1 खानगे आ़ग्रिप्‌पा दो पावले मेतादेया, "आपनार रेयाङ रोरोड़ इञ आड़ाक् आम काना।" आदो पावल ति तिया़रकाते रोड़ दोगोक्‌ए एहोप् एना।

2 ए आ़ग्रिप्‌पा राज जिहुदिको ओकाकोको बोहोक् आकादिञा ओनाको रेयाङ तेहेञ आम सामाङरेञ रोड़ दोगोक्‌कानते भा़गान इञ बुजहा़उक् काना 3 ढेरकायते आम दो जिहुदिको रेयाङ सानाम चा़लिको आर रेटेपेटेक्‌आक्‌कोम बाडायकानते, ओनातेञ नेहोंराम काना जिवि हाताड़काते आँजोमकातिञमे बाड़े

4 जुवा़न जोखेच् खोन इञाक् चालचोलोन ओकाटाक् एतोहोप् खोन इञ जा़तरेनको तालारे आर जेरुसालेमरे ताहेंकानतिञ ओना दो सानाम जिहुदिकोको बाडायगेया। 5 पा़हिल खोन इञ रेयाक्‌को बाडाय आ़गुवाकात्‌आ, गोहा एमोक्‌को मेनले खान बाङमा, आलेयाक्‌ धोरोम रेयाक्‌ काजाक उता़र खुँट लेकाते फा़रिसि धोरोमरेञ चालचोलोनेत् ताहेंकाना।✝26:5 आ का़ २३:६; फिलि ३:५ 6 आर नितोक् दो नोंडेञ तेङगोवाकाना आ़गिल हापड़ामको ठेन इसोररे गोक्‌लेत् रेयाक्‌ आस गुना़क्‌ते बिचा़र ओचोक्आ मेनते। 7 ओने ओना गोक्‌आक्‌गे आलेरेन गेलबार खुँटको दो सिञ ञिंदा़ दिला़मुंडते इसोर सेवावायते आकोरे पुरा़उक्‌को आसोक्‌कान ए राज, ओना आस रेयाङगे जिहुदिको दोको बोहोक् आकादिञा। 8 चेत् इया़ते बिन पा़तिया़उक् दोपे मेतात्‌काना, इसोर गोच्‌कोय जिवेत् बेरेत्‌एत्‌को खान?

9 इञ मा आपनार इञ बुजहा़उलेत् ताहेंकान बाङमा, नासारेतरेन जिसुवाक् ञुतुम उपा़रते आ़डि ओकोच् का़क्‌मिगे लेकतिञा।✝26:9 आ का़ ८:३; २२:४-५ 10 आर जेरुसालेमरे होंञ ओनकालेत्‌गेया, आर माराङ नायकेको ठेन एकतिया़रि ञामकाते सोनोतको मोदरेन आ़डि होड़ हाजोतकोरेञ काबहाड़लेत्‌कोवा, आर ओनकोको गोच्ओचोक्‌कान ताहेंकानरे हों रा़जिगेञ ताहेंकाना। 11 आर सानाम सुना़गोगकोरे आ़डि धाविञ सा़जा़इकेत्‌कोते जिसु रेयाङ हेनोसता रोड़ ओचोकोवा मेनतेञ जोरमोटेत्‌को ताहेंकाना, आर ओनको उपा़रते बेबा़ड़िच् बा़उला़हायेनते बिदेस रेयाक्‌ नागराहाको हा़बिच् सेनकातेञ खेदेत्‌को ताहेंकाना।

12 आर ओना ला़गित्‌गे माराङ नायकेको ठेन खोन एकतिया़रि आर पारवानाआनते दामेसेकतेञ चालाक्‌कान ताहेंकानरे, 13 तिकिन जोखेच् होररे, ए राज सेरमा खोन मित्‌टेच् मारसाल इञ ञेलकेदा, सिञ चाँदो रेयाक्‌ खोन हों बा़ड़ति झाक झाकगे, इञ आर इञ सोङगेते चालाक्‌कानको बेड़हायते बाम्बेरेना। 14 आर आले सानामको ओतरेले भिनदा़ड़ेना खान, मित्‌गोटेन आड़ाङ इबरि पा़रसिते मेता़ञकान इञ आँजोमकेदा, "ए सा़उल, ए सा़उल, चेदाक्एम खेदेञ काना? आरजानरे फान्‌दाय दो आम ला़गित्‌ हाक्‌रोनाक्‌ काना।" 15 आदोञ मेनकेदा, "ओकोय कानाम ए प्रोभु?" खानगे प्रोभु दोए मेनकेदा, "इञ दोञ जिसु काना, ओने आमेम खेदेञकान। 16 मेनखान बेरेत्‌मे आर आमाक् जाङगाते तेङगोनमे, एनते नोवा ला़गित्‌गे आम ठेनिञ ञेल ओचो आकाना, जेमोन गुति आर गोहा इञ बाछाव बाहालमे, ओनाको ला़गित्‌ ओनाको खा़तिरते आम ठेनिञ ञेल ओचोक् हापेन। 17 आरिञ रुखिया़मेया, आम जा़तरेनको खोन, आर जिहुदि बाहरेरेनको खोन हों, ओने ओनको ठेन होंञ कोलेत्‌मे, 18 ओनकोवाक् मेंत्‌ सा़ड़ ओचोयताको ला़गित्‌, जेमोन ञुत खोन मारसाल सेच्‌ सायतानाक् एकतिया़रि खोन इसोर सेच्‌को आ़चुरोक् जेमोन का़इ रेयाक्‌ इका़ इञरे पा़तिया़उक्‌ होतेते सोनोत ओचोवाकानको तालारे बाखराको ञाम।"

19 ओनाते, ए आ़ग्रिप्‌पा राज सेरमा खोनाक् ओना ञेलाक् बेबाक्‌ताविच् दो बा़ञ होयलेना। 20 बिचकोम पा़हिलते दामेसेकरेनको आर जेरुसालेमरेनको, आर इना़ काते दो गोटा जिहुदा़ दिसा़मरेनको आर जिहुदि बाहरेरेनको होंञ ला़इ सा़डेयात्‌कोवा, जेमोन मोनको आ़चुर आर इसोर ठेनको रुवा़ड़ोक् आर मोन आ़चुर लेक का़मिकोको का़मिते। 21 ओनाको गुना़क्‌तेगे कोयजोङ ओड़ाक्‌रेञ ताहेंकानरे, जिहुदिको दो साप्‌केदिञते गोजेञको कुरुमुटुयेत् ताहेंकाना। 22 आदो इसोर ठेन खोन गोड़ोंञ ञामकेत्‌ते तेहेञ दिन हा़बिच् इञ तेङगोवाकाना, हुडिञ आर हापड़ाक्‌को गोहाञ एमाकोकान, बाङमा ना़बिको हों आर मोसे हों ओकाटाक् होयोक्‌गेया मेनतेको रोड़ाकात्, ओना छाडा एटागाक् दो चेत् हों बा़ञ रोड़ेदा। 23 एनकाथाय मा़सि दो दुक जोजोम होयोक्‌गेताया आर गोच्‌को खोन पा़हिलते जिवेत् बेरेत् आकानिच् हुया़ँते मारसाल ला़इ साक्‌डेयिच्ए होयोक्आ, जिहुदिको ला़गित्‌ हों आर जिहुदि बाहरेरेन होड़को ला़गित्‌ हों।✝26:23 १ कोरि १५:२०

24 आदो उनि ओनकाए रोड़ दोगोक्‌कान ताहेंकानरे, फेसतुस दो आँट आड़ाङतेये मेनकेदा, "बा़उला़हा आकानाम, पावल आमाक् आ़डि उता़र बिदिया़तेम बा़उला़हा आकाना।"

25 मेनखान पावले मेनकेदा, "बा़ञ बा़उला़हा आकाना, ए मानोतान फेसतुस, मेनखान सा़रियाक् आर आकेल तेयाक् काथाकोगेञ रोड़ेदा। 26 एनते राज दो नोवाकोय बाडायगेया, आर उनि ठेन सोहोसातेगेञ रोड़ेत्‌आ। एनतेञ पा़तिया़उ आकाना नोवाको मोद खोन ओकाटाक् हों उनि खोन दो बाङ ओको आकाना मेनते, नोवा मा एनते कोचारे मा बाङ चोङ होयाकान। 27 ए आ़ग्रिप्‌पा राज ना़बिकोम पा़तिया़वाताको काना? इञिञ बाडाया पा़तिया़वाताको कानगेयाम मेनते।"

28 खानगे आ़ग्रिप्‌पा दो पावले मेतादेया, "आर थोड़ागान ला़इतेगेम रा़मजा़उ ओचोकिञा क्रिसतानोक् ला़गित्‌?"

29 आदो पावले मेनकेदा, "इसोर ठेनिञ कोयेदा जेमोन थोड़ातेत्‌रे हों से ढेरतेत्‌रे हों आम एसकार मोतो दो बाङ, बिचकोम तेहेञ दिनको आँजोमेत्‌तिञ सानामकोगे इञ लेकाको होयोक्‌मा, नोवा सिकड़ि छाडा।"

30 आदो राजे बेरेत्एना आर दिसा़म चाक्‌लाविच् आर बेरनिस आर ओनको साँवते दुड़ुप्‌लेनको हों। 31 आरको सा चालावेनते आको मोदरे गालमारावकातेको मेनकेदा, "नुय होड़ दो गोच् ओचोक् से तोल ओचोक्‌ लेक दो चेत् हों बाय चेकायेत्‌काना।" 32 आर आ़ग्रिप्‌पा दो फेसतुसे मेतादेया, "नुय होड़ दोए आड़ाक् ओचो दाड़ेकोक्‌गेया, का़इसा़र आलोय दोहायाय खान होनाङ।"