Atos 2

पातरासाक्‌ पोरचार

14 मेनखान पातरास दो ओनको गेलमित्‌को साँवते तेङगोयेनते आँट आड़ाङतेये गालमारावात्‌कोवा, मेनकेदाय, ए आपे जिहुदा़रेन होड़को आर जेरुसालेमरेपे ताहेनकान जोतोको नोवा बाडायजोङपे आर इञाक् काथाको लुतुरातिञपे। 15 आपेपे बुजहा़वेत् लेका नोको होड़ दो बाको बुल आकाना, एनते बासकेयाक् बेर कानगे चोङ। 16 मेनखान नोवा दो जोएल ना़बि होतेते रोड़लेनाक् काथा काना।

17 आर मुचा़त् दिनकोरे नोनका होयोक्आ, इसोरे मेनेदा,

इञरेन जिउ रेयाक्‌ मानवा जा़तरेन जोतोकोञ दुलाकोवा,

आर आपेरेन होपोनको आर आपेरेन होपोनेराकोको ना़बिया

आर आपेरेन जुवा़न कोड़ाको दो दोरसोनको ञेला,

आर आपेरेन मुरुबिको दो कुकमुको ञेला।✝2:17 जोए २:२८-३२

18 हें इञरेन गुति आर का़ड़मिको हों,

ओनाको दिनरे दो इञरेन जिउ रेयाक्‌ इञ दुलाकोवा,

आर ओनको दो ना़बि काथाको रोड़ा।

19 आर इञ दो हाहाड़ावाक्‌को चोट सेरमारे

आर चिनहा़को लातार ओतरेञ होय ओचोया,

माँयाँम आर सेङगेल आर तुत् तुत् धुवा़ँगे।

20 सिञ चाँदो दो ञुततेये फेरावक्आ,

आर ञिंदा़ चाँदो दो माँयाँमतेगे प्रोभुवाक् दिन आ़उरि सेटेरोक्‌रे

ओना माराङ आर ठोनोक आनाक् दिनगे

21 आर नोनका होयोक्‌आ जाहाँयगे प्रोभुवाक् ञुतुमको दोहायताय, ओनकोगेको बाञचावक्आ।

22 ए आपे इसराएल होड़को, नोवाको काथा आँजोमपे, नासारेतरेन जिसु, मित्‌टेन होड़ होतेते सा़बुत ओचोवाकान, दाड़ेयानाक् का़मिको आर हाहाड़ावाक्‌को आर चिनहा़कोते, ओने ओकाको इसोर दो उनि होतेते आपे तालारेये का़मिलेत्, आपे होंपे बाडायकान लेका। 23 नुय होड़ दो इसोराक् निटाक् मेनजोङ आर उनियाक् बाडाय दारामते, आपेयाक् तिरेये सोपरोत ओचोयेना आर आपे दो आ़न बाहरेरेन होड़को होतेते उनिपे कुरुस ओचोकेदेया आरपे गोच्‌केदेया।✝2:23 माथ २७:३५; मा़र १५:२४; लु २३:३३; जोहा १९:१८ 24 मेनखान इसोर दो उनिये बेरेत्‌केदेया, मोरोन रेयाक्‌ बेदोन खोन खालासकाते, एनते बाङ होय दाड़ेयाक्आ उनि ओनातेये का़इदा़उ दोहोकोक् दो।✝2:24 माथ २८:५,६; मा़र १६:६; लु २४:५ 25 एनते दा़उद दो उनि रेयाङे मेनेदा,

प्रोभु दो सिञ सा़टुप् इञ सामाङरेञ दोहोवाकादेया,

एनते इञ एतोम सेच्‌रे मेनाया, जेमोन आलोञ आकबाकावक्‌, ✝2:25सेरे १६:८-११

26 ओना इया़ते इञाक् मोन दो रा़सका़येना

आर इञाक् आलाङ दो हुला़सेना,

हें इञाक् होड़मो सुदहा़गे

आसरे छा़उनिक्आ,

27 एनते इञाक् जिवि दो बाम आलायतिञा पातालपुरि ला़गित्‌,

आर आमरेन सोनोतिच् हों ओहोम एमलेया, सेयाक् ञेल ला़गित्‌

28 जियोन रेयाक्‌ होरकोम बाडाय ओचोकेदेञा,

आर रा़सका़तेम पेरेजिञा आमाक् मेंत्‌हाँ सामाङरे।

29 ए बोयहाको, नोवा काथा दो खा़टिगेञ मेन दाड़ेयाक्‌आ, आ़गिल हापड़ाम दा़उद रेयाङ, बाङमा, उनि दो गोच् होंए गोच्एना आर तोपा होंए तोपा ओचोयेना, आर उनियाक् कोबोर दो तेहेञ हा़बिच् आबो ठेन मेनाक्आ। 30 उनि ना़बिये ताहेंकानते आर बाडाय आकात् ताहेंकानते, बाङमा इसोर दो किरिया़कातेये गोक्‌ आकावादे ताहेंकाना जे उनियाक् बोंस खोन मित् होड़ उनियाक् सिङघा़सोनरेये दुड़ुप्‌काया मेनते।✝2:30 सेरे १३२:११; २ सा ७:१२-१३ 31 उनि दो ञेल लाहाकाते मा़सियाक् जिवेत् बेरेदोक् रेयाङगेये रोड़लेदा,

बाङमा पातालपुरि ला़गित्‌ हों बाय आलाय गिडि ओचोलेना

आर उनियाक् जेल हों सेयाक् बाय ञेललेदा।✝2:31 सेरे १६:१०

32 उनि जिसुगे इसोर दोए जिवेत् बेरेत्‌ केदेया, ओने ओना रेयाक्‌गे आले जोतो गोहाकोकानाले। 33 आदो इसोराक् जोजोम तिते उसुल ओचोयेनते, आर बाबा ठेन खोन सोनोत जिउ रेयाङ गोक्‌आक्‌ ञामकाते, उनि दो नोवाये दुल आदेया, ओने ओकाटाक् आपे ञेल आरपे आँजोमेत्‌कान। 34 एनते दा़उद दो सेरमाते बाय राकाप् लेना बिचकोम आच्‌गेये मेनेदा।✝2:34 सेरे ११०:१

प्रोभु दो इञरेन प्रोभुए मेतादेया,

इञ एतोम सेच्‌रे बाड़े दुड़ुप्‌मे

35 आमरेन बा़इरिको आमाक् जाङगा लेबेदोक् गाँडो आ़उरिञ होय ओचोको हा़बिच्।

36 ओनाते सानाम इसराएल घारोंजरेनको खा़टिको बाडायमा, जे इसोर दो उनिगे प्रोभु हों आर मा़सि होंए होय ओचोवाकादेया, उनि जिसुगे, ओने ओकोय आपेपे कुरुसलेदे।

37 आदो नोवाको आँजोमकेत् खान ओनतोररेको सोबोक् सेङगेत् एना, आर पातरास आर एटाक् आपोसतोलकोको मेतात्‌कोवा, ए बोयहाको चेत्‌ले चेकाया?

38 खानगे पातरासे मेतात्‌कोवा, मोन आ़चुरतापे आर आपे मिमित् होड़ जिसु मा़सि ञुतुमते बा़प्‌तिसोक्‌पे, आपेयाक् का़इको इका़क्‌तापे ला़गित्‌, खान सोनोत जिउ रेयाक्‌ दानपे ञामा। 39 एनते गोक्‌आक् दो आपे ला़गित्‌ आर आपेरेन गिदरा़को ला़गित्‌ आर जोतो सा़ङगिञरेनको ला़गित्‌ तिना़क्‌को प्रोभु आबोरेन इसोर दोए होहो सोरजोङ।

40 आर ढेर एटाक् काथाकोते गोहाय एम इदिकेदा आरे बिनतियाक्‌कोवा, मेतात्‌कोवाय, "ओचोक्‌पे नोको पेड़ता पिड़हिरेनको खोन।" 41 आर ओकोयको उनियाक् काथाको आङगोचकेदा ओनको दोको बा़प्‌तिस ओचोयेना। आर एन हिलोक् दो पे हाजार गान होड़ ओनको तुलुच्‌को जुटुच्एना