोय रुवा़ड़ोक्आ मेनते, ओना रेयाङ दो नोनकाय मेन आकादा,

"इञ दो दा़उद रेयाक्‌ सोनोत भोरकोञ एमापेया,

ओना खा़टियाक्‌कोगे।"

35 ओनाते एटाक् सेरेञरे होंए मेनेदा,

"आमरेन सोनोतिच् दो बाम सेया ओचोयेया।"

36 एनते दा़उद मा आपनार पिड़हिरे इसोराक् मोने लेका गुतिये खाटावेन खाने जा़पित्‌केत्, आर आच्‌रेन हापड़ामको ठेने बाय ओचोयेन, आरे सेयायेन। 37 मेनखान इसोरे बेरेत्‌केदेयिच् दो बाय सेयालेना।

38 आदो ए बोयहा मिसराको, नोवा बाडायजोङपे, जिसु होतेतेगे का़इको रेयाक्‌ इका़क् दो आपे ठेन जा़हिरोक्‌काना, 39 आर उनिरेगे मित्‌के मित् पा़तिया़उक्‌को सानामाक्‌को खोनको सा़रि ओचोक्‌काना, ओने ओकाको खोन मोसे रेयाक्‌ आ़नते बापे धोरोम ओचो दाड़ेलेन। 40 ओना इया़ते चेहावक्‌पे, जेमोन ना़बिकोवाक्‌कोरे रोड़ाकान काथा आलो पाड़ावापे।

41 "ञेलपे, ए आपे निक्‌हा़ँतको, आर भाड़ोक्‌पे,

आर मोहोर मेटावक्‌पे,

एनते आपे बिदा़लरे मित्‌टेच्‌ का़मि इञ का़मियेदा,

मित्‌टेच का़मिगे, ओकाटाक् ओहोगेपे पा़तिया़उलेन, जाहाँये ला़इयापेरे हों।"

42 आर उनकिन ओडोक चालाक्‌कान ताहेंकानरे ओनको दोको नेहोंरेना, जेमोन नोवाको काथा दो हिजुक्‌कान जिरा़उक् माँहाँरे होंकिन गालमारावाको। 43 आदो सुना़गोगरेनको भिड़ भाङगावेन खान आ़डि उता़र जिहुदिको आर जिहुदि बिसवा़सरे बोलोआकान इसोर भोकति होड़को पावल आर बारनाबासको पाँजाकेत् किना, आर उनकिन दो गालमारावात्‌कोतेकिन सिखा़उकेत्‌कोवा, दायारे जामाड़ आकान ताहेन ला़गित्‌।

44 आर दोसार जिरा़उक् माँहाँ हिलोक् दो गोटा नागराहारेन लेकागेको हेच् जारवायेना, इसोराक् काथा आँजोम ला़गित्‌। 45 मेनखान जिहुदिको दो गादेल होड़को ञेलकेत्‌को खान खिंसतेको पेरेच्एना, आर हेनोसतावाते पावले रोड़ेत् ताहेंकानाक्‌कोको रोड़ दारामकेदा। 46 आर पावल आर बारनाबास दो सोहोसाते गालमारावात्‌कोतेकिन मेनकेदा, जा़रुड़ ताहेंकाना, इसोराक् काथा दो आपेगे ला़इ माड़ाङापे, मेनखान ओनापे पेसड़ावेत्‌ते, आर जायजुग जियोन ला़गित्‌ आपेतेगे लेक बापे बुजहा़उक्‌कानते, ञेलपे जिहुदि बाहरेरेनको सेच् लिञ आ़चुरोक् काना। 47 एनते ओनकागे प्रोभु दोए हुकुमाकावात् लेया, बाङमा।

जिहुदि बाहरेरेनको ला़गित्‌ मित्‌टेच् मारसाल इञ दोहोआकात्‌पेया, जेमोन बाबाञचाव ला़गित्‌एम होयोक् धा़रति मुचा़त् हा़बिच्।

48 आदो जिहुदि बाहरेरेनको ओनाको आँजोमकेत् खानको रा़सका़येना, आर प्रोभुवाक् काथाको सारहावकेदा, आरको पा़तिया़वेना, जायजुग जियोन ला़गित्‌ तिना़क् निट आकानको ताहेंकानको, 49 आर प्रोभुवाक् काथा दो ओना गोटा टोठारे पासनाव इदियेना। 50 मेनखान जिहुदिको दो नापड़ाक् हुदा़रेन आदोम इसोर भोकति मायजिउको आर नागराहारेन पोरधानकोको उदगा़उकेत्‌कोवा, आर पावल आर बारनाबास उपा़रते खेदको उठा़उकेदा, आर आकोवाक् सिमा़ खोनको लागा ओडोककेत् किना। 51 खान उनकिन दो ओनको उपा़रते आ़किनाक् जाङगा धुड़ि कोटा ओटोकाते इकोनियोमतेकिन चालावेना। 52 आर चेलाको दो रा़सका़ आर सोनोत जिउतेको पेरेच्एना।